ШАЙХ ҲАЗРАТ ЎГИТЛАРИ 📚

ҲАР ИШКИ, НИЯТГА ЯРАША БЎЛГАЙ

Бир аёл Расулуллоҳ соллаллоҳу алайҳи васалламга кийим совға қилди ва хурсандчилик билан: «Ё Расулуллоҳ! Буни ўз қўлларим билан тўқидим. Сиз кийишингизни хоҳладим», деди. Расулуллоҳ соллаллоҳу алайҳи васаллам миннатдорчилик билдириб, ҳадяни олдилар. Эҳтиёжлари бор эди, кийдилар. Либосни кўрган бир киши: «Ё Расулуллоҳ! Уни менга беринг», деди.
Расулуллоҳ соллаллоҳу алайҳи васаллам: «Майли», дедилар. Мажлис тугаганидан сўнг кийимни ўраб, сўраган одамга бериб юбордилар. Одамлар уни маломат қилишди: «Яхши иш қилмадинг. Бунга Пайғамбар алайҳиссаломнинг ҳам эҳтиёжлари бор эди. У зот ким нима сўраса бериб юборишини биласан-ку!»
У киши қилган ишидан уялиб: «Расулуллоҳ соллаллоҳу алайҳи васаллам буни муборак эгниларига кийганларини кўриб, У зотнинг баракасидан умид қилиб сўрагандим. Аллоҳга қасамки, мен буни ўлганимда кафан қилиш ниятида олдим» деди.
Саҳл ибн Саъд айтади: «Ҳақиқатан, ўша кийим ўша одамга кафан бўлди».

“Расулуллоҳ соллаллоҳу алайҳи васалламнинг ҳаётларидан 101 қисса” китобидан.

👉 @Shayx_Muhammadsodiq

ҚУРЪОНИ КАРИМНИ ТИЛОВАТ ҚИЛИШГА ОДАТЛАНИШ

Бомдод намозидан кейин ҳар бир мўмин озгина бўлса-да, Қуръони Каримни ўқишни одат қилсин. Бирор куни тиловатсиз қолмасин. Қуръони Каримда етти манзил бор. (Бир манзил – ҳафтияк, яъни Қуръоннинг еттидан бир қисми). Олдинги замонларда одамлар ҳар куни бир манзил (яъни, Қуръони Каримнинг еттидан бири, тахминан, тўрт ёки тўрт ярим пора) тиловат қилишга одатланишган эди. Шунда улар ҳар етти кунда хатм қилишган. Бизлар эса, анча заиф одамлармиз. Қуръонни бу қадар кўп ўқишга бардошимиз етмаслиги аниқ. Лекин имкон қадар ҳаракат қилайлик. Хоҳ бир пора бўлсин, хоҳ ярим пора бўлсин, ўқийлик. Ҳеч йўғи, Ҳакимул уммат қоддасаллоҳу сирроҳ айтганларидек, агар кимгадир ярим пора ҳам мушкул бўлса, у ҳолда чорак пора ёки икки-уч рукуъни ўқисин. (Бир рукуъ – бир маъно тўлиқ тугаган ёки бир ракъатда ўқиладиган миқдор). Лекин бирор куни Қуръони Карим тиловатидан холи ўтмасин.

“Насиҳатлар гулдастаси”дан.

👉 @Shayx_Muhammadsodiq

Агар сизга бир инсон яхшилик қилишингиздан олдин раҳмат айтса, унинг орзусини рўёбга чиқаринг, шунда унинг бошлаган ишини охирига етказиб қўйган бўласиз.

Изоҳ. Агар кимдир сиздан умидвор бўлиб, ҳали қилмаган ишингиз учун раҳмат айтса, умидини сўндирманг, истагини бажо қилинг. Шунда раҳмат билан бошланган иш раҳмат билан нихоясига етган бўлади. Сизга ҳожати тушган одамнинг олдиндан билдирган миннатдорчилиги сиз билан унинг ўртасида умумий хайрни пайдо қилади. У сабаб бошланган хайрни энди тўла-тўкис қилиб қўйиш энди сизнинг зиммангизда!

“Унвонул баён”дан.

