“Oʻzkimyosanoat” AJ boshqaruvi raisi “Yangi Oʻzbekiston” universitetining Kimyo va materialshunoslik muhandisligi yoʻnalishi talabalari bilan uchrashdi.

Yurtimizda kimyo sanoati sohasini rivojlantirish, boʻlajak mutaxassislarni qoʻllab-quvvatlash maqsadida oʻtkazilgan ushbu uchrashuvda universitetda qoʻshma ilmiy loyihalarni amalga oshirish, yangi grant dasturlarini joriy etish masalalari muhokama qilindi.

Boshqaruv raisi sohani yanada rivojlantirish uchun malakali kadrlar tayyorlash muhimligi, bu jarayonda oliy taʼlim muassasalari bilan yaqindan hamkorlik zarurligini taʼkidladi, talabalar bilan kimyo va materialshunoslik sanoatidagi zamonaviy tendensiyalar borasida fikr almashib, Jamiyat tarmoq korxonalarining ish tajribasi bilan oʻrtoqlashdi.

Shuningdek, xorijiy oliygohlar bilan tashkil etiladigan almashinuv dasturlarini moddiy qoʻllab-quvvatlash, universitetda ilmiy laboratoriyalarni ochishda hamkorlik qilish yuzasidan kelishib olindi.

“Oʻzkimyosanoat” AJ “Yangi Oʻzbekiston“ universiteti bilan Kimyo va materialshunoslik muhandisligi yoʻnalishida tahsil olayotgan yoshlarni qoʻllab-quvvatlash doirasida koʻplab loyihalarni amalga oshirgan. Jumladan, 2023-yilda 5 nafar talabaning AQSHning Dallasdagi Texas universitetiga 4 haftalik qisqa amaliyot xarajatlari jamiyat tomonidan qoplab berilgan.

Bu kabi uchrashuvlar taʼlim muassasalari va sanoat korxonalari oʻrtasida oʻzaro manfaatli aloqalarni oʻrnatishda muhim qadam boʻlib, yosh mutaxassislarning kasbiy oʻsishi uchun mustahkam zamin yaratadi.

😄 “Oʻzkimyosanoat” AJ Matbuot xizmati
——————————————————————————————
🌐 Veb-sayt ✉️ Telegram 📱 Facebook 📱 Instagram 🌐 Youtube