ДЕПУТАТНИНГ ШАХСИЙ КУТУБХОНАСИ БОРМИ?
Рустам Норов — халқ депутатлари Ромитан тумани Кенгаши депутати. Яқиндан билганлар унга «Билимли, дунёқараши кенг, яхши суҳбатдош», дея таъриф беришади. Ҳатто бир ҳамкасбимиз «Ўқимаган китоби қолмаган», деб бироз муболаға ҳам қилди.
Сирасини айтганда, бу муболаға ҳам эмас. Асл касби муҳандис-гидротехник бўлган Рустам ака Алишер Навоий, Жалолиддин Румий, Бобур, Махтумқули каби буюк шоирларнинг асарларини ўқиб, шеърларини ёд олган. Ғазалларини бир адабиётшунос даражасида таҳлил қила олади. Пиримқул Қодиров, Ўткир Ҳошимов, Абдулла Орипов сингари адабиётимиз дарғалари китобларини мутолаа қилган. Юртимиз, хусусан, Бухоро тарихини чуқур билади.
— Алишер Навоий ғазалларини ўқиганимда дунёни билиш борасида онгимизда ҳали бўшлиқ бор, дея ўйланиб қоламан, — дейди у. — Навоий бобомиз биздан беш юз йил нарида туриб бизу сизга сабоқ бераётгандек туюлади.
Қишлоқ хўжалиги соҳасида масъул вазифаларда ишлаган Рустам ака сайловчилар кўнглига дарҳол йўл топади. Уларни ўйлантираётган масалалар ечимини излайди. Давраларда эса давлатимиз олиб бораётган сиёсатнинг мазмун-моҳиятини, жамиятимиздаги ўзгаришларни деҳқончасига тушунтириб, баҳслашишга шайланганнинг, айрим ношукр бандаларнинг попугини пасайтириб қўяди. Билимли мингни йиқар, деганлари шу бўлса не ажаб?!
Шунча гапдан сўнг биз Рустам акадан «Китоб жавонингиз борми?» деб сўрашга истиҳола қилдик. У қисқа, бироқ мароқли гурунги билан бу саволга ҳожат ҳам қолдирмади. Аммо яна бир юртдошимиз Шамсия Саидова билан мулоқотда унинг шахсий кутубхонаси бор-йўқлиги билан қизиқдик.
— Шахсий кутубхонам бор, албатта, — дейди халқ депутатлари Вобкент тумани Кенгаши депутати Ш. Саидова. — Китоб жавонимдан 400 тача адабиёт ўрин олган. Эсимда, болалигимизда отам барчамизни атрофига тўплаб «Қобуснома»ни ўқиб берарди. Мендаги китобга меҳр худди ўша паллада уйғонган. Биласиз, депутат нотиқлик санъатига эга бўлиши мақсадга мувофиқ. Унинг тили равон, фикри тиниқ, маънавий дунёқараши кенг бўлмоғи даркор. Депутатлик фаолиятимда анча-мунча китоб мутолаа қилганим қўл келяпти, деган фикрдаман. Кўп ҳолда хотин-қизлар масалалари билан шуғулланаман. У ёки бу муаммога оқилона ечим топиш, халқона айтганда, «Етти ўлчаб бир кесиш» зарурати туғилади. Шунда кўплаб бадиий асарлар қаторида Амир Темур, Бобур ҳаётига оид, шунингдек, жамият, оила тўғрисида фикр-мулоҳаза юритган жадид ёзувчилар қаламига мансуб китобларни ўқиганим асқатади. Даврий нашрлар – газета-журналларни имкон қадар кўздан кечириб бораман.
Шамсия Саидованинг бу сўзларини тингларканмиз, беихтиёр тузуккина жойда ишлайдиган собиқ бир депутат ёдимизга тушди. Унинг мақоласи қайсидир газетада чоп этилган экан. «Сиз нашриётда ишлайсизку. Ўша газитдан топиб берсангиз», деганди у дабдурустдан. Қаранг, бир оғиз сўз билан у ўз савиясини кўрсатди-қўйди. Нашриёт билан таҳририятни, вилоят газетаси билан республика матбуотини фарқламайдиган бу киши китоб, газета-журнал мутолаасидан йироқлиги шундоқ билиниб қолди
.
— 2010 йилдан 2020 йилгача халқ депутатлари вилоят ва Ромитан тумани Кенгашлари депутати сифатида фаолият олиб борганман, — дейди айни пайтда Бухоро давлат педагогика институтида талабаларга сабоқ бераётган Шуҳрат Исматов. — Ўз тажрибамдан келиб чиққан ҳолда айта оламанки, депутат китобхон бўлса, унинг аҳоли ўй-ташвишларини тинглаб, таҳлил қилиши, муаммолар ечими устида ишлаши осонлашади. Фаолиятига профессионал даражада ёндашади. Қолаверса, кўп китоб мутолаа қилиш инсоннинг ўзига бўлган ишончини ҳам оширади. Ишонч эса жамиятдаги фаоллик гарови саналади. Афсуски, депутатларимизнинг баъзиларида айнан шу фаоллик етишмаяпти. Айримлари ҳатто ўз ҳуқуқлари, ваколатларини тўлиқ билишмайди. Аҳолини ташвишлантираётган масалаларга ечим топишда қийналишади. Ҳуқуқларидан оқилона фойдалана олишмайди. У ёки бу масала ечими юзасидан тегишли ташкилотларга мурожаат қилиш ёки ўзлари сайланган маҳаллий Кенгаш сессияларида муаммоларни кун тартибига қўйиш борасида жон куйдиришмайди.
