Sarvar Nazarbayev | Blog

Majburlovchi kuch kerak

Ochlikdan o'lmayapsiz. Ko'chada qolmadingiz.

100 yil oldin insonlarning asosiy g'ami bo'lgan bu ikki tashvish sizda yo'q.

Deyarli ishlamasangiz ham tirik qolsa bo'ladi.

Endi tanlov boshlanadi:

a) Yengil, mas'uliyatlarsiz, oson hayot. O'rtacha 3-4 yil shu temp. Natija — qolgan umr afsus, stress, qiyinchilikda o'tadi.

b) Og'ir, vazifalarga boy, mas'uliyat olingan hayot. Bu ham o'rtacha 5 yil. Qolgani osonmi? Yo'q. Undan ham qiyin. Lekin yoqimli. "a" dagi holatdan ko'ra ruhiy, moliyaviy holat ancha yaxshi.

"O'zingni boshqar, rag'batlantir. Har kuni ertalab orzularingni o'zingga ayt. Sen kuchlisan. Sen uddalaysan". Juda quruq gaplar.

Dastlabki bosqichda ba'zi videolar ko'rib, o'ziga ishonchi kuchli bo'ladi. 1-2 yil goho yonib, goho so'lib yuradi.

Keyin insonga baribir majburlovchi kuch kerak ekanini anglab yetadi. Rahbar, ustoz, muhit...

Majburlovchi kuch bo'lishi shart. Inson mas'uliyat olishi shart.

Supermarketimiz uchun sabzavot mahsulotlariga ertalab buyurtma berish mas'uliyatim meni har kuni sahar 4:00 da uyg'otadi.

Ustozimning kitob taqdimoti uchun qo'ygan deadlaynlari meni kechalari kitob o'qib chiqishga majbur qiladi.

Mas'uliyat oling. Qiyin, yoqimsiz bo'ladi. Lekin o'stiradi.

@Sarvar_Nazarboyev

Ustoz qo'lini ochadi. O'quvchilar har biri shokolad beradi.

Yaxshi trend. Ko'rdingizmi?

Maktab, universitetlarda yil sayin ustozlarga hurmat tushib bormoqda.

Hatto salom bermaydi. Qo'pol gapiradi. Qarsillatib yopib chiqib ketadi

Ustoz hatto, doskani o'zi tozalaydi. Yomon holat.

Hurmat qiladiganlar – baho uchun. Samimiylari - noyob.

Ilm faqat kitoblar, darslar, videolar orqali olinmaydi. Ilm yuqadi. Ustoz nazari bilan, deyishardi kattalarimiz.

Ustoz nazar qilishi uchun oldin siz nazariga tushishingiz kerak.

"Menga bir dona harf o’rgatgan kishining quliman. Xohlasa meni sotsin, xohlasa meni qul qilib ishlatsin".

Ali roziyallohu anhu.

Xorun ar-Rashid o'g'li ustozining oyog'iga suv quyayotganini ko'rdi. Jahli chiqdi va:

Ey Shayx! Faqat quymasin. Bir qo'li bilan quysin, bir qo'li bilan yuvsin ham!

Ustozlarga hurmat ana shunday bo'lgan. Ilm yuqqan. Yuksak marralarni zabt etishgan.

@Sarvar_Nazarboyev

Eng qiyini:

Uning xatosini aytdim.

Niyat — uning xatosini to'g'rilashmi yo o'zingni aqlli ko'rsatishmidi?

Yozdim.

1. Bu jumlalaringni go'zal qilishdan murod – o'zingni adabiyotchi ko'rsatish bo'lib qolmadimi?

2. Haqiqatda foyda berishmi yo aqlli ko'rinish?

3. Yo ko'proq tarqalishimi?

O'zi bu postdan maqsad — niyating unday emas ekanligini bildirish emasmi?

Eng qiyini bajarish emas. Yozish emas. O'rganish emas ekan.

