Marketer Davronbek

Yaqinda marketing agentligimiz uchun loyihalar olish maqsadida reklamalarni ishga tushiramiz

Maqsadimiz yuqoriroq chekdagi xizmatlarimizni sotish.

Asosiy trafik manbai sifatida Meta ads ni ishlatamiz va kamida 5 bosqichli varonka bilan lidlarni olishni reja qilyapmiz.

Tabiiyki bizga qoʻshimcha kuchlar kerak boʻladi, afsuski raqamlar bilan yetarli darajada ishlay oladigan, analitik qobilyatga ega boʻlgan va natijalarni tezda tahlil qilish koʻnikmalariga ega boʻlgan mutaxassislar juda kam.

Bizni sohada ayniqsa yuqoridagi koʻnikmalar juda muhim, chunki tahlil koʻnikmasi siz qilgan ish qanchalik toʻgʻri yoki notoʻgʻri ekanligini tezda anglash va koʻproq foyda keltirish orqali koʻproq foyda olishga sabab boʻladi.

Jamoaga yangi odamlar jalb qilish va bilimlar bilan boʻlishishni maqsad qilib turibman. Hozir men oʻylab turgan narsa bu buni qanday amalga oshirish.

Nasib siz bilan bular borasida yaxshi yechim topamiz.

@marketerbilan

Analitika va raqamlar aslida nimani ko'rsatadi? (↑ davomi)

Analiz qilish natijasida siz ko'p toʻgʻri va notoʻgʻri raqamlarni aniqlaysiz, eng muhimi qayerda muammo borligini koʻrasiz.

Lekin muammo siz oʻylagandan koʻra chuqurroq boʻlishi mumkin. Kecha yozgan keysda yozganimdek qurilish biznesida ham raqamlar tizimida muammo borligini koʻrsatdi, chunki CRM da koʻp lidlar yoʻqolib qolayotgan edi.

Yuzaki oʻylansa shunchaki CRM ni tuzatish bilan muammo bartaraf qilinadigandek koʻrinadi. Lekin biz siz bilan yosh bola emasmiz, oʻylaymanki meni kuzatadigan odamlar yuzaki maʼlumotlar uchun obuna boʻlishmagan.

Agar muammoga chuqurroq yondoshilsa

1. Asl sabab kechagi keys misolida 3 oydan beri davom etib kelayotgan xatolikni anglamagan sotuv boʻlimi rahbarida. Marketing bilan birga ishlashi kerak boʻlgan, raqamlarni va sotuvlarni kuzatishi kerak boʻlgan xodim agar men borib soʻramaganimda eʼtiborsiz davom etgan boʻlardi.

2. Har oy marketing va boshqa harajatlar uchun byudjet belgilovchi yoki moliyaviy rejalarni nazorat qiluvchi kompaniya moliyachisi ham pul qayoqqa ketayotganini soʻramagan, tikilgan summa qanchalik zarar yoki foyda bilan qaytayotganini nazorat qilmagan.

3. Marketing boʻlimi ROAS, ROMI bilan qiziqmaydi va ajratilgan byudjetni sarflash bilan cheklanadi.

Tahlildan kelib chiqsak yuqorida sanab oʻtilgan xodimlar kompaniya kelajagi va rivojlanishiga befarq yoki bilimsiz. Demak raqamlar muammo qayerdaligiga emas kimda ekanligiga olib boradi.

Aksariyat bizneslar raqamlarni tahlil qiladi lekin yuzaki muammolar bilan aldanib qolishadi, natijada 3-6 oydan keyin yana huddi shu muammo qaytalanaveradi. Chunki muammoni asl sababchisi hali ham ichkarida.

Koʻp aytaman, yoki analiz qilishni biling yoki analitik ishga oling.

@marketerbilan

Biznesdagi kichik (katta) tajribam bilan boʻlishmoqchiman

3 oy avval bir qurilish biznesi bilan ish boshlagan edik. Ular bilan 2 oy kichik maslalarda hamkorlik qildik.

