Севги буюк уммон экан – кемаси йўқ,
Ишқ аҳлининг забони бир – шеваси йўқ,
Чинор минг йил яшар, аммо меваси йўқ,
Чинор умрин сўрамаган нодон эмас.

Мен саҳарги сабо эдим, насим бўлай,
Севгини ҳақ билганимга амин бўлай,
Замин эдим, заминман-у, замин бўлай,
Ўзин кўкда санаганлар осмон эмас.

Агар қўлга қўл қовушса – иззат бўлар,
Агар лабга лаб қовушса – лаззат бўлар,
Агар дилга дил қовушса – жаннат бўлар...
Демак, ерда жаннат қуриш осон эмас.

© Мансур Жумаев

Аллоҳ раҳматига олсин!