Abdulqodir Samarqandiy

МОТАМ
Ибн Абдил Барр ва Абу Нуъайм роҳимаҳумаллоҳ ўзларининг ҳадис тўпламларида келтиришади:
“Саҳобалардан Башир ал-Ғифорий розияллоҳу анҳу доим Набий саллоллоҳу алайҳи ва салламнинг мажлисларида ўтирар эди. Деярли қолдирмас эди.
Сўнгра бирдан кўринмай қолди. Набий саллоллоҳу алайҳи ва саллам уни уч марта суриштирдилар. Башир келди. Унинг юзи синиқ, ранги ўчган эди. Набий саллоллоҳу алайҳи ва саллам сўрадилар:
-Нега рангинг ўчиб кетган эй Башир?!
Башир деди:
-Туя сотиб олган эдим. У қочиб кетди. Уни қидирдим…!
Набий саллоллоҳу алайҳи ва саллам дедилар:
-Қочиб кетган нарса қайтарилади. Шунга рангинг ўзгардими?!
-Ҳа!
Набий саллоллоҳу алайҳи ва саллам дедилар:
-Унда миқдори эллик минг йил бўлган, инсонлар оламларнинг Роббиси томон борадиган кунда қандоқ қиласан?!”.

Бор ташвишимиз шу дунё бўлмаслиги лозим. Ҳаммамиз бу дунёдан қандай келган бўлсак шундай ҳеч нарсасиз кетамиз.
Майли дунёда ишлайлик, тижорат қилайлик, обрў орттирайлик, муваффақият қозонайлик…
Аммо охират ёдимиздан чиқмасин.
Ишларни жуда унчалик жиддий олманг. Нарвонни энига эмас, бўйига қўйинг.
Модомики, динингиз саломат қолган экан, қолган мусибатни мусибат деманг.
Динингиз жароҳатланса, ақидангиз шикастланса бунга мотам тутсангиз арзийди!!!

https://t.me/Abdulqodir_Polvonov

ДАРД ЧЕКИНГ
Ибн Саъд роҳимаҳуллоҳ ўзининг “Табақот”ида келтиради:
“Иёз ибн Халифа айтади:
“Қаҳатчилик йилида халифа Умар ибн Хаттоб розияллоҳу анҳуни кўрдим. Унинг ранги оқариб кетган эди. Кишилардан сўрадим:
-Унга нима бўлган?!
Кишилар дейишди:
-У олдин ҳайвон ёғи билан сут истеъмол қилар эди. Кишилар оч қолгач, у ўзини ўша овқатдан ҳам маҳрум қилди. Инсонлар тўймагунча тўймасликка қасам ичди. Фақат ўсимлик ёғи истеъмол қилавериб ранги ўзгариб кетди!”.

Инсонлар билан бирга дард чекинг. Ана шунда улар сизни маъзур кўриб қадрлайдилар. Ўзингиз иссиқина уйда ўтириб совуқдан қалтираётган раийятингизни сабрга чақирсангиз, совуқни “бу бегона совуқ эмас, ўзимизни совуқ” деб турсангиз улар сизни қадрламайди…
Хонадон эгаси фарзандлари билан бирга оч қолса фарзандлари очликдан шикоят қилишмайди.
Мудир вақтга риоя қилса қўл остидагилар ҳам риоя қилишади.
Она мастура бўлса қизини сатрлаш унга осон кечади.
Қўл остимиздагилар биз гапираётган гапга эмас, қилаётган ишимизга қарашади!

https://t.me/Abdulqodir_Polvonov

ЗИКР
Муҳаддис имомларимиздан ибн Можа, имом Аҳмад ва имом Тирмизий роҳимаҳумуллоҳ ўзларининг ҳадис тўпламларида саҳобий Хурайм ибн Айман розияллоҳу анҳудан ҳадис келтиришади. У айтади:
“Бир киши Набий саллоллоҳу алайҳи ва салламнинг ҳузурларига келиб деди:
-Эй Аллоҳнинг Расули! Мен исломий хислат ва хулқлар асосида улғайдим. Менга исломдаги барча хислатларни ўзида жамлаган битта хислатни айтсангиз!
Набий саллоллоҳу алайҳи ва саллам дедилар:
-Тилинг доимо Аллоҳнинг зикри билан намланиб турсин!
Ҳалиги киши сўради:
-Шу менга етарлими?!
Набий саллоллоҳу алайҳи ва саллам дедилар:
-Ҳа, сендан ҳам ортади!”.