Yanvar oyida men ulardan nechta lid tushgani, sotuvlar soni, sifatsiz lidlar va barcha lidlarni manbalari haqida raqamlarni soʻradim.

Masofadan turib raqamlarni ololmaganim uchun oʻzim sotuv boʻlimi rahbari bilan koʻrishdim va olishim kerak boʻlgan narsalarni aytdim. Lekin sotuv boʻlimi boshligʻi deyarli hech nimani koʻrsata olmadi va koʻrsatgan raqamlari ham notoʻgʻri ekanligini aniqladim.

Ularga tizim xato ishlayotgani, xodimlarda raqamlar bilan ishlashda muammo borligini aytdim. Eng qizigʻi bu muammolar ularda 3 oydan beri boʻlgan. Ular lidlar va sotuvlar sonini, ofisga kelib harid qilmaganlar sonini umuman bilishmagan, CAC haqida gapirmasa ham boʻladi.

Bir nechta reklama kanallariga yaxshigina pul tikiladi lekin qaysi kanal qancha foyda berayotganini esa hisoblash haqida oʻylab ham koʻrishmagan.

Biznesda xodimlar har oy soʻngida hisobot topshiradi, hisobotlari esa doim notoʻgʻri boʻlgan. Hullas muammo shunchalik kattaki, aniq ayta olaman mana shu muammoni oʻzini bitta konsultant bir necha ming dollarga topib bergan boʻlardi.

Tizim xato ishlayotganini bilishdi va tizimni toʻgʻirlashdi, ammo hali ham aniq raqamlarni bilishmaydi, ularga analitik boʻlish taklifini berganimda esa buni rad qilishdi.

Men ularga aytgan gap esa "siz mana shuncha pul yoʻqotishga ongan rozisiz".

Biznes ham huddi siyosat kabi katta va qatʼiy qarorlarni talab qiladi. Bunga qodir boʻlmasangiz bugun boʻlmasa ertaga yiqilasiz.

Keyingi postda raqamlarni kuzatish va analitika aslida nimani koʻrsatishi haqida yozaman.

@marketerbilan

Siz topadigan foydani katta qismini nima tashkil qiladi?

3 yildan beri marketing olamidaman, noldan ham biznes koʻtarib koʻrdik, tayyori bilan ham ishlab koʻrdik.

Har doim biznes egasi yangi mijozlarni jalb qilish va sotuvlarni oshirishni xohlagan. Lekin men kuzatgan aksariyat holatda foydani katta qismini qayta sotuvlar tashkil qiladi. Yoki hech boʻlmasa avval sizniki kabi produktni boshqa joydan sotib olganlar sizdan ham sotib olishadi.

Tushunib olishimiz kerak boʻlgan narsa bu biz berayotgan taklif qandayligi. Agar yangi mijoz uchun reklama qilinsa unda taklif ham boshqacha boʻladi. Taklif aynan bizga begona boʻlgan odamlarga qaratiladi. Men aytganimdek qayta sotib oladigan isteʼmolchilarga esa taklif boshqacha ishlab chiqarilishi kerak.

Men bu postda aytmoqchi boʻlgan eng muhim narsa bu mijozingiz qaysi turga mansubligini aniqlang, ular sizdan qayta sotib oluvchilarmi yoki birinchi marta sotib oluvchilarmi? Sizga koʻp foyda olib kelayotgan tarafga koʻproq fokus qarating.

Aytgancha, agar biznes yangi boʻlsa albatta foydani sizga yangi sotib oluvchilar keltiradi, lekin bu koʻrsatkichga aldanib qolmang. Aytganimdek balki sizdan olib turgan mijoz avval raqobatchingizdan harid qilgandir. Bunda ham mijoz tarafidan bu qayta harid hisoblanadi.

Ayniqsa infobiznesda qayta sotuvlar eng muhim daromad manbai hisoblanadi.

