Ikrom Ruzimurodov | Sharhlovchi √

❗️ Sharhlovchilik va “Futbol TV” haqida gapiraman!

Sharhlovchi bo‘lish bu mening katta orzum! Bolalikdan televideniye sohasiga, shu jumladan jurnalistikaga va sharhlovchilikka qiziqishim juda baland bo‘lgan. Garchi nisbatan biroz kechroq futbolga qiziqish paydo bo‘lgan bo‘lsada Davron Fayziyev va Mirzahakim To‘xtamirzayevlarning sharhlarida futbol o‘yinlarini tomosha qilib, ham futbolga, ham sharhlovchilikka qiziqishim uyg‘ongan. Ayniqsa Davron Fayziyev mening chinakamiga kumirim bo‘lgan. Aynan ularning sharhlagan o‘yinalarini o‘zgacha ishtiyoq bilan tomosha qilganman. Flesh kartada yozib olib, kompyuterimga o‘tkazib qayta-qayta ushbu sharhlarni eshitib, keyin esa Davron akaga taqlid qilib xuddi ulardek sharhlashga harakat qilganlarim esimda. Balki shu boisdir keyinchalik ko‘pchilik mening ovozimni va gapirish uslubimni Davron Fayziyevga o‘xshatadigan bo‘lgan. Bu albatta juda quvonarli. Bu inson men uchun ustoz! G‘oyibona bo‘lsa ham ustoz… Biroq, sharhlovchilik borasida hozirgacha omadim yurishmadi, “ketmonim uchmadi”! Bir necha yillardan beri shu sohaning atrofidaman, umuman olganda jurnalistman, ammo hali to‘laqonli sharhlovchi emasman. Nega? Chunki, televideniye orqali menda hali sharhlovchi sifatida o‘yinlarni sharhlash imkoniyati bo‘lgani yo‘q.

O‘z vaqtida “Sport TV”da yarim yilcha yurganman. Imkoniyat berishmagan. Yaqinda sharhlovchilik bo‘yicha tanlov boshlanishi haqida aytishgandi, unga ham video roliklar tayyorlab yuborgandim. Tanish sharhlovchi do‘stlarimizning aytishicha ushbu tanlovning final bosqichiga meni ham loyiq ko‘rib tanlab olishgan. Loyiha boshlandi. Biroq, endi ma’lum bo‘lishicha meni uyerdan “chopib” yuborishibdi. Ana shu tanlov orqali bo‘lsa ham g‘olib bo‘lib, shundan keyin sharhga kirish imkoniyatim bo‘lar degandim. Afsuski, bu variant o‘xshamaydigan ko‘rinadi.
Yana bir afsuslanarli jihati bizda bundan boshqa futbol (sport) bo‘yicha telekanal mavjud emas. Shu bois ham boshqa variantimiz yo‘q. Yevro – 2024 – “Zo‘r TV”chi? Bilmadim, bu ham qiyin masala bo‘lsa kerak. Tag‘in ham nufuzli turnirda.

Lekin, bilasizmi, sharhlovchi sifatida potensialim anchayin yuqori ekanligiga, o‘zimni yaxshi saviyadagi sharhlovchi bo‘la olishimga shu qadar aminmanki, zero bu men uchun hayotimagi eng oliy orzu va maqsad hisoblanadi. Shuning uchun ham butun umr taniqli va sevimli sharhlovchi bo‘lish uchun o‘z ustimda ishlaganman. Ha, buni deyarli hech kim bilmaydi. Lekin, bilguvchi eng ulug‘ Zot bor! Umid qilamanki, tez fursatlarda g‘oyibdan albatta imkoniyat chirog‘i yonib qoladi. Chunki, o‘sha sevimli filmimizda aytilganidek “Agar inson biror nimani chin qalbdan niyat qilsa, butun koinot uni ana shu orzusiga yetkazish payida bo‘ladi. Hayotimizda ham xuddi filmlarimizdagi kabi oxirida hammasi yaxshi yakun topadi. Agarda yaxshi bo‘lmasa unda hali tugamagan bo‘ladi. Shunday ekan, filmning hali davomi bor, do‘stim…” Aminman!

Endi gapimning yakunida yana o‘sha mavzu “Futbol TV” haqida aytib ketsam. Bu hech qanday PR loyihasi yoki xalqni aldash, chalg‘itish uchun qilingan ish emasdi. Ushbu telekanalni ochmoqchi bo‘lgan shaxslar menga aloqaga chiqishdi. Hujjatlarini ko‘rsatishdi. Telekanal ochish bo‘yicha niyatlari jiddiy ekanligini, meni sharhlovchi sifatida ishga taklif qilishlarini aytishdi. Men buni e’lon qildim. Butun O‘zbekiston budan xabar topdi. “Internet portladi!” Biroq, hammasi ham ular o‘ylagandek oson ish bo‘lib chiqmadi. Qandaydir hujjatbozlik bilan bog‘liq ishlar va muammolar paydo bo‘ldi shekilli. Uyog‘i menga qorong‘u. O‘zim ham buni juda xohlagandim. Afsuski, hozircha mavhumlik. Ushbu telekanal endi ochiladimi yoki yo‘q buni bilmayman. Shunchaki, umid bildirib qola olaman, xolos. Yuqorida aytib o‘tganimdek, hali hammasi biz xohlaganimizdek pik cho‘qqisiga chiqqani yo‘q! Biz hali yangi marralarni zabt etamiz! Ishonaman! Filmning hali davomi bor…

👉 T.me/Ikrom_Ruzimurodov ☑️