Minor.uz

Маконнинг дуо қабул бўлишига сабаб бўлиши

Жобир розияллоҳу анҳу дейдики: «Жаноб Расулуллоҳ Макка фатҳ этилганда Масжид Ҳарамда душанба куни ва чоршанба дуо қилдилар ва икки намоз орасида қилинган дуо қабул бўлишига гувоҳ бўлдим. Мен ҳам бошимга бир қийинчилик тушганида худди Расулуллоҳ дуо қилган соатда дуо қилдим ва дуом Аллоҳнинг лутф-карами ила қабул бўлди» (Табароний ривояти). Расулуллоҳ алайҳиссалом марҳамат қилдилар: «Рукн ила мақом ораси мултазамдир. Ҳажарул Асвад билан Каъба эшиги орасидир». «Уч жой бордирки, у жойларда қилинган
дуолар рад этилмайди:
1. Бир кимсанинг Аллоҳдан бошқа уни кўрадиган ҳеч ким бўлмаган танҳо бир жойда қилган дуоси.
2. Бир гуруҳ одам билан душман қаршисида қилинган дуо.
3. Тун ярмида туриб қилинган дуо». Бу уч жойда қилинган дуонинг рад этилмаслиги таъкидланмоқда, буни Аллоҳнинг Расули хабар бермоқдалар. Инчунун, қийматли жой ва вақтлар дуонинг қабул бўлмоғи учун катта фурсатдир.

"Қарғишдан сақланинг" китобидан.
@minormasjidiuz

Бошга қийинчилик ва мусибат тушган пайтда қалб махлуқотга боғланиб қолади. Аллоҳ таоло бундай пайтларда нафс ғолиб келмаслиги учун «Ҳасбуналлоҳ ва ниъмал вакийл» (Аллоҳнинг Ўзи бизга кифоя қилади, у нақадар яхши вакил) дейишни шариатга киритган. Акс ҳолда инсоннинг қалби мусибат пайтида Холиқдан бурилиб, махлуққа боғланиб қолади. Афсуски, ўша махлуқ унга на ёрдам беради, на бошқара олади.

«Саодатга етакловчи ҳикматлар» китобидан.
@minormasjidiuz

Ҳаромни инкор қилган одам кофир бўлади

Гуноҳ уч турда бўлади:
1. Намоз, рўза, закот сингари фарзларни тарк этиш. Бунинг азобидан қутилиш учун ўлим сизни йўқламасидан қазосини адо этинг.
2. Аллоҳ азза ва жалланинг ҳақига доир гуноҳлар: ичкилик ичиш, қимор ўйнаш. Ундан халос бўлиш учун вақтни ўтказмасдан тавба қилиш даркор.
3. Бандасининг ҳақига хиёнат қилиш энг оғир гуноҳ. Ундан қутилиш учун мўмин киши тезроқ тавба қилиб, ўша кимсани рози қилмоғи даркор. Акс ҳолда Аллоҳнинг қаҳрига йўлиқади. Гуноҳлар юки устида эзилиб, умидсизликка тушиш оғир фалокатдир. Шаръий истилоҳда қатъий, ҳеч шубҳасиз, очиқ-ойдин далиллар билан бажарилиши таъқиқланган, уни бажармаслик қаттиқ талаб қилинган, уни юмшатадиган бирор далил келмаган амал ҳаромдир. Бунга Аллоҳга ширк келтириш, ота-онага оқ бўлиш, зино, ўғрилик, сеҳргарлик қилиш, фолбинга ишониш, маст қилувчи ичимликлар ичиш, туҳмат, ғийбат, бировнинг ҳақини ейиш, ожизалар авратини очиб юриши мисол бўлади. Мусулмон банда ҳаромдан, гуноҳдан йироқ бўлиши, ундан ҳазар қилиши фарздир. Ҳар қандай соф табиатли инсон ҳаром нарсалардан жирканиши табиий ҳолат. Фақат моддият кўзи билан кўрувчи қалб кўзи сўқир бўлганларгина ҳаром нарсалар билан лаззатланишни инсон ҳуқуқларининг тўлиқ таъминланиши, дея даъво қиладилар. Ҳаром ишни қилган кимса гуноҳкор бўлади. Икки дунё азобига учрайди. Уни тарк этган киши эса Аллоҳнинг амрига итоат этгани сабабли савобга эришади. Ҳаром маъносида "маъсият” ва "гуноҳ" сўзлари ҳам ишлатилади. Ҳаромни инкор қилган одам кофир бўлади. Асли ҳалол бўлган нарсаларга ҳаром йўл билан эришиш ҳам гуноҳ. Масалан, покиза, ширин таомдан меъёрида истеъмол қилиш ҳалол. Аммо ўша покиза таомни ўғирлаб ейиш ҳаром. Бунинг акси ўлароқ асли ҳаром бўлган нарсани ҳалол йўл билан топгани билан у ҳалол бўлиб қолмайди. Мўмин киши ҳаромнинг бир луқмасидан ҳам ҳазар қилиши лозим. Ҳадиси шарифларда ҳаром луқма еган кимсанинг қирқ кун ибодати қабул бўлмаслиги, ҳаром еб ўсган эт жаннатга кирмаслиги ҳақида огоҳлантиришлар келган.