📿 Qisqa qilsak aksariyat bizneslarda mijozlar ikki uchi ulangan ip kabi harakatlanadi, yaʼni siz aslida sizniki kabi mahsulotni isteʼmol qilgan odamga sotasiz. Demak taklifingizni ham shunga mos tarzda ishlab chiqing.

Marketing agentliklari misolida koʻrsak biz uchratadigan reklamalarni koʻpchiligi mana bunday boshlanadi "lidlaringiz koʻp lekin sotuvlar kammi?" Bu aynan oʻsha ikki uchi ulangan ipdagi mijozlarga qaratilgan reklama.

Analitika bu biznes uchun eng muhim jarayon.

@marketerbilan

Reklamalaringizning pul keltirishi 90% holatda toʻgʻri auditoriya tanlashingizga bogʻliq

Biznes egasi tarafidan targetologga boʻladigan eng katta eʼtiroz "auditoriyayni yaxshi tanlay olmading", lekin sizni ishontirib aytamanki bu reklamadagi eng koʻp uchraydigan notoʻgʻri yondashuv.

Aslida auditoriya target sozlamarida emas reklama kreativi yaratilish bosqichida tanlanadi. Siz kreativda aytayotgan gapingizni oʻzida toʻgʻri auditoriya tanlay olishingiz kerak.

Agar reklama kreativini toʻgʻri qilgan boʻlsangiz, targeting bosqichida auditoriya haqida bosh qotirib oʻtirishingiz shart emas. Aslida ham sozlamalardan muammo qidiradigan biznes, yoki juda kichik va hech nimani tushunmaydi yoki katta boʻlsa ham hech nimani tushunmaydi.

Aslida muammo biznes egasida emas, u yollayotgan mutaxassis targetolog ishini toʻgʻri bajarsa, kreativ haqida ham toʻgʻri "ТЗ" bera olishi kerak. Aynan shuni tushunadigan targetolog va SMM menejerlar bozorimiz uchun eng kamyob hodisa.

Hozirgi bizneslar oldida ikki mashaqqatli ish bor
1. Avval qilmaganlarini qilib koʻrish
2. Shu ishni toʻgʻri qila oladigan mutaxassis topish

@marketerbilan

Mijoz koʻpaygani sari koʻproq pul yoʻqotayotgan boʻlishingiz mumkin

Koʻp bizneslar narx belgilash, reklama byudjeti va mijoz jalb qilish strategiyalarini bozorga qarab qilishadi. "Odamlar qimmat deb oʻylamasin", "Raqobatchim shuncha qoʻyibdi, manam shunaqa qilaman". Bu yoʻl biznesga qanaqa taʼsir qilayotganini Unit economics koʻrsatadi.

Agar Unit economics yaxshi boʻlmasa biznes mijoz koʻpaygani sari pul yoʻqotadi

Unit Economics nima? (Oddiy tilda)

Tasavvur qiling, siz tozalash xizmati ko‘rsatasiz. Har bir mijozdan $150 tushum olasiz. Lekin shu mijozni jalb qilish uchun $50 reklama xarajati qildingiz, xizmat koʻrsatish xarajatlari esa $30 bo‘lsa, sizning sof foydangiz qancha?

- Tushum: $150
- Mijoz jalb qilish xarajati (CAC): $50
- Xizmat ko‘rsatish xarajati (Variable Costs): $30

Unit Economics = $150 - ($50 + $30) = $70
Demak, har bir mijoz sizga $70 foyda keltiradi

Unit Economics qanday ishlaydi?

Bu tushuncha biznesni ikki asosiy savolga javob berish orqali boshqarishga yordam beradi:

1. Siz mijozni jalb qilish uchun qancha pul sarflayapsiz? (CAC)
2. U mijoz sizga qancha daromad olib keladi? (LTV)

- Agar LTV > 3 × CAC bo‘lsa, biznesingiz foydali va o‘sishda davom etadi.
- Agar LTV < CAC bo‘lsa, biznes zarar ko‘rayapti!

