Egil, o‘zni pana qil,
Borligingni bildirma.
Yo‘talganga o‘n besh yil,
Aksirganga yigirma.

Kar bo‘l, ko‘r bo‘l, tishla til,
Boshga balo keltirma.
Gapirganga o‘n besh yil,
Eshitganga yigirma.

Qalamingni dushman bil,
Qog‘oz uzra jildirma.
Roman yozsang – o‘n besh yil,
Doston yozsang – yigirma.

Tashbehlarning tagi zil,
Qofiya ham qidirma.
Menga tegdi o‘n besh yil,
Shuhrat oldi yigirma.

Zamon kechdi shu zayil,
Bizlar ko‘rdik, sen ko‘rma.
O‘tsa ham ko‘p o‘n besh yil,
O‘tsa ham ko‘p yigirma.

Said Ahmad, shukur qil,
Keksaliging bildirma.
Sen ozodsan o‘n besh yil,
Yoshing esa yigirma.

(c) Erkin Vohidov