Sizni topish oson boʻlsin

Jamoamizni kengaytirish ishlarini olib boryapmiz. Tashkiliy ishlar davomida tushunib yetdim:

Mutaxassis oʻzini topishlari uchun imkon bera olishi kerak.

Soʻrovnoma tayyorlaganimizda toʻldiruvchidan Telegram akkaunti ochilgan telefon raqamini soʻraymiz.

Javoblar esa har xil yozilgan boʻladi:

— faqat telefon raqami;
— faqat Telegram foydalanuvchi nomi (username);
— kamdan-kam hollarda har ikkalasi.

Shulardan raqam qoldirganlarni kontaktga qoʻshib Telegramdan yozay desam raqamni "Telegramda mavjud emas, uni taklif qiling" degan yozuv chiqadi. Sms yozsam koʻrmay qolishi mumkin. Telefon qilishgina yordam beradi. Ammo ungacha yangilik yoki imkoniyat kuchini yoʻqotishi mumkin.

Faqat Telegram foydalanuvchi nomini qoldirganlar eslaridan chiqib qolib uni oʻzgartirgan boʻlsa chiqmaydi. Oʻzgartirmagan boʻlsa topish oson boʻladi. Lekin telefon qilish kerak boʻlganida oʻz vaqtida yangiligimni egasiga aytolmay qolaman.

Har ikkala holat ham soʻrovnomani toʻldirgan odamga zarar keltiryapti.

Telefon raqamni kontaktga qoʻshganda Telegramda koʻrinadigan boʻlsa, oʻzgarmaydigan nikneymi boʻlsa maza qilaman. Oʻz vaqtida kerakli axborotni unga yetkaza olaman. Raqam egasi ham yangilikdan qolib ketmaydi va imkoniyatlarini boy bermaydi.

Xullas, shunaqa. Uchinchi toifadagi javobni yozadigan boʻlsangiz oʻzingizga ham, sizga murojaat qiladigan odamga ham katta yaxshilik qilgan boʻlasiz.

Vaqt ajratib oʻqiganingiz uchun rahmat. Manfaatli boʻlsin.

Xayrli tun barchangizga!