👉 @Shayx_Muhammadsodiq

Абу Лайс Самарқандий раҳматуллоҳи алайҳ айтади:

“Ким қабр азобидан нажот топишни истаса, у тўрт нарса бажариши ва тўрт нарсадан тийилиши зарур. Бажариши зарур бўлган нарсалар: намоз; рўза; садақа; Қуръон ўқиш. Булар киши қабрини кенг ва нурафшон қилади. Тийилиши зарур бўлган нарсалар: ёлғон; хиёнат; чақимчилик ва тик туриб бавл қилиш.

👉 @Shayx_Muhammadsodiq

Ҳасани Басрий раҳимаҳуллоҳ қалб касаллиги олти нарсадан пайдо бўлади деганлар

1. Тавба умидида гуноҳ қилавериш.
2. Амал қилмаган ҳолда таълим олавериш.
3. Амал қилганда ҳам ихлоссиз бўлиш.
4. Аллоҳнинг ризқини шукр қилмасдан еявериш.
5. Аллоҳнинг тақсимотига рози бўлмаслик.
6. Ўликларни кўмиб ибратланмаслик.

👉 @Shayx_Muhammadsodiq

«Икки киши Аллоҳ учун бир-бирини яхши кўрса, уларнинг афзали муҳаббати кучлисидир».

Имом Бухорий ривояти

👉 @Shayx_Muhammadsodiq

АМАЛ ТЎҒРИ БЎЛИШИ ҲАҚИДА ЎЙЛАНГ

Баъзи одамларнинг ичида хавотир бўлади, шунча зикр қилдим, лекин ҳозиргача ҳеч йиғи келмади, кўнглим бўшамади, демак, мен жуда бағритош ва бадбахтман, деб ўйлайди.

Ёдда тутингки, йиғи келиши ёки келмаслиги ихтиёрдаги иш эмас. Нажот топишнинг унга боғлиқ жойи йўқ. Муҳими, қайси йўлдан кетаётганингиз, тўғри йўлдамисиз ёки йўқ? Қилаётган амалингиз тўғрими ёки йўқ? Шу нарсага қаранг.
Байтуллоҳга биринчи назар тушганда ҳам йиғи келмаслиги мумкин. Жуда кўп одамлардан, Байтуллоҳга биринчи назар тушганда, инсон йиғлайди, деган гапни эшитганман. Бу ҳол одамларнинг ўртасида машҳур бўлиб бўлган. Масалан, бир одам у ерга етиб борди ва Байтуллоҳни кўрди, шунда у йиғламади. Кейин у, мен шайтонман, малъун бўлиб бўлганман, чунки мен Байтуллоҳни кўриб туриб ҳам йиғламадим, деб хавотир оляпти.

Бир нарсани ёдда тутинг, у ерда йиғлашнинг бирор ҳақиқати йўқ. Байтуллоҳга борганда уни тавоф қилиш тавфиқи бўлса, ана шу Аллоҳ таолонинг карами ва эҳсонидир. Хоҳ йиғи келсин, хоҳ келмасин. Агар йиғи келса, унда бу неъматдир. Мабодо, йиғи келмаса, бу ғам қиладиган нарса эмас ва у киши яхшиликлардан маҳрум бўлганини билдирмайди. Чунки мақсад бошқа. Муҳими, бизга буюрилган амал у адо этиляптими ёки йўқми – шу!

“Насиҳатлар гулдастаси”дан.

👉 @Shayx_Muhammadsodiq

Ҳазрати Умарни тўшакка михлаб қўйган воқеа

Ҳазрати Умар розияллоҳу анҳу бир кеча назорат қилиш, раиятнинг аҳволини ўрганиш мақсадида кўчага чиқди. Мусулмонлардан бирининг уйи олдидан ўтаётиб, хонадон эгасининг намоз ўқиётганини кўриб қолди. Унинг қироатига қулоқ тутди. Уй эгаси «Қасамёд этаман Тур (тоғи) билан, битилган Китоб (Қуръон) биланки...» (Тур сураси, 1–2-оятлар)ни ўқиди. Аллоҳ таолонинг «Раббингизнинг азоби, (қиёмат куни) шубҳасиз, воқе бўлувчидир! Уни даф этувчи (куч) йўқдир» оятига етганида, ҳазрати Умар: “Каъбанинг Раббига қасамки, бу ҳақдир”, – деди ва уловидан тушди. Ваҳимага тушди, қалбини қўрқув эгаллади, деворга суяниб қолди. Бироз шу ҳолатда туриб, кейин ортига қайтиб кетди.
Шундан сўнг бир ой тўшакка михланиб қолди. Одамлар зиёрат қилгани келишарди-ю, лекин у зотнинг касалини билишолмасди!
(Имом Ибн Абу Дунё ривояти)