Keling hayoliy biznes misolida koʻrib chiqamiz

Siz tozalash xizmatini koʻrsatasiz va mendan unit economicsʼni hisoblashni soʻradingiz, men ishni qanday olib borgan boʻlardim?

1. Bitta mijozdan keladigan oʻrtacha tushumni hisoblayman (ARPU)

ARPU = Umumiy kirib kelgan summa / mijozlar soni

Siz bitta mijozga bir oyda bir marta $150 evaziga xizmat koʻrsatasiz, demak sizda ARPU = $150

2. Yangi mijoz jalb qilish uchun ketgan harajat (CAC)

CAC = Marketing + sotuv xarajatlari / yangi mijozlar soni

- Biznes bir oyda reklama va sotuv xarajatlari uchun $5000 sarflaydi va 100 ta yangi mijoz jalb qiladi

CAC = $5000 / 100 = $50

3. Mijoz umri davomida biznesga qancha daromad keltiradi? (LTV)

LTV = ARPU x Retention(qayta harid)

Bizdagi maʼlumotga koʻra har bir mijoz bir oyda bir marta $150 qiymatida xizmatimizdan foydalanadi. Oʻrtacha mijoz bizdan 6 oy davomida xizmat sotib oladi.

LTV = $150 x 6 = $900

4. Oʻzgaruvchan xarajatlarni hisoblash (VC)

Bir mijoz uchun xizmat koʻrsatish va operatsion harajatlarni hisoblab chiqishimiz kerak. Xodimlar oyligi, ketadigan yoqilgʻi va shu kabi boshqa harajatlar $30 ni tashkil qiladi.

Demak (VC) oʻzgaruvchan xarajatlar = $30

5. Unit economicsʼni hisoblaymiz

Unit economics = (ARPU - CAC) x Retention - Oʻzgaruvchan xarajatlar

Bizni misolga koʻra bu koʻrsatkich mana bundan boʻladi:

Unit economics = ($150 - $50) x 6 - $30 = $570

Har bir mijoz biznesga sof foyda sifatida $570 keltiryapti.

6. Unit economics yaxshi ishlayaptimi yoʻqmi aniqlash uchun LTV ni CAC ga nisbatini koʻrish kerak

Agar LTV / CAC > 3 boʻlsa unda biznes yaxshi ishlayapti va foydada deyish mumkin, LTV / CAC < 1 boʻlsa unda siz har bir mijozdan ziyon koʻryapsiz.

Bizni misolga koʻra:

$900 / $50 = 18 > 3
Demak bizni tozalash biznesimiz ideal ishlayapti. Biz yana oʻrtacha chekni oshirish orqali bu koʻrsatkichni yaxshilashimiz mumkin.

Unit Economics sizga nima beradi?

3. Narx siyosatini to‘g‘ri belgilash
– xizmat yoki mahsulot narxi biznesga zarar keltirmasligiga ishonch hosil qilasiz.
2. Marketing budjetini optimallashtirish – mijoz jalb qilish xarajatini tushunib, eng samarali usullarni tanlaysiz.
3. Mijoz sodiqligini oshirish
– mavjud mijozlarning LTV’sini oshirish biznesingizni ortiqcha harajatsiz foyda olishiga yordam beradi.

Qisqartirib yozishga harakat qildim, baribir koʻpayib ketdi. Umid qilamanki bu siz uchun foydali boʻladi.

Unit Economics orqali biznesingiz foydalimi yoki yo‘qligini tekshirib ko‘rganmisiz?

@marketerbilan

Lid arzonligi biznesga qimmat tushishini koʻrsatib beraman

Yaqinda bir natijaga koʻzim tushib qoldi. Bir biznes uchun $0.05 Dan 3000+ lid olinganini yozishgan. CPL arzon, zoʻr natija albatta.