Niyatni to'g'irlash ekan. U qalbni tub-tubida bo'larkan

@Sarvar_Nazarboyev

⏱ Vaqt juda tez o'tyaptimi?
Sabablar & Yechimlar

1. Har kun bir xillik. Bir xil ish. Bir xil odamlar. Miya yangi narsa ko'rmaydi. Vaqt o'tganini his qildiradigan yangi narsa bo'lmadi

2. Ijtimoiy tarmoqlarga bog'lanib qolish. Telegramda sang'ish, videolar ko'rish sizni "avtopilot" holatiga solib qo'yadi. Vaqt "yo'q" bo'lib qoladi.

3. Stress va haddan tashqari ko'p vazifalar. Doim shoshilib yurasiz. Vaqtni his qilishga vaqt bo'lmaydi

4. O'tmish yoki kelajak bilan ongni band qilasiz. Hoziringizni yashamaysiz. Vaqtni his qilmaysiz

Yechim nima?

1. Yangi joylar, yangi do'stlar, yangi kurslar, yangi kitoblar, hobbi, yangi mashg'ulotlar va h.z larni hayotingizga qo'shing. Yangi xotiralar — vaqtni "sekinlashtiradi"

2. Hozirgi lahzani his qiling. Ibodat vaqti faqat shuni o'ylang. Ovqatlanganda faqat ovqatlaning. Oddiy quyosh chiqishi yoki kofe ichishdan zavqlaning.

3. Mediaga cheklovlar qo'ying. Qachon kirishingizni rejalang.

4. Tafakkur qiling. Tanaffus olib turing.

5. 20/80 qoidasi. Qiladigan ishlarimizning 20% qismi 80% natija beradi. O'shani toping. Qolganini choping.

6. Baxtimizga bizda baraka tushunchasi bor. Taqvo, Qur'on, sahar vaqtida uyg'oqlik, qarindoshlar bilan aloqa — uning topilishiga sabablardir.

@Sarvar_Nazarboyev

Kuzatayotganlarning soni muhim emas.

Nega kuzatayotgani muhim.

@Sarvar_Nazarboyev

Haqiqat baribir kimnidir xafa qiladi.

Auditoriyasini xafa qilmayotgan muallif – haqiqatni yozmaydigan muallifdir.

@Sarvar_Nazarboyev

Qarama-qarshi jins vakiliga qiziqmagan erkak kasal (mi?)

Mediada shu fikr yangradi: "Erkak kishida ayollarga qiziqish bo'lishi kerak, bu testesteronni bildiradi. Qiziqish bo'lmasa u erkak kasaldir"

Hatto shu fikrni miyasiga quyib, ba'zilar davralarda shu mavzuda juda ko'p gaplashadigan bo'lib ketdi. Ochiqchasiga.

Ha desa, o'sha fikrga yopishib oladi.

Ey "erkak"! Qiziqishi bo'lishi kerak degani — oldidan o'tib ketsa och bo'ridek tikilish degani ekanmi?

Tinmasdan ular haqida gapirish kerak degani ekanmi?

Qiziqsang, ichingdan qiziq, nima qilasan atrofdagilarni hayolini chalg'itib?

Qizlar haqida gapirmagan erkak, testesteroni past ekanmi?

Balki, uning irodasi kuchlidir? Hissiyotlarini tuturiqsiz oshkora qilavermas?

Tilini seniki kabi saviyasiz gaplardan, ko'zini faxshdan tiyayotgandir.

Mediadagining kimligi muhimmas.

Qizig'i — biz qaysi mashhur nima desa ishonib, ergashib ketayotganimiz.

@Sarvar_Nazarboyev

Yillar emas, muammolar ulg’aytiradi.

©️ Aziz Rahimov

@Sarvar_Nazarboyev

Balki uning vazifasi shudir?

Ukam sal quloqsizroq. Fe'li og'irroq. Gapga kirmaydiganroq.

