MAGNIT⚡️

#Онамга

Ая, агар менга ғамхўрлик қилмоқчи бўлсангиз, илтимос, аввало ўзингизни севинг.

Ҳеч бир бола буни истамаганидек, мен ҳам, сиз ўзингиздан қисиб, тийиб, эконом қилиб, сарполарим учун қимматбаҳо нарсаларни йиғишингизни, бироқ ўзингиз эски кўйлакларда юришингизни истамайман.

Сарҳил ва қимматбаҳо ноз-неъматларни меҳмонлар ва биз учун асраб, бироқ ўзингиз оддий нон ва овқат еб ўтиришингизни истамайман.

Ая, куюнманг, энди мен эрга тегмайман деб ўжарлик қилиб сизни қийнамайман. Қанчалик миям ақлга тошиб кетмасин, қанчалик ўжарлик, ўзибилармонлик қилмайин, Аллоҳнинг ишларига қарши боролмайман. Эркаги йўқ уйнинг файзи йўқ, буни тан ола бошлаяпман. Ҳали эшик тутқичи, ҳали раковина, ҳали кран, ҳали қулфи тинмай бузиладиган бу квартирамда ёлғизлик, иложсизлик, ҳимоясизлик қаддимни букаётгани, ҳаёт издан чиқаётгани ва бунда мени кимнингдир кучли қўллари маҳкам тутиб туриши зарурлигини қаттиқ ҳис қиляпман, ая. Сиз англатмоқчи бўлган ҳақиқатларни тушуниб бораётгандекман.

Ая, куюнманг, тўйим эртами кеч албатта бўлади, чала ҳовлимиз ҳам битади, йўлини топади ҳамма фарзандингиз. Рўзғоримизнинг ҳам кам-кўстлари битади бахтли кунларнинг бирида. Неварасиз қолмайсиз, ваъда бераман. Агар, набира сизни хурсанд қилса, керак бўлса 15 талаб туғишга розиман. Бироқ, жудаям истардимки, фақат тўйимизни кутиб эмас, балки ҳар куни ўзингизни хотиржам ҳис қилсангиз, келажагимиздан хотиржам бўлсангиз.

Ая, куюнманг, қайнонам яхши инсон бўлади, албатта. Розиман, қизидек кўрмасин, бироқ зуғум ҳам қилмасин. Ташвишланманг, келин бўлиб борган уйимдан олдингизга йиғлаб келмайман. Бўлажак эримдан ҳам шикоят қилмайман, умид қиламанки, шикоят қилишимга зарурият ҳам бўлмайди.

Куюнманг, тўйларимиз ҳам кўнгилдагидек ўтади. Келинни уйи ундоқ экан, куёвни уйи бундоқ экан, тўйи эса жуда оддий ўтди деб кибрланган инсонларни эса, ҳаммасини илоҳим боласи ўқитувчи бўлсин деб қарғайман. Қарғишларим етиб борса, ўшалар ҳам ҳис қилади аҳволимизни.

Ая, нимасига куюнасиз, бу одам зоти қачон кимдан рози бўлганки, биз уларни рози қиламан деб ўз жонимизни хатарга қўйсак? Ҳатто Аллоҳга исён қиладиган одамлар турганда, бизга уларнинг норози бўлишлари нима бўлибди? Инсонларнинг қалби жаннатмидики, ундан жой оламан деб талашсак? Одамлар нима дейди деб ўзингизни қийнаманг. Одамлар ҳеч қачон, ҳеч қачон ва яна ҳеч қачон рози бўлмаскан, гапираркан, муҳокама қиларкан.

Ая, куюнманг, менга жин ҳам урмайди. Аллоҳ мени жуда омадли қилиб яратган. Мен буни шу вақтга қадар ҳар нафасимда, ҳар кунимда бутун борлиғим билан ҳис қилдим. Аллоҳ мен биланку дедим, қўрқмадим. Шунингчун, билингки, мен қаерда ва кимлар билан бўлмайин, тинчман, хотиржамман. Ким билсин, балки боламни асра деган дуоларингиз Аллоҳга етиб бораётгандирки, шунингчун хотиржамдирман.

Ая, куюнманг, ўқувчиларингиз ҳам бир нарса бўлар. Бировнинг болалари ҳақида биздан ҳам кўп куюндингиз. Жамият сизга бу учун қандай раҳмат айтди? Майли, шу жоҳил ота-оналарнинг раҳматига зор қилмасин сизларни. Давлатнинг ҳам, жоҳилият ота-оналарининг ҳам миннатли марҳамати керакмас. Бировнинг боласига заҳмат чекиб, билим берганингиз учун Аллоҳни ўзи марҳаматидан аямасин. Куюнманг.

Ая, ҳар доим болам деб ўзингизни ўққа-чўққа урманг. Сизни ўққа-чўққа уