Опа
Опа, булут бўлиб,ситилиб кетдим,
Опа, яшин бўлиб йиқилиб кетдим,
Опа, ёмғир бўлиб тўкилиб кетдим,
Опа, дардлашгани келинг бир кеча.
Рангимнинг рангини эслолмай қолдим,
Томоғим ачишиб, йиғлолмай қолдим,
Ғафлат босиб, сизни йўқлолмай қолдим,
Опа, дардлашгани келинг бир кеча.
Боламнинг кўзлари кўзимга сиғмас,
Тўрамнинг сўзлари сўзимга сиғмас,
Юрагим, юрагим кўксимга сиғмас,
Опа, дардлашгани келинг бир кеча.
Ёстиғимга ойлар ботсин десангиз,
Юлдуз ёнимизда ётсин десангиз,
Бир куним одамдай ўтсин десангиз,
Опа, дардлашгани келинг бир кеча.
Ҳамма азобимга топасиз чора,
Келсангиз хорлигу зорлик чикора,
Яхшим сизни туққан онам бечора,
Опа, дардлашгани келинг бир кеча.
Шеъларим райҳондир, шеърларим зариф,
Бир кўнглим пошшодир, бир кўнглим ғариб,
Худодан сўровдим шоир бўлай деб,
Опа, дардлашгани келинг бир кеча.
Болалигимга қайтиб, шўх ел бўлай ман,
Дардларимни айтиб, енгил бўлай ман,
Бир кунгина сизга сингил бўла ман,
Опа, дардлашгани келинг бир кеча.
📝 Sayorra Tuychiyeva
🎙 Hosila Rahimova