"Обидлар йўли" китобидан.
@minormasjidiuz

Шайтон йўлдан уриши мумкинми?

Шайтон ҳукмини ўзига ўхшаганларга ўтказади, дейди Аллоҳ. Биров бошқага ҳукмини ўтказиши учун икки томон бир-бирига ўхшаши ва ҳамжинс бўлиши керак. Гапимиз далили:
"Инс ва жин шайтонларнинг баъзилари баъзиларини ғурурга кетказишлари учун латиф каломларни танларлар"
(Анъом сураси, 112-оят).

Шайтон ўзига ўхшаган шайтонларни бошқаради. Чунки ўхшашлик ҳукми билангина таъсирланиш ва боғлиқлик юзага келади. Аммо Аллоҳга бандалик қиладиган инсонлар томон шайтонга йўл йўқдир.

Аллоҳ иблисга айтади: "Албатта, Менинг бандаларим устида сенинг ҳукмронлигинг йўқдир" (Ҳижр сураси, 42-оят).Демак, "Мени шайтон йўлдан урди" деганнинг далил-ҳужжати йўқ. Биз ундай инсонга: "Чунки сен ўзинг унга ўхшаган шайтонсан!", деб жавоб берамиз.

Доктор Мустафо Маҳмуд
@minormasjidi

​​— Миллион долларсиз яшамоқ мумкинми?
— Мумкин.
— Юз, ўн, ҳатто бир долларинг бўлмаса-чи?
— Яшамоқ мумкин. Ризқни Тангри беради. Кишининг тирик юриши учун кунда бир кесим нон кифоя. Оғир кунларда одамлар шундай яшашган. Одам нима учун таомланади? Ўлиб қолмаслик, ҳаракатдан тўхтамаслик учун. Бунинг учун катта бойлик шарт эмас.
— Шон-шуҳратсиз яшамоқ мумкинми?
— Одамлар яшашяпти-ку? Нега мумкин эмас экан?
— Юқори мансабсиз-чи?
— Одамларнинг барчаси мансабдор эмас-ку?
— Амалинг бўлмаса, бойлигинг бўлмаса, шон-шуҳратинг бўлмаса, тўй-ҳашамларда сенга пойгакдан жой тегади.
— Демак, улар Одамни эмас, амал ва бойликни тўйга чорлашган экан. Пойгакда ўтиришдан афсус чекмаслик керак. Чунки ўша тўрдагилар ҳадемай пойгакка тушадилар.
— Хўш, бойликсиз, амалсиз, шуҳратсиз яшамоқ мумкин экан. Нимасиз яшамоқ мумкин эмас?
— Иймонсиз. Иймон билан яшаётган киши Аллоҳнинг ҳузурида энг бой, энг шуҳратли кишидир. Тангри ҳузуридаги дастурхон тўри ҳам иймон эгалариники бўлади. Дунёвий бойлик, мансаб, шуҳрат хиёнаткордирлар. Иймон бойлиги эса садоқатлидир. Бу дунёда ташвишли ёки қувончли кунларда ҳам ёлғиз қўймайди. У дунёда эса ўзингга кўшк бўлиб хизмат қилади.

«Меҳмон туйғулар» китобидан.
@minormasjidiuz