(Бир ҳадис шарҳи.
Албатта ўқинг!)
Анас ибн Молик розияллоҳу анҳудан ривоят қилинади:
«Набий саллолоҳу алайҳи вассалам:«Аллоҳ азза ва жалла :« Албатта умматнинг «Бу нима , бу нима?» дейишида давом эта бориб , ҳатто Аллоҳ ҳалойиқни ҳалқ қилди , бас , Аллоҳни ким ҳалқ қилди?» ҳам дейдилар», дер» , дедилар».
Абдуллоҳ розияллоҳу анҳудан ривоят қилинади:« Расулоллоҳ саллолоҳу алайҳи вассаламга васваса ҳақида савол берилди.«У айни иймондир» , дедилар.
Муслим ривояти.
Ушбу ҳадиси шарифнинг маъноси , бошқача қилиб айтганимизда «Васваса айни иймондир» бўлади.Бу қанақаси? Ахир васваса шайтондан , иймон Раҳмондан -- ку! Васваса иймоннинг кушандасику! У қандоқ қилиб айни иймон бўлиши мумкин? Бу гап олов сувдир деганга ўхшамайдими?
Ушбу ҳадиси шариф билан дастлаб танишган одамда шунга ўхшаш саволлар пайдо бўлиши мумкин. Аммо , каминада бу саволлар пайдо бўлмади.Чунки , ушбу сатрлар ёзилишидан йигирма бир йил олдин ўтган тажриба бу маънони тушунишга ёрдам беради.Умумжаҳон , Исломга чақириш куллиясига янги ўқишга келган пайтим эди.Бирдан қалбга васваса тушиб , бўлмағур фикрлар хаёлга ўралашиб қолди.Дунё кўзимга тор кўриниб , ҳеч нарса татимайди.Бировга айтишнинг иложи ҳам йўқ.Бу холат бир неча кун давом этди.Сиқилиш , ташвиш юқори чўққисига етди.
Ана шундай оғир дамда кўзим Ҳаким Термизийнинг араб тилидаги «Муридлар одоби» китобига тушди.Муаллифи Термизий бўлгани учун , ўз ватандошимиз экан , деб китоб дўконидан ҳарид қилувдим.Китобни қўлга олдим.Тўғри келган жойини очиб ўқий бошладим.Васваса ҳақида гап борар эди.« Мурид қалбига васваса тушса , яхшилик аломати , деб билсин.Чунки шайтон уни йўқлаб қолибди.Одатда , шайтон обод бўлаётган қалбларни васваса қилишга уринади.Хароба қалблар шундоқ ҳам унинг мулки ҳисобланади , овора бўлиб уларни васваса қилиб ҳам ўтирмайди.Шайтон обод қалбларни хароба қилиш умидида уларга васваса қилади.Уриниб - уриниб , ниятига эриша олмагач , ташлаб кетади» , дейилган эди.
Қалбимга « ялт » этиб ёруғлик тушди.Ҳурсанд бўлиб кетдим.Ориз бўлган нарса васваса эканлигини тушундим.Унинг нима учун бўлаётганини ҳам англадим.
Мана бугун эса , Аллоҳга беадад шукрлар бўлсин , Пайғамбар саллолоҳу алайҳи вассаламнинг васваса ҳақида « У айни иймондир» , деб айтган ҳадисларини ҳеч қийинчиликсиз тушуниб турибман.
Демак , киши вақтида англаб етиб , Аллоҳ таолодан дарҳол паноҳ сўраса , қалбига тушган васваса унга зарар етказа олмас экан.Бу эса ақийдавий , руҳий-маънавий соғломлик учун ниҳоятда зарурдир.
Шайх Муҳаммад Содиқ Муҳаммад Юсуф.
(Ҳадис ва ҳаёт , 2 - жуз)
@Islom_nuri