👉 @Shayx_Muhammadsodiq

ҲАРОМДАН ТИЙИЛ САЛОМАТ БЎЛАСАН

Шомда 97 ёшга кирган ҳурматли отахон бор эди. Шу ёшида ҳам қомати тик, кўзи ўткир, қулоғи яхши эшитар ва тишлари бутун эди. (Ваҳоланки, бундай улуғ ёшда қомат букилган, кўз хира, қулоқ яхши эшитмайдиган ва тишлар тўкилиб адо бўлган бўлади)
У кишидан:
– Эй саййидим, Аллоҳ саломат қилсин, бундайин тан саломатлигига қандай қилиб эришдингиз? – дея сўралди.
У киши:
– Эй болам, бу таним аъзоларини ёшлик чоғларимда гуноҳлардан асраган эдик, Аллоҳ таоло бу аъзоларимизни кексайганимизда саломат асради, – деб жавоб берди.
Ким тақво ила яшаса, қувватли умр гузаронлик қилади.
Ушбу воқеани ўқиётган биродарларимга айтаманки, ушбу инсоннинг айни кучга тўлган йигитлик даври Аллоҳ таолонинг итоатида ўтган эди. Энди унга мукофот ўлароқ яхши ҳолатдаги кексайиш ато қилинди.
Кимни йигитлик даври гуноҳларга мубталолик ила ўтган бўлса, уни жуда ҳам аламли кексайиш кутиб туради. Эс ҳушидан айрилиб, бир сўзни минг марталаб кайта-қайта айтадиган бўлиб қолади ва фарзандлари унинг бу ҳолатидан уялиб юришади.

Шайх Нобулсийдан
"Қиссалар ва ҳиссалар" китобидан.

👉 @Shayx_Muhammadsodiq

#Дуо
МОЛ-ДАВЛАТ ЗИЁДА БЎЛИШИ УЧУН ЎҚИЛАДИГАН ДУО

Мол-давлатнинг зиёда бўлиши учун тонгда уйғонганда қуйидаги дуони доимо ўқиб юриш керак.

بِسْمِ اللهِ عَلَي نَفْسِي بِسْمِ اللهِ عَلَي أَهْلِي وَمَالِي. اللَّهُمَّ أَرْضِنِي بِمَا قَضَيْتَ لِي وَعَافِنِي فِيْمَا أَبْقَيْتَ حَتَّي لَا أُحِبَّ تَعْجِيْلَ مَا أَخَّرْتَ وَلَا تَأْخِيْرَ مَا عَجَّلْتَ.

Ўқилиши: “Бисмиллааҳи ъалаа нафсий. Бисмиллааҳи ъалаа аҳлий ва маалий. Аллоҳумма арзиний бимаа қозойта лий ва ъаафинии фиймаа абқойта ҳаттаа лаа уҳибба таъжийла маа аххорта ва таъхиро маа ъажжалта”.

Маъноси: “Нафсим узра Аллоҳнинг номи билан. Аҳлим ва молим узра Аллоҳнинг номи билан. Ё Аллоҳим! Менга тақдир қилган нарсанг билан мени рози қил. Ҳали бермаган нарсангда менга офият бер. Токи, Сен кейинга сурган нарсани тезлатишингни ва тезлатган нарсани кейинга суришингни хоҳлайман”.