Xohlardim: yo'qligimda ham yaxshi bola bo'lsa. O'zi ilmga qiziqsa.

💡Keyin o'ylab qoldim: uning bunday xarakteri men uchun bir imkoniyat ekan. Ana shunday bolalarni qanday tarbiyalash, muomala qilishni o'rganarkanman.

Shu – meni bola psixologiyasini o'rganishga majbur qilarkan. Farzand tarbiyalaganda kerak bo'ladigan saboqlarni olarkanman.

Atrofimizda ana shunday "maxsus" vazifalarga ega insonlar, vaziyatlar bor.

📶Aldab ketishadi – aldanmaslikni o'rganishingizga yo'l.

📶Media fahshga to'lgan – uni qanday yo'q qilish va yaxshilikni targ'ib qilishni o'rganishga yo'l.

📶Ta'lim botqoqlikda – samarali ta'lim yo'llarini o'rganishga yo'l.

📶Qo'pollik qilishadi – o'zingizda bosiqliq, halimlik sifatini shakllantirishingizga yo'l.

📶Do'stingiz yomon ishlarni qiladi – yaxshi yo'lga uni qanday chaqirish ilmini o'rganishga yo'l.

Sizga yoqmagan vaziyatlar – aslida "maxsus" vazifalardir.

Sizni kuchliroq bo'lishingizga xizmat qiladi. Foydalaning.

@Sarvar_Nazarboyev

Sen haqingda yozilgan kitob

Uyg'onishadi, yeb ichishadi, ishlashadi, uxlashadi.

Bu bir kungina xolos, emas. Umrni — kunlar tashkil qiladi. Kitobni sahifalar tashkil qilgani kabi.

Kunlaringni — kitob sahifalari deb olsak, naqadar zerikarli bo'lar-a?

Yoki o'zing o'qib, qahramondan qattiq ranjisang kerak.

Dangasaligi, intizomsizligi, beodobliklari seni hayron qoldirsa kerak.

Bekorchi suhbatlar, g'iybat, bahs-tortishuvlar.

Yozuvchi biz haqimizda nimani ham yozar ekan. Kunimizda sahifalarga tushishga arzigudek nimamiz bor?

Qiyinchilikda sabr, og'ir kunlarda matonat, uzoq muddat mehnat, tavakkularga boy hayot, boshqalarga o'xshamaslik, peshqadamlik. Ana shular bilan kitob qiziqroq bo'lmaydimi?

Bu kitob hayoliy emas. Allaqachon yozilyapti. Bir emas ikki, o'zidan qo'shadigan inson emas, xolis yozadigan farishtalar tomonidan.

Bir kun o'qiymiz. U kun kitob nashrdan chiqqan bo'ladi. 2-nashr bo'lmaydi. O'zgartirib bo'lmas.

Afsuslanmaslik uchun, hozir o'zgaraylik. Xatolarni o'chirish imkoni bor.

Kitobni davomini "qiziqarliroq" qilaylik.

O'sha payt o'qib xursand bo'lish uchun)

@Sarvar_Nazarboyev

Nega aynan bu kitoblar?

Kitob menga 3 ta narsa berishi kerak:

1. Muammoyimga yechim berishi kerak

2. Sohamda mutaxassislikka yaqinlashtirishi kerak.

3. Xato fikrlarimni to'g'irlashi kerak

Demak ketdik:

1. "Yoz, qisqartir" kitobi — asosan yozish bo'yicha. Blog yuritaman. Yozuvimni kuchaytirish uchun kerak

2. "Stiv Jobs" — "Maqsad Club" da vazifa qilib berilgan edi. Avtobiografiyalar o'qish — o'zgacha foydali. Hayotidan xulosalar olasiz. Sohangizdagi odamniki bo'lsa zo'r.

