Йил сарҳисоби
Аллоҳга шукрлар бўлсин, 2023-йил Биз учун жуда самарадор,янгиликларга бой йил бўлди.
1. 2019-йилдан бери Тошкент шаҳар кўзи ожиз ёшлар маркази билан биргаликда RH voice нутқ синтезаторида Ўзбек овозини яратиш устида иш олиб бордик. Умидсизликка тушган пайтларимиз, ишнинг бир йилча тўхтаб қолган вақтлари бўлди. Аммо бундай пайтларда бир-биримизни қилаётган ишимиз муҳимлигига, кўплаб инсонларнинг, тақдирдошларимизнинг ишини осонлаштиришига ишонтириб олдинга юришда давом этдик. Ҳаракатларимиз натижасида, 6-Июнь, Android, Windows, Linux опирацион тизимларида ишловчи,
Илк Ўзбек овозини фойдаланувчиларга тақдим этдик. Тақдимотда яна икки Ўзбек овози намоиш этилиб, октябрь ойида фойдаланувчиларга windows учун тақдим этилган бўлса, бугун 2024-йил арафасида Android учун ҳам мавжуд.
2. Камина ва Абдулазиз Салимов 2015-йилдан бери Ўзбек аудио-китобларини жамлаган онлайн кутубхона яратишни орзу қилар эдик. Аммо бу орзуга етиш ҳам осон бўлмади. Бир неча бор турли ташкилотларга бу бўйича ёрдам беришларини сўраб қилган мурожаатларимиз беҳуда кетди. Баъзиларида эса фойдасиз умидлантирилдик холос. "Ал-кимёгар" асарида келтирилган ривоят каби, 500-тошни майдалашга етдик гўё. Бу сафар ШароитПлюс ногиронлар жамоат бирлашмаси билан биргаликда Ёшлар ишлари агентлиги эълон қилган тендерда лойиҳамиз билан қатнашдик. Ҳаракат қилавериб жимиттаккина бўлиб қолган умидчамиз билан. 😊 Худога шукр, лойиҳамиз агентлик томонидан молиялаштирилди. 30-Ноябрьда эса KitobPlus онлайн кутубхонаси тақдимотини ўтказдик. Лойиҳа доирасида КитобПлюс
Android va
Ios иловалари ҳамда
kitobplus.uz сайти яратилди. Ҳозирги кунда платформадан 300 га яқин китобхон рўйхатдан ўтган. Кутубхонамизда 322 муаллифнинг 641 китоби, 28 жанор бўйича, 84 сухандон кесимида мавжуд.
3. 2023-йил саёҳатларсиз ўтмади. 7-17-август оралиғида КитобПлюс дастурчиси Ҳамкасбимиз Михаил Олегович Корнеев билан шартнома тузиш, лойиҳа масалаларини муҳокама қилиш учун россия федерациясида бўлдик. Ишдан ташқари Татаристон пойтахти қозон шаҳрида бўлиш ҳам насиб қилди. У ердан янги режалар, янги ҳислар, янги дўстлар ва яхши кайфият билан қайтиб, белгиланган режаларни амалга оширишга киришдик.
4. Ёз фаслида Гёте университети томонидан фойдали лойиҳалар танлови ўтказилди. 2-Июньда биз ўз лойиҳамизни тақдим этдик. Лойиҳа Йўқолиб кетаётган ва рақамли майдонда ўз ўрнига эга бўлмаган тилларда нутқ синтезаторларини яратиш, бу жараённи осонлаштириб, дастурчилик кўникмаларига эга бўлмаган инсонлар ҳам овоз ярата оладиган платформани яратиш вазифаларини ўз ичига олганди. Тақдим этган назарий ечимларимиз ҳакамларга маққул бўлиб, хакатон финалига йўлланмани қўлга киритдик. Финал 8-12-Ноябрь оралиғида Қозоғистоннинг Олмота шаҳрида ўтказилди. У ерда турли давлатлардан келган иштирокчилар долзарб муаммоларни қамраб олган лойиҳалари билан қатнашишди. Жамоамиз 7 кишидан иборат бўлиб, орамизда россия ва Қозоғистон фуқоролари ҳам бор эди. Барчамиз бирлашиб лойиҳа прототипини ишлаб чиқиб, финалда ҳакамларга тақдим этдик. Ижтимоий аҳамияти, кўзланган мақсаднинг кенг қамровли эканлиги, тақдим этилган ечимлар ҳисобга олиниб, фахрли биринчи ўринни ва 3000 евро миқдоридаги пул мукофотини қўлга киритдик.
Эх, соат 23:39 бўлибди, яна озгина ёзсак 2024 йилни компьютер қаршисида бошлашимга тўғри келади. 2024 учун ҳам режаларимиз бор, янги барча учун фойдали бўлган лойиҳаларни бошлаш арафасида турибмиз. Худо хоҳласа сизларни хурсанд қилишда давом этамиз. Аллоҳнинг ўзи ёрдамчимиз бўлсин!
Янгиликлардан бехабар қолмаслик учун каналларимизга обуна бўлинг
https://t.me/rhvoice_uzhttps://t.me/kitobplus_uz
