Qorovulbozor.uz|RASMIY KANAL

​​⚡️Buxoro viloyati hokimi Botir Zaripovning viloyatdagi davlat va jamiyat boshqaruvining turli sohalarida faoliyat yuritayotgan rahbar-xodimlarga murojaati

Soʻnggi yillarda mamlakatimizda korrupsiyaga qarshi kurashish davlat siyosatining asosiy ustuvor yoʻnalishlaridan biri sifatida belgilanib, bu borada tub oʻzgarishlar amalga oshirilmoqda.

Ayniqsa, keyingi qisqa davr ichida qabul qilingan qonunlar, Prezident farmon va qarorlarida belgilab berilgan ustuvor vazifalar ijrosi natijasida korrupsiyaga qarshi kurashish borasidagi davlat hokimiyati va boshqaruvi organlari faoliyatining ochiqligi va shaffofligi yanada kengayib, samarali mexanizmlar amaliyotga tatbiq etilmoqda.

Shunga qaramay, mazkur illat jamiyatimizda uchrayotganligi mamlakatimizda amalga oshirilayotgan islohotlarga oʻzining salbiy taʼsirini koʻrsatmoqda.

Korrupsiya nafaqat mamlakatga moddiy yoʻqotish olib keladi, balki tadbirkorlik rivojiga, qonun ustuvorligini taʼminlashga toʻsqinlik qiladi, jamiyatda ijtimoiy keskinlikni, hokimiyatga ishonchsizlikni, halokatli ogʻir oqibatlarni keltirib chiqaradi.

Hurmatli Prezidentimiz Shavkat Mirziyoyev 2022-yil 20-dekabrdagi Oliy Majlis va Oʻzbekiston xalqiga murojaatnomalarida “Korrupsiyaga qarshi kurashishda aholining barcha qatlamlari, eng yaxshi mutaxassislar jalb qilinmas ekan, jamiyatimizning barcha aʼzolari, taʼbir joiz boʻlsa, “halollik vaksinasi” bilan emlanmas ekan, oʻz oldimizga qoʻygan yuksak marralarga erisha olmaymiz”, deb bejizga taʼkidlamadilar.

Korrupsiya va poraxoʻrlik jamiyat barqarorligining muhim asosi boʻlgan adolatning yoʻqolishiga olib keladi.

Mamlakatimiz mustahkamligi, xalqimiz farovonligi, yurtning rivoji va gullab yashnashini, obod boʻlishini istagan har bir fuqaro pora olish va berish, pora olish va berishda vositachilik qilish illatidan xalos boʻlishi kerak.

Bugungi kunda ayrim davlat xizmatchilari oʻz manfaatlarini koʻzlab, jumladan, kredit olishda, qurilish sohasida, byudjet mablagʻlarini taqsimlashda ming afsuski, noqonuniy ishlarga aralashib qolayotganliklarini guvohi boʻlayapmiz. Sodir etilgan har qanday korrupsiyaviy jinoyat sirligicha qolmaydi, albatta, oshkor boʻladi va qonuniy jazosini oladi.

Shuning uchun men sizlarni ogohlantirib oʻtmoqchiman, har qanday jinoyat uchun jazo muqarrardir, buni har bir davlat xizmatchisi vujudi bilan his qilishi, koʻz oldiga ota-onasi, farzandlari va aka-singillarini keltirishlari kerak.

Davlat xizmatchisi – bu oddiy xodim emas, u davlat topshirigʻi va manfaatlari boʻyicha uning nomidan harakat qiluvchi insondir. Shuning uchun davlat xizmatchisi degan yuksak hamda sharafli nomga dogʻ tushirmaslik uchun eng avvalo, halol boʻlishimiz, oldimizga qoʻyilgan vazifalarni vijdonan, vatanparvarlik tuygʻusini toʻliq his etgan holda mehnat qilishimiz lozim boʻladi.

Ish faoliyatimizda korrupsiyaning har qanday koʻrinishiga murosasiz munosabatda boʻlish, xalqimizga halol va sadoqat bilan xizmat qilishni asosiy burchimiz va vazifamiz deb, bilaylik!

Faoliyatimizni qaytadan xolis tahlil qilib, mahalliy ijro hokimiyati oldiga qoʻyilgan ustuvor vazifalarni shaxsiy manfaatimizdan ustun qoʻygan holda sidqidildan bajarishga barcha kuch va salohiyatimizni safarbar etaylik!

Yurtimizning buguni va ertasi, yorugʻ kelajagi uchun avvalo oʻzimiz masʼul ekanligimizni unutmaylik!

Barchangizni birgalikda korrupsiyaga qarshi murosasiz kurash olib borishga da’vat qilaman!

Buxoro.uz | Facebook | Instagram | YouTube