Angren shahar ekologik partiyasi

Биз келажак учун жавобгармиз!

2019 йил 8 январь куни Ўзбекистон Экологик партияси таъсис этилди. Янги сиёсий кучнинг ташкил этилиши табиий равишда жамиятда бир қатор саволларни юзага келтирди: бу партия қанчалик зарур эди? У қандай мақсадлар йўлида ҳаракат қилади? Жамият ва атроф-муҳитга қандай ижобий таъсир кўрсатиши мумкин?

Ҳозирги кунда экологияга бўлган эътибор нафақат маҳаллий, балки глобал муаммолар сабаб тобора ошиб бормоқда. Атроф-муҳитдаги салбий ўзгаришлар, ҳавонинг ифлосланиши, чўлланиш, сув ресурсларининг камайиши, иқлим ўзгаришлари – буларнинг барчаси экологик муаммоларга жиддий ёндашиш зарурлигини кўрсатмоқда.

Бугунги кунда Ўзбекистон Экологик партияси республика миқёсида ўзининг бошланғич партия ташкилотларини шакллантириб, ҳам сиёсий, ҳам ижтимоий куч сифатида фаолият юритмоқда. Жумладан, Ангрен шаҳар партия ташкилоти 2022 йилда белгиланган дастурий вазифаларни амалга ошириш мақсадида қатор ташкилий-ҳуқуқий ва назорат-таҳлил ишларини олиб бормоқда.

Шаҳарда экологик муҳит ҳолатини аниқлаш, экологик муаммоларни камайтириш, "Яшил макон" лойиҳаси доирасида кўкаламзорлаштириш ишларини амалга ошириш, шунингдек, ушбу жараёнларнинг ижросини назорат қилиш бўйича давлат органлари, тадбиркорлик субъектлари ва маҳаллий ўзини ўзи бошқариш органлари билан самарали ҳамкорлик йўлга қўйилди.

"Яшил макон" лойиҳаси ва мониторинг жараёнлари

2022 йил 2 февраль куни Ўзбекистон Республикаси Президенти раҳбарлигида ўтказилган видеоселектор йиғилишида "Чиқиндилар билан ишлаш тизимини такомиллаштириш ва ҳудудларда экологик ҳолатни яхшилаш" ҳамда "Яшил макон" умуммиллий лойиҳасини амалга ошириш бўйича устувор вазифалар белгилаб берилди.

Бу лойиҳа доирасида 12–30 сентябрь кунлари барча туман ва шаҳарларда экилган кўчат ва дарахтларнинг ҳолатини ўрганиш мақсадида уч ҳафталик мониторинг ўтказилиши белгиланди. Мониторинг қуйидаги ҳудудларни қамраб олди:

1. Ободонлаштириш бўлимлари томонидан бириктирилган жойлар


2. Молия, ғазначилик ва солиқ органларига тегишли ҳудудлар


3. Маданият ва истироҳат боғлари


4. Меҳнат бандлик бошқармасига тегишли ҳудудлар


5. Пенсия жамғармаси бўлимлари ҳудудлари


6. Қишлоқ ва сув хўжалиги объектлари


7. Банк филиалларига бириктирилган жойлар



Бу жойларда экилган кўчатларнинг ҳолати, уларнинг суғорилиши, парвариши ва шикастланишининг олдини олиш борасида назорат ишлари олиб борилди. Шунингдек, мониторинг жараёнларида аниқланган муаммолар ва таклифлар бўйича расмий ҳужжатлар ва фотоматериаллар асосида тегишли чора-тадбирлар белгиланди.

Экологик онг ва жавобгарлик – ҳар бир фуқаронинг бурчи

Ҳар бир инсон яшаб турган муҳити тозалиги ва ҳаво мусаффолигига ўз ҳиссасини қўшиши лозим. Чунки табиат – бу бизнинг уйимиз. Агар бизнинг ёндашувимиз масъулиятли бўлмаса, атроф-муҳитга етказиладиган зарар ҳам айнан бизга таъсир қилади.

Шу боис, Экологик партия аҳоли ўртасида экологик маданиятни юксалтириш, кўкаламзорлаштириш ишларини кенгайтириш ва чиқиндиларни қайта ишлаш тизимини такомиллаштириш каби йўналишларда ўз фаолиятини янада кучайтириб бормоқда. Агар мамлакатимизнинг барча ҳудудларида мана шундай ҳамжиҳатлик ва фаоллик кузатилса, биз экологик муаммолардан тезроқ қутула оламиз.

Ойбек Нурхонович
Ўзбекистон Экологик партияси
Ангрен шаҳар партия ташкилоти
Кенгаши раиси