Agar siz faqat mutaxassis sifatida qarasangiz bu natijadan quvonib oʻzingizni maqtab yuraverasiz, yangi loyiha olayotgan paytda maqtanib koʻrsatasiz.

Lekin keling endi jiddiyroq kirishamiz.

Oʻrtacha sotuv boʻlimida xodimlar soni 5 ta boʻladi. Oʻrtacha bitta lid bilan gaplashish vaqtini 5 daqiqa deb olamiz.

3000 x 5 = 15,000 daqiqa = 250 soat = 10 kun

Biznes 3000 ta lid bilan ishlash uchun 10 kun vaqtni sarflayapti. Biznes koʻrsatkichlariga koʻra konversiya 1% edi. Bu esa 10 kunda 30 ta sotuv degani.

Sotuv boʻlimi rahbari boʻlib ishlaganim uchun bilamanki operatorlar har bir qoʻngʻiroqdan keyin mental charchash darajasi oshib boradi va natijaviylik tushib ketadi. Yaʼni qancha koʻp qoʻngʻiroq, shuncha koʻp yoʻqotishlar.

Biz marketolog sifatida varonkani kuchaytirish va lidlarni sifatli qilish orqali oʻsha sarflangan $160 ga 3000 ta lid emas 800 ta lid olaylik va sifatli lid hisobiga 30 ta emas 50 ta sotaylik.

Bu bir tarafdan operatorlar unumdorligini oshirganligi uchun sotuvni ham oshiradi, ikkinchi tarafdan 4 karra vaqtdan yutish degani yana 4 karra ish unumdorligini oshirish degani.

Biznes koʻp lid deb koʻzi quvnab 100 ming oylik daromad koʻrsa, lidlarni sifatli qilish orqali 400 ming oylik daromad qilishni boshlaydi.

Bu nafaqat daromadda oʻz taʼsirini koʻrsatadi, balki xodimlar kayfiyati va jamoaviy muhitga ham ijobiy taʼsir oʻtkazadi.

Agar sotuv boʻlimi bilan yaxshi ishlansa profitni ham yana oshirish mumkin.

Demak arzon lid hursand qiluvchi faktor emasligini isbotlab berdim deb oʻylayman. Oʻzim loyihalarimga beradigan tavsiyalarim bilan boʻlishdim.

CPL bilan bir vaqtda CAC ni muntazam kuzatib boring. Shunda yolgʻonchi raqamlarga aldanib qolmaysiz.

@marketerbilsn

Qimmat sotish yoki qoʻshimcha qiymat sotish?

Qisqa qilib aytsam, bu postda oʻrtacha chekni oshirish orqali koʻp pul topish haqida gaplashamiz.

Qimmat sotish har doim ham oson emas, ayniqsa yangi soha egalari uchun bu anchagina qiyin narsa. Lekin bu degani ular koʻp pul topa olmaydi degani emas.

Toʻgʻrisini aytsam men qimmat sotish tarafdori ham emasman, men koʻproq arzon sotib keyin "up-sell" orqali daromadni oshiraman.

Bu sistema qanday ishlaydi?

Menda anchagina arzon va foydali boʻlgan bir nechta xizmat turlari bor. Ular asosan texnik ishlarga asoslangan. Yangi bizneslar menga koʻproq aynan shu xizmatlarimni sotib olish uchun kelishadi.

Albatta arzon narsani sotish ancha oson kechadi va ishni boshlaymiz. Hammasi shunday keyin boshlanadi. Birinchi navbatda sotuv boʻlimiga yaqinroq boʻlishni boshlayman, ichki dasturlarga ham ishimni yaxshilash uchun deb "доступ" olaman.

Muammolarni yaxshilab oʻrganib chiqaman va ularni qanday qilib vahimali qilib yetkazish mumkinligi ustida ssenariylar ishlab chiqaman. "Keyin shu muammoni koʻrsatib, yechib beraman deb pul olasiz" deb oʻylayotgan boʻlsangiz adashasiz, eng qizigʻi shu yerdan boshlanadi.

