UMRACHI VA UMRA MUTASADDILARIGA ESLATMA
Oʻtgan kuni bir tanish umrachi bilan uchrashib, oʻtgan-ketgandan gaplashib oʻtirib:
- Yaxshi keldingizmi uchoq (samolyot)larda qiynalmasdan? - deb soʻradim.
- Alhamdulillah, qiyinchilik boʻlmadi-ku, lekin bir narsa taʼb (tabʼ)ni tirriq qildi, - deb qoldi.
- Yaxshilik boʻlsin, inshoalloh, - dedim.
- Bilasizmi, - der ekan, hasrat bilan xoʻrsindi. - Toshkentda tong soat 5.20da bomdod boʻlyapti. Bizning samolyot 5.00da uchishga qalqdi. Osmonga koʻtarilganimizdan keyin bomdod vaqti kirdi. Men tahorat olib boʻlib uzun yoʻlakdan oʻtarkanman, uchoqdagi 320 umrachidan nari borsa 10-20 kishi uygʻoq edi, qolganlar gʻarq uyquda edilar. Shunday qilib koʻpchilik bomdodni qazo qilib yubordi, - dedi u.
Juda achinarli holat. Alloh taolo farz qilmagan, umrida umra qilmay oʻtsa ham gunohkor boʻlmaydigan bir amalni deb kishi nega Alloh farz qilib qoʻygan NAMOZni zoye qiladi?
Namozning har vaqti farzligi, ahamiyati, uning boshqa amallar uchun tarozi vazifasini oʻtashi haqida ancha gapirilgan, yozilgan. Lekin banda doim eslatmaga muhtoj ekan. Shuning uchun bugun hurmatli umrachilarga yana xitob qilgim keldi.
Qadrli umrachi birodar!
Siz ushbu muqaddas diyorga Alloh taolodan gunohlaringizni kechirishini soʻrash uchun pul sarflab uzoq yurtdan kelayapsiz.
Avvalo, shuni yaxshi miyaga quyib olish kerak: Alloh eng yaxshi koʻradigan amal - farz amallardir. Namoz bu amallar ichida birinchi oʻrinda.
Chunki, hadisi sharifda kelganidek, qiyomatda dastlab banda hisobot beradigan amal NAMOZdir. U toʻliq ado etilgan boʻlsa, boshqa amallaridan hisobot beradi.
Shuning uchun aziz birodar, namozingizga mahkam boʻling, uni beuzr qazo qilib yubormang.
Bu ishni hayotingizdagi eng muhim va zarur ishga aylantirib oling. Namoz vaqti kirdi deguncha boshqa ishlarni ortga surib qoʻying.
Zero, har kim qabrga yolgʻiz kiradi, oʻzining qilgan ishlariga banda faqat oʻzigina javob beradi.
Keyin safarga otlanish oldidan umra ahkomlarini yaxshilab oʻrganib oling. Hozirga kelib umra haqida batafsil yozilgan kitobchalar, maqolalar yetarli. Bu ishga butun diqqatingizni jalb qilib, topib oʻqishingiz qolgan, xolos.
Oʻzi shundoq ham amallarimizga riyo va xoʻjakoʻrsinlik aralashib, oʻlda-joʻlda boʻlib yotibdi. Endi shu borini ham farzlarga beeʼtiborlik sababli yoʻqqa chiqarib qoʻymaylik.
Bunday eslatmani umrachilarga oʻsha umra shirkatlari mutasaddilari ham qilishga masʼuldirlar.
Har bir shirkat umrachilarni boshqarib keluvchi ellikboshi vazifasiga odamlarning dini uchun, umrasi maqbul boʻlishi uchun qaygʻuradigan, namoz va umra amallaridan boxabar kishilarni qoʻyishlari zarur. Har bir umra guruhi yoʻlga otlanishidan oldin shirkat mutasaddilar ularni toʻplab, yakka Allohga sigʻinish ahamiyatini, shariatda namoz oʻrnini, umra ahkomlarini bayon qilib berishlari lozim.
Yoʻqsa, aksari avom boʻlgan umrachilarning ibodatlari qabul boʻlmay qolishidan ular ham Alloh oldida javobgar boʻlib qolishlari ehtimoldan xoli emas.
Gapimning oxirida barcha umrachilarning ibodatlarini qabul qilib, gunohlardan pok etishini Alloh taolodan soʻrab qolaman.
Omin.
======
P.S. Eslatma imkon qadar koʻpchilikka yetib borishi uchun bu maqolani ulashishingiz maqsadga muvofiq.
http://t.me/Sayfulloh_Nosir
