Assalomu alaykum, aziz yurtdoshlar, qadrli hamkasblar va hurmatli talabalar!

Mana, yana rahmat va baraka, ezgulik va saxovat ayyomi bo‘lmish muborak Ramazon oyiga yetib keldik. Bu oy – nafaqat sabr va shukronaning, balki hamjihatlik, mehr-oqibat va insoniy qadriyatlar yuksaladigan ulug‘ fasldir.

O'tgan vaqt mobaynida Farg‘ona jamoat salomatligi tibbiyot instituti tibbiy ta'lim yo‘lida ulkan marralarni zabt etib, ilm-fan, xalqaro hamkorlik yo'nalishlarida ham katta yutuqlarga erishgani barchaga ma'lum. Biz zamonaviy tibbiy ta’lim standartlarini joriy etish, ilmiy izlanishlar ko‘lamini kengaytirish va yosh kadrlarni yetishtirish borasida fidokorona mehnat qilmoqdamiz. Bu yo‘lda "Inson qadri uchun!" degan oliy tamoyil har bir ishimizda mezon bo‘lib xizmat qilmoqda. Chunki jamiyatning eng katta boyligi – inson, uning salomatligi va baxtidir.
Ramazon oyida yuraklarimiz yanada poklanib, ezgu niyatlarimiz kuchayadi. Ushbu qutlug‘ kunlarda mehr-oqibat va saxovat, ilmga bo‘lgan intilishimiz bilan jamiyatimizga yanada ko‘proq foyda keltirishga, kelajakka ishonch bilan qadam tashlashga harakat qilamiz.

Yaratgan egam tutgan ro‘zalarimiz, qilgan duolarimiz va amalga oshirayotgan ezgu amallarimizni qabul aylasin! Yurtimiz tinch, xalqimiz sog‘-salomat, ilm-ma’rifat yo‘limiz esa yorug‘ va barakali bo‘lsin!

Ramazon muborak bo‘lsin!