Men muammoni koʻrsatmayman, muammoni ularni oʻzlari topishadi

Aytaylik muammo CRM yaxshi analitikani notoʻgʻri koʻrsatyapti, chunki raqamlar sotuvchilar tomonidan toʻgʻri yuritilmagan. Men sotuv boʻlimi rahbaridan analitikani soʻrayman, taqdim qilingan raqamlar xatoligini, reallikka toʻgʻri kelmasligini aytaman.

Asta sekin ichkariga chuqurlashaman va hamma muammoni endi koʻrayotgandek, avval nimaga sizlar koʻrmagansiz deya ochishni boshlayman. Shunday qilib ularda sarosima yuzaga keladi va men kecha kelib bir yildan beri ishlayotgan odamdan koʻra samaraliroq ekanligimni oʻylashni boshlashadi.

Qarabsizki endi u muammolarni yechish uchun eng yaxshi nomzod bu sizsiz. Chunki endi ular sizni mutaxassis ekanligingizga hech qanday shubha qilishmaydi.

Mana shu narsa kompaniyaga koʻproq foyda keltira olishingizni koʻrsatish orqali koʻproq pul topish, oʻrtacha chekni oshirish deyiladi. Siz esa hali ham qimmat sotaman deb yuribsiz.

Aytgancha mening yoʻlim qiyinroq albatta, chunki bu texnikani qoʻllash uchun siz chuqur fundamental marketing va sotuv bilimlariga ega boʻlishingiz, biznesni yaxshi tushunishingiz va odamlar bilan ishlashda tajribangiz boʻlishi kerak. Aytmoqchimanki agar siz chuqur bilimli boʻlmasangiz va faqat texnik hodim boʻlsangiz unda bu "приём"ingiz oʻtmaydi.

@marketerbilan

Men ko'pincha mutaxassislar davrasida bo'laman, hamma marketolog, targetolgo va soha egalari

Mendan tavsiya olish yoki konsultatsiya olish uchun ham faqat mutaxasisslar keladi. Ular menga dardini to'kib sochadi, biznes egasi ularni tushunmayotgani, biznes egasi qanchalik ahmoq ekanligi kabi muammolar.

Lekin oxirgi payt ko'proq biznes egalari bilan gaplashyapman va men ko'rgan narsa biznes egalari ahmoq emas, ular hammasini bilishadi lekin ko'pincha yo'l qo'yiladigan muammo bu kelishuvda. Kelishuvda tushunarsiz tomonlar qolib ketadi va kelishmovchiliklarga tayyor turing.

- CPL ko'rsatkichi va bozor nisbati
- CAC holati qanday?
- ROAS, ROMI va ROI ko'rsatkichlari
- Unit economica va narx belgilash

Yuqoridagi ko'rsatkichlar juda muhim, lekin men ko'p uchratgan narsa marketologlar bu ko'rsatkichlarni biznes egasi bilmasligidan foydalanib shunchaki narx oshirish va aqilli ko'rinish uchun ishlatayotgandek (hamma emas).

Biznesmenga raqamlarni ko'rsatish kerak, nima bo'lishidan qat'iy nazar. Hech bo'lmasa o'zingizdan majburiyatni soqit qilish uchun.

Sizda mijoz bilan qanday tajriba bo'lgan?

@marketerbilan

Instagramda trend tarqaldi: qachon biz ham shunaqa reels chiqaramiz?

TikTok yoki Instagramda tarqalgan trendlardan foydalanish qanchalik foydali? Nimalarga e’tibor berish kerak? Quyida trendlardan foydalanish boʻyicha tavsiyalar berib oʻtaman.

1. Trendning aktual davri

Avvalo, trendning yashovchanlik davrini aniqlash muhim. Odatda bu vaqt 5 kundan 10 kungacha bo‘ladi, keyin esa trend sekin-asta so‘nishni boshlaydi. Demak, trendni iloji boricha erta payqash va imkon qadar tezroq foydalanish kerak.

