Сирдарё садоси

Вазирлар Маҳкамасининг "Ички ишлар органлари тизимида давлат хизматлари кўрсатиш сифатини янада такомиллаштириш ва тартиб-таомилларини соддалаштириш чора-тадбирлари тўғрисида"ги қарори 6-бандига мувофиқ, Фуқаролар паспорт билан бир қаторда идентификация ID-карталари ёки миллий ҳайдовчилик гувоҳномаларини кўрсатиб, банк хизматларидан фойдаланишлари мумкин.

Янги намунадаги миллий ҳайдовчилик гувоҳномаси шахсни тасдиқловчи расмий давлат ҳужжати мақомига эга бўлгани сабабли, у банк хизматларини кўрсатиш жараёнида паспортнинг ўрнини боса олади (Расул Кушербаев)👇

Давлатимиз раҳбарининг 2024 йил 30-декабрдаги ПҚ-465 сонли қарорига асосан "Қишлоқ хўжалиги майдонларидаги қўшимча имкониятлардан фойдаланган ҳолда маҳсулот етиштиришни кўпайтиришга доир чора-тадбирлар тўғрисида"ги қарори имзоланди.

Хусусан, қарор талабларига мувофиқ бугунги кунда Гулистон туманида 542 та фермер хўжаликлари мавжуд бўлиб, шундан 508 гектар дала майдонларининг дала четларига 445 минг туп мевали кўчатлар экилиши режалаштирилган. Бундан ташқари, суғориш ва каллектор, дранаж тармоқлари атрофидаги бўш турган 56 гектар ер майдонига 50 минг туп мевали олхўри, олча, беҳи, узум ва чилон жийда кўчатлари экилиши кўзда тутилган.

"Айни кунларда режалаштирилган кўчат экиш ишларида, кластерлар ва фермер хўжаликлар томонидан бўш ер майдонлари тозаланиб, 79 минг туп мевали кўчатлар экилди", — дейилади туман ҳокимлиги Ахборот хизмати хабарида👇

"Истиқболли лойиҳалар миллий агентлиги энг йирик криптобиржалардан бири Binance томонидан Ўзбекистон фойдаланувчиларига хизмат кўрсатиш масаласини ҳал қилди", — деб хабар бермоқда Агентлик матбуот хизмати. Қайд этилишича, мамлакат ҳудудида Binance криптобиржаси ўз фаолиятини қонунчилик билан белгиланган тартибда маҳаллий CoinPay МЧЖ орқали амалга оширишни режалаштирмоқда.

CоinPay — криптоактивлар айланмаси соҳасида расмий хизмат кўрсатувчи провайдер бўлиб, у криптобиржа ва криптодўкон фаолиятини амалга ошириш учун тегишли лицензияларга эга. Ўзбекистон резидентлари Binance платформасига CoinPay’нинг тегишли ресурслари орқали киришларига имконият берилади. Шу билан бирга, фойдаланувчилар ўз маблағларини банк карталари ва миллий тўлов тизимлари орқали миллий валютада киритиш ҳамда чиқариш имкониятига эга бўлади. Тизимни ишга тушириш, ҳамкорлар платформаларининг барча модуллари, жумладан, миллий тўлов тизимлари билан интеграциялашганидан сўнг амалга ошириш режалаштирилган. Тизимнинг ишга туширилиши ҳақида ҳамкорларнинг расмий ресурсларида (CoinPay ва Binance) қўшимча равишда эълон қилинади.

2024 йилнинг январь ойида агентлик томонидан Binance криптобиржасига нисбатан Ўзбекистон қонунчилиги, хусусан, криптоактивлар айланмаси соҳасидаги қонунчилик талабларини бузгани учун жарима қўллаш ҳақидаги қарор қабул қилинган эди. Шундан сўнг, тегишли даъво аризаси Тошкент шаҳар иқтисодиёт судига юборилган. 2024 йилнинг 26 мартидан 7 июнига қадар Binance криптобиржаси вакили иштирокида давом этган суд жараёнлари якунига кўра, суд агентликнинг аризасини тўлиқ қондириш ҳамда криптобиржадан 300 базавий ҳисоблаш миқдорига тенг бўлган жаримани Ўзбекистон бюджетига белгиланган тартибда ундириш ҳақида қарор қабул қилган. Binance криптобиржаси суднинг барча талабларини бажарганлигини ҳамда жаримани қонунчиликда белгиланган тартибда давлат бюджетига тўлиқ тўлаган.

Binance криптобиржаси — савдо ҳажми бўйича илк ва энг йирик криптовалюта биржаларидан биридир. Платформа 2017 йилда ташкил этилган ва Кайман оролларида рўйхатдан ўтган. 2023 йил ноябрда пул ювиш ва банк сирини бузгани учун Binance Америка расмийларига қарийб 4,5 миллиард доллар жарима тўлайдиган бўлгани тўғрисида хабар берилганди👇