3. "Start with why" — liderlik bo'yicha. Jamoani yetaklash, ilhomlantirish, ishlarini qildirishga qo'llanma. Soham uchun

4. "Qora oqqush" — fikrlashni kengaytirish uchun. Juda ko'p voqealarni noto'g'ri tahlil qilamiz. Nassem og'a bu mavzularda juda usta.

5. "Olamlarga rahmat payg'ambar" — axloqni sayqallash uchun. Dunyodagi eng muhimi — axloq o'zi.

6. "Жесткий менеджемент" — to'g'ridan to'g'ri sohamniki. Qattiqqo'llik qay darajada va qayerda kerakligi, uning foydalari haqida. "Olamlarga rahmat payg'ambar" ikkalasi zo'r balansni bersa kerak)

7. "Dunyoni tebratgan 7 buyuk" — aytganimdek, avtobiografiyalar ilhom beradi. Kuchli shijoat paydo qiladi.

@Sarvar_Nazarboyev

Yordam bermayman!

Eshitamiza, "katta odam bo'lib ketsang "Поддержка" qivorarsan bizniyam"...

Biz o'zbeklar shunaqa, boshqadan yordam kutishga o'chmiz. Ta'magirlik ruhida tarbiyalanganmiz.

Yaxshilik qilsak, kelajakda qaytarishini kutib qilamiz. Manfaat istaymiz.

Qanday "Поддержка"ni aytyapsiz?

Tupoy o'g'lingizni ishga olishimnimi?

Yoki xalqning yeridan sizga botil yo'l bilan yer ajratib berishimnimi?

Tanish-bilish qilib, qilgan jinoyatingizni yopib berishimnimi?

Tuppa-tuzuk yashab turganingiz holda, hokimiyatdan "posobya" puli qildirib berishimnimi?

Yuqoridagilarni aslo qilmayman. Aslo!

Sizlar yoshlarni ana shu ruhda tarbiyalayapsizlarmi? Poraxo'r bo'lib ketishiga o'zlaringiz sababchi emasmisizlar?

Qo'llab-quvvatlash, yo'l ko'rsatib yuborish, boshqani haqqini rioyasini qilgan holda yordam berishlar — bu boshqa masala. Qo'limizdan kelgancha qilamiz.

Lekin bizdan, Allohning amrlariga teskari, xalqning haqlari poymol bo'ladigan, qonunlar oyoq osti qilinadigan "Поддержка" larni sira kutmang!

Biz unday avlod emasmiz!

@Sarvar_Nazarboyev

Oltin maslahatlar

1. Biror narsaning xarididan olgan rohating uzog’i ikki haftaga boradi. Malibu yoki iMac bo’lsa ham. Lekin sen uning pulini jamg’arishga oylar (yillar) sarflagan bo’lasan.

2. Marketologlar, atrof-muhit seni baxtsiz ekaningga ishontirishmoqchi. Shunda sen ko’proq sotib olasan. Doimiy mijoz bo’lasan. Balandroq uy, yangiroq mashina, oxirgi telefon.

3. Pulga sotib olish mumkin bo’lgan hech narsa seni xotirjam yoki baxtli qilmaydi. Hattoki Tesla ham.

4. Daromadingni ikki barobar oshirishning eng tez yo’li — harajatlaringni ikki barobar kamaytirish.

5. Pul topishdan asosiy maqsad — buyumlar emas, balki pulsiz topiladigan narsalardan ko’proq bahramand bo’lish: Ilm, bo’sh vaqt, oila, sog’lik, ichki xotirjamlik.

6. Amerikadagi tadqiqot bo'yicha odamlarni eng baxtli qiladigan narsa — ertalab turib, bugun xohlagan ishiga imkoni bo'lishi ekan. Xohlasa ilm oladi, xohlasa oilasi bilan qoladi. Xohlasa dars o'tadi.

7. Senga kerak bo’lganidan ham ko’p narsang bor. Yaxshilab qara. Buyumlar uchun pul topma. Tekin narsalarga bo’sh vaqting bo’lishi uchun pul top.

