Temur boshqarish ishlarini o‘z qo‘liga olgach, juda xoldan toygan mamlakatda qonun va tartib ishlarini joriy etdi. U islomni qattiq, qo‘llab-quvvatlasa-da Chingiz yasovlarini hurmat qilardi. Bu qonunlar Buyuk Turonning hikmatli yo‘riqlari bo‘lgani uchun, turk xalqlarining ijtimoiy va siyosiy ahvoliga muvofiqligi uchun Temurga ma’qul edi.

Temurni Chingizxon ila bir safga qo‘yib, uni vahshiy , zolim, qaroqchi deb atagan kishilarning fikrlari ikki marotaba xatodir. U Osiyoning turk sarkardasi edi. O‘zining g‘olib askarlari va qurollaridan o‘z zamonasining taomilicha foydalangan. Uning faoliyati, xususan, dushmanlari tarafidan gunoh hisoblangan ishlari va urushlari, teranroq qaralsa, doimo biror jinoyatga jazo tarzida ro‘y bergan. To‘g‘ri, jazo qattiq, lekin adolatli bo‘lgan.