👉 @Shayx_Muhammadsodiq
👉 @Shayx_Muhammadsodiq
👉 @Shayx_Muhammadsodiq

ИНСОННИНГ КИМЛИГИНИ КЎРСАТАДИГАН БЕЛГИ

Бир куни Умар розияллоҳу анҳу бир одамни кўрсатиб: “Ким шу киши ҳақида гувоҳлик беради?” деб сўрадилар. Бир саҳобий: “Мен гувоҳлик бераман”, деди. Умар розияллоҳу анҳу: “Сен нимага асосланиб У ҳақда гувоҳлик бермоқчисан? Сен уни фақат намоз ўқиётганини кўрганмисан ёки у билан бирга сафар қилганмисан, ёки у билан бирор муомала қилганмисан?” дедилар.

Ҳазрати Умарнинг ушбу гапларидан маълум бўладики, инсоннинг кимлиги ўзаро муомалалардан билинади.

Бир муҳаддис олим ижара уйда яшарди. Уй лойдан қурилган эди. Бир куни у ҳадисни ёзаётиб, саҳифа тўлиб, бошқасига ўтиш фурсати келди, сиёҳ эса ҳали қуримаган эди. У замонлар сиёҳни шимиб оладиган босма қоғоз йўқ эди. Шу сабабли нам сиёҳ устига тупроқ сепиб қуритар эдилар. Шундай қилиб, муҳаддис олим уйнинг лойсувоқ деворидан тупроқ қириб олиб, нам сиёҳ устига сепмоқчи бўлди. Лекин дарҳол бу уйнинг ижарага олингани ёдига тушди. Шунинг учун, уй эгасидан сўрамасдан туриб, бу тупроқни сепиш мен учун жоиз эмас, деди. Кейин эса, озгина тупроқ билан нима ўзгарарди ва уй эгаси ҳам бунга йўқ дермиди, деган ўй келди хаёлига. Хуллас, девордан бироз тупроқ қириб олиб, сиёҳ устига сепди. Бироқ муҳаддис олим кечаси туш кўрди. Тушида Расулуллоҳ соллаллоҳу алайҳи васалламнинг зиёратларига борибди. У зот хафа бўлиб: “Эрта қиёмат куни сенга озгина тупроқ билан нима ўзгарарди, деганинг ошкор қилинса, аҳволинг нима кечади?” дебдилар. Шунда муҳаддис олим эрталаб турибоқ, уй эгасининг олдига борди ва унга тупроқ воқеасини сўзлаб бериб, узр сўради. Уй эгаси: “Мен кечирдим ва келгусида яна зарурат бўлса, тупроқ қириб олишингизга ижозат бераман”, деди.

Баъзи одамлар фақат тасбеҳ ўгириш ва чилла ўтиришнинг номини тасаввуф қўйиб олган. Ваҳоланки, бу нарсалар бир восита бўлиб, улардан мақсад биз динга чин қалбимиздан амал қилишимиздир. Қўлда тасбеҳ бўлса-ю, тарозидан урсак ёки ёлғон гапирсак, у ҳолда у тасбеҳдан нима фойда? Шунинг учун бир улуғ зот: “Одамлар инсон-ку бўлишмайди, лекин валий бўлиш учун зикр ҳалқаларида қатнашадилар. Агар сен ҳақиқий инсон бўлсанг, аллақачон валий ҳам бўлгансан”, дер эдилар.

“Насиҳатлар гулдастаси”дан.

👉 @Shayx_Muhammadsodiq
👉 @Shayx_Muhammadsodiq
👉 @Shayx_Muhammadsodiq

Онадан ҳам меҳрибонроқ

Аллоҳ таоло айтади: “Мени зикр қиладиганлар муҳаббатим аҳлидир. Менга шукр қилувчиларга неъматларимни зиёда қиламан. Менга маъсият қилганларни раҳматимдан ноумид қолдирмайман. Агар тавба қилсалар, уларни яхши кўраман. Агар тавба қилмасалар, Мен уларнинг табибиман, уларни гуноҳлари ва айбларидан тозалаш учун мусибатлар билан синайман. Яхшилик Менинг ҳузуримда ўн баравар ёки ундан кўпроқдир, ёмонлик эса ўз миқдорича ва уни (истасам) кечираман. Мен бандаларимга боласига меҳрибон онадан ортиқ меҳрибондирман” (Имом Байҳақий ва Ҳоким ривояти)

👉 @Shayx_Muhammadsodiq
👉 @Shayx_Muhammadsodiq
👉 @Shayx_Muhammadsodiq