* Morgen Housel va Aziz Rahimov ustoz fikrlaridan qo'shma xulosalar.

@Sarvar_Nazarboyev

⚡️ Ricomel Beverages (Dinay) kompaniyasi rahbariga shogird tushish imkoniyati!

Bizga to'liq ish kunida ishlay oladigan, biznes boshqaruvga qiziquvchi shijoatli yigit-qizlar kerak!

Biz taklif qilamiz:

⏺O'sib boruvchi oylik maosh
⏺Bepul tushlik
⏺Real kompaniyada amaliyot
⏺Doimiy menejmentni o'rganib boradigan ahil jamoa
⏺Ma'lum vaqtdan keyin mustaqil loyiha

Talablarimiz:

⏺ Ingliz va rus tillarini bilish
⏺ To'liq ish kunida ishlay olish
⏺ Kelajakda o'zini biznes, boshqaruv sohasida ko'rish
⏺ Liderlik, o'rganuvchanlik ko'nikmalari
⏺ Yosh chegarasi: 19-35 yosh

🚀 O'zingiz haqingizda to'liq ma'lumot va resume'ngizni quyidagi profilga jo'nating: @Sarvar_Nazarbayev

Shashlikni kuydirib yubormang!

O'rtaga olvolib ustidan kulishadi. Mazah qilishadi.

Asosan, ichlaridagi pakanasi, ko'zoynak taqadigani, aqli zaifrog'i, yoshi kichkinasi, muloyimrog'i bu mo'ljalga tushadi.

Kulinuvchi ham kuladi. Tashqaridagilar to'g'ri qabul qilyapti deb davom etaverishadi.

Ichidan norozi bo'lib turgan bo'ladi.

Chuqur, behayo hazillar qilish – yaqinlik belgisi bo'lib qolgan. Aslida ham shundaymi?

Hazil qilish – shashlik pishirish deb olsak, me'yorida qilsak ajoyib ish bo'ladi. Biz shashlikni kuydirib yuboramiz.

Do'stlar orasida hazil-huzil bo'ladi albatta. Lekin obro' to'kmaylik.

Har bir obro' to'kuvchi va ayblovchiga vayl bo'lsin (104:1)

@Sarvar_Nazarboyev

Mingdan bir qismini ko'ryapsiz

Ijtimoiy tarmoqlarda ko'zim tushadi: Eng chiroyli joylarda, eng mazali ovqalar iste'mol qilayotganini ko'rsatishadi.

Har kim eng yaxshi holatini ko'rsatishga harakat qiladi. Aslida, ko'rsatayotgan hayotini har kuni yashamaydi.

Haqiqiy hayotini yashirishadi. Bir lahzalik jarayonni ilib olib, xuddi o'zini hayoti shudek qilib ko'rsatishadi.

Ko'rganlar solishtiradi. Shu insonga mazza. Hayoti go'zal. Biz ham qachon shunday yasharkanmiz

Yo'q. Siz uning hayotini mingdan bir qismini ko'ryapmiz xolos. Va eng yaxshi qismini.

Muammolari, qiyinchiliklari, hatto yig'lagan vaziyatlari bor. U voqeani orqasida ko'plab boshqa voqealari bor.

Ko'rsatuvchilar: Noshukurlik, hasad kelib chiqishiga sabab bo'lmang. Oyda bir duch kelgan lazzatli taomlaringiz-u, mashhur insonlar bilan uchrashuvlaringizni har kunlik odat kabi ko'rsatmang.

Kunlik odatingiz shunday bo'lganida, bu siz uchun normal bo'lib, ko'rsatishdan zavq olmas edingiz.

Kuzatuvchilar: Ularni ideal deb o'ylamang. Aytganimdek, bir parchasi va eng qarmoqqa ilnadiganini, bezagan holda ko'rsatishadi, xolos.

@Sarvar_Nazarboyev