2. Biznesga moslik va adaptatsiya

Hamma trendlar ham siz ishlayotgan biznesga mos kelmaydi. Misol uchun, "ichidan odam chiqib keladigan" shkaf sotadigan mebel brendidan hech nima olmagan boʻlardim. Shuning uchun quyidagi savollarga javob bering:

- Auditoriya qadriyatlariga trend qanchalik mos keladi?
- Trendda biznesingiz uslubi yoki TOV (tone of voice)ga mos tushmaydigan detallar yoʻqmi?
- Bu trendni qancha vaqt ichida realizatsiya qilish mumkin?

Trend ekan deb hamma narsani ko‘r-ko‘rona qo‘llamang. Agar trendga yangi tus bersangiz, siz o‘zingizning “mini-trend”ingizni yaratasiz va bu sizga har tomonlama foyda keltirishi mumkin.

3. Trend eskirdi degani — tugadi degani emas

Ko‘pincha trend bir necha kundan keyin odamlarni zeriktirishni boshlaydi. Ammo bu umuman foydalanmaslik kerak, degani emas. Trendni qayta jonlantirish uchun kichik o‘zgarishlar kiriting:

- Agar videoda doim bir xil personaj qatnashgan bo‘lsa, uni o‘zgartiring yoki voqeani boshqa rakursdan ko‘rsating.
- Yangi detallar qo‘shing: Rekvizitlar, fon musiqasi yoki kulgili sahnalar orqali trendni boyitish mumkin.

Shu tariqa, eskirgan trend yana qiziqarli ko‘rinish oladi va ko‘proq “layk”lar to‘plashi ehtimoli oshadi.

Bu mavzu haqida darslik tayyorlasa ham boʻladi, ancha bahsli va savolli mavzu.

❤‍🔥 Reaksiya bosish va postni trendchilarga yuborib qoʻyish yoddan chiqmasin.

@marketerbilan

2025-yilda nimalarni gapirish mumkinu, nimani gapirish mumkin emas?

Sarlavhalar haqida gaplashamiz

Odamlar har doim yangi narsalarga qiziqishadi. Masalan, har yili "siyqasi chiqqan" iPhone modelini ham sotib olishga undovchi narsa bu — psixologiyamiz.

2025-yil uchun ham kontentlaringizni shuni inobatga olgan holda yarating. Odamlar o‘z davriga mos va dolzarb mavzularga qiziqishadi.

Sarlavha yoki hook tanlashda qanday yondashish kerak?

1. Dolzarblikni koʻrsatish

Sarlavhalarda "2025-yil" kabi sanalarni ishlating. Bu mavzuning yangiligini va dolzarbligini koʻrsatadi. Masalan:

❌ "Qanday qilib $🍋 ishlab topsa bo‘ladi?"
✅ "2025-yilda $🍋 ishlab topish uchun nimalar qilish kerak?"

Ikkala nom bir xil mavzuni yoritadi, lekin "2025-yil" urg‘usi kontentni qiziqarliroq qiladi. Yangi yilda odamlar aynan shu davrda nima qilish kerakligi haqida bilishni xohlashadi.

2. Raqamlar haqida gapiring, lekin maydalashmang

Raqamlar e’tiborni tortadi, lekin ularni haddan tashqari maydalash kuzatuvchilarni charchatadi. Foydalanuvchilarga oddiy va konkret ma’lumotlar kerak.

✅ "7 millionlik savdo qilish uchun 3 hafta sarfladik."
❌ "7 millionlik savdo qilish uchun 3 hafta davomida 24 kishilik jamoamiz kuniga 14 soatdan ishladi."

Bir qarashda ikkinchi sarlavha batafsilroq ko‘rinadi, lekin unda keraksiz tafsilotlar mavjud. Oddiy va aniqlikni saqlash muhim.

