UTG.UZ

Butunjahon mehnatni muhofaza qilish kuni "O‘ztransgaz" AJda keng nishonlandi

28-aprel – Butunjahon mehnatni muhofaza qilish kuni munosabati bilan "O‘ztransgaz" АJ tizimida qator tadbirlar o‘tkazildi. Joriy yilda ushbu sana “Mehnat muhofazasining yangi bosqichi: ish joyida sun’iy intellekt va raqamlashtirishning roli” shiori ostida nishonlandi.

Hududiy boshqarmalarda turli tadbirlar, jumladan, sport musobaqalari, intellektual o‘yinlar tashkil etildi. Samarqand, Zirabuloq va G‘allaorol magistral gaz quvurlari boshqarmalari xodimlari o‘rtasida o‘tkazilgan "Zakovat" intellektual musobaqasida jizzaxliklar g‘oliblikni qo‘lga kiritdi. Shuningdek, qiziqarli intellektual o‘yinlar Gazli, Farg‘ona va Tuley magistral gaz quvurlari boshqarmalarida ham tashkil qilindi, ishtirokchilar o‘z bilim va zakovatlarini sinovdan o‘tkazishdi.

"Urganchtransgaz" UK tizimida “Mehnat muhofazasi va xavfsizligi bo‘yicha jamoat nazoratini tashkil etish yuzasidan respublika ko‘rik-tanlovi”ning ichki bosqichi o‘tkazilib, g‘oliblar tantanali tarzda taqdirlandi. Ularning sa’y-harakatlari va fidokorligi yuqori baholandi.

"Shimoliy So‘x" gazni yer ostida saqlash ombori xodimlari o‘rtasida o‘tkazilgan sport musobaqalari ham katta qiziqish bilan o‘tdi. Musobaqalarda xodimlar o‘zaro kuch sinashib, jamoaviy ruh va sog‘lom turmush tarziga sodiqliklarini yana bir bor namoyon etishdi.

Ushbu tadbirlar nafaqat mehnat muhofazasiga bo‘lgan e’tiborni oshirishga, balki jamoalarda sog‘lom muhit yaratishga, xodimlarning bilim va malakasini mustahkamlashga xizmat qildi.

🌐 UTG.UZ |💬 Facebok |📷Instagram|📹YouTube|👉 Telegram