Аслида бу иш Аллоҳнинг тавфиқидир. Яъни, зикрни Аллоҳ тавфиқ берганларгина қила олади. Зикр Аллоҳнинг ибодатлари ичида энг енгилидир. Буни ғанимат билишимиз керак. Машина ҳайдаб юриб ҳам тасбиҳ айтсак бўлади. Аёллар рўзғордаги кийимларни юваётиб ҳам истиғфор айтишса бўлади. Ошхонада овқат қилиб туриб ҳам саловот айтишса бўлади. Кийимларни дазмоллаб туриб такбир айтишса ҳам бўлади…
Тил чарчамайдиган мускулдир. Қалбни турли иллат ва ифлосликлардан фақат зикр тозалай олади.
Зикрдаги энг фахр туйса бўладиган фазилат шуки, биз қачон Аллоҳни эсласак Аллоҳ ҳам бизни эслайди!
Исмимиз бир каттароқ ва ҳурматлироқ инсоннинг оғзидан чиқса қанча фахрланамиз. Энди оламлар Робби бизни эсласачи?!

https://t.me/Abdulqodir_Polvonov

ИФФАТ
Ибнул Асир роҳимаҳуллоҳ ўзининг “Усдул ғоба фий маърифатис саҳоба” китобида келтиради:
“Бани Қурайза кунида саҳобалардан Ҳаллод исмли киши қатл қилинди. Унинг онасига: “Эй Умму Халлод! Халлодни ўлдиришди!”, дейишди. Воқеани аниқлаштириш учун Халлоднинг онаси ёпинчиғини ёпиниб келди. Кимдир унга деди:
-Халлод ўлдирилганида ҳам ёпинчиқ билан келасанми?!
Халлоднинг онаси деди:
-Халлод ўлдирилган бўлса мен ҳаёйимни ҳам жароҳатлашим керакми энди?!”.

Азиз опа-сингилларим! Гарчи қиёмат қоим бўлсада рўмолингизни қидиринг, ҳаёйингизни жароҳатламанг!
Никоҳ тўйингиз бўлганида умримда бир бор бўлади бу тўй, дея рўмолни ечиб ташламанг!
Мотам бўлса маҳзунлик сизга ёпинишни унуттирмасин!

Ғазода уруш пайтида аёллар кечаси намоз ўқийдиган кийимда ухлашади. Кечаси портлатишса уларнинг жасадини вайроналар остидан ёпинчиқсиз олиб чиқишларидан ҳаё қилишади!
Буни тирикликдаги ва ўлимдан кейинги иффат дейилади!


https://t.me/Abdulqodir_Polvonov

ТИРНОҚНИ ОЛИНГ
Имом Аҳмад роҳимаҳулллҳ ўзининг “Муснад”ида саҳобий Рабийъа ал-Журмий розияллоҳу анҳудан ҳадис келтиради:
“Биз отам билан Набий саллоллоҳу алайҳи ва салламнинг ҳузурларига бордик. У зот бизга туя бериб дадамга шундай дедилар:
-Фарзандларингга айт, буни соғишдан аввал тирноқларини олишсин. Чунки тирноқ ҳайвонларнинг елинига озор беради!”.

Бу дин ҳатто ҳайвонга бериладиган озорга ҳам қарши. Инсонга эса табиийки, биринчи навбатда озор беришни ман қилади.
Феълларингиз ва қилмишларингиз тирноғини олинг. Ўғирлик қилманг, зўравонлик қилманг, зулм қилманг!
Тилингизнинг тирноғини олинг. Сўзларингиз билан қалбларни жароҳатламанг, ҳарфларингиз билан кўнгилларга озор берманг!
Кўзларингиз тирноғини олинг. Аллоҳ бандаларига берган нарсага ҳасад қилманг!
Ёдингиздан чиқмасин, Набий саллоллоҳу алайҳи ва саллам: “Тилидан ва қўлидан мусулмонлар саломат қолган киши мусулмондир!”, деганлар!

https://t.me/Abdulqodir_Polvonov