3. Og‘riq haqida gapiring, lekin original bo‘ling

Auditoriyani jalb qilish uchun og‘riqli nuqtalarni yoritish kerak, lekin "reklama shabloni"dek ko‘rinadigan iboralardan qoching. Foydalanuvchilar shablonlardan charchagan, ularga yangi va original yondashuv qiziq.

✅ "Sotuv kamligiga odamlarda pul yo‘qligi sababchi emas."
❌ "Biznesingizda sotuvlar bo‘lmayaptimi?"

Birinchi variant original va odamlarning e’tiborini tortadigan qiziqarli gap bilan boshlanadi. Ikkinchi sarlavha esa odatiy reklamaga o‘xshab qoladi.

@marketerbilan

Targetda sizdan ko'p pul tikkan raqobatchini yengishni faqat bitta yo'li bor

Reklama kreativi — bu hamma narsa. Jamoam bilan doim takrorlayman, chunki kreativsiz reklama ishlamaydi. Ha, sozlamalarni to'g'ri qilish ham san'at, lekin ko'pchilik shuni ham to'g'ri qilolmaydi.

Endi qanday qilib yuqori byudjetli raqobtchini yutib chiqish haqida gapiraman

Facebook faqat byudjetga qarab emas, balki quyidagi uch omilga qarab reklama ko‘rsatadi:

1. Byudjet (bid): Siz reklama uchun qancha pul tikdingiz?
2. Reklama sifati (ad quality): Reklama dolzarbligi va qiziqarliligi. Facebook 1 dan 10 gacha baholaydi.
3. Kutilayotgan natija (Estimated Action Rate)
: Sizning reklamangiz odamlarni qanchalik jalb qiladi?

Aytaylik siz reklamaga $5 sarflayapsiz, raqobatchingiz esa $8.

Agar reklama faqat pulga qarab belgilanganda kichik bizneslar va byudjeti kam bo'lganlar hech nima qila olmay qolishardi, shuning uchun ham facebook faqat pulga emas reklama sifati va kreativ keltiruvchi tahminiy natijaga qarab qaysi reklamani ko'rsatishni tanlab oladi.

Yuqorida aytilganidek siz reklamaga $5 tikdingiz, raqib esa $8. Bundan keyin siz berayotgan reklama kreativi sifatiga e'tibor qaratiladi.

Reklama kreativi sizda yaxshiroq qilingan bo'lsa unda sizga 6 ball raqibga esa 4 ball qo'yadi. Keyin esa reklama berishi mumkin bo'lgan tahminiy natija hisoblanadi. Sizni reklamangiz facebook hisob kitoblariga ko'ra yaxshiroq natija bersa unda yana sizga 7 ball raqibga esa 5 ball beradi.

Reklama mana shu 3 bosqichda baholanadi va qaysi biri yaxshiroqligi aniqlanadi.

Keling hisoblaymiz

Furmula: Umumiy ball = (bid) x (ad quality) x (Estimated Action Rate)

Bizdagi misolga ko'ra sizda

($5) * (6) * (7) = 210

Raqobatchingizda

($8) * (4) * (5) = 160

Ko'rinib turibdiki siz 50 ballga oldinlab ketdingiz va sizni reklamangiz auktsionda yutib chiqdi, demak sizni reklamangiz ko'proq ko'rsatiladi.

Facebook shunchaki ko‘proq pul taklif qilgan reklama emas, balki odamlar ko‘rishni xohlagan va bosishga tayyor bo‘lgan reklamani ustun qo‘yadi! 😊

Kreativ bilan shug'illanuvchilar shuning uchun ham kerak.

Aytgancha byudjet muhimmas ekan deb o'ylamang, byudjet har doim muhim, lekin agar kreativ yaxshi bo'lmasa unda u kulga aylanadi.

Qiziq bo'lgan bo'lsa ❤️‍🔥 reaksiya bosing, shunaqa aniq postlar chiqarishim uchun motivatsiya bo'ladi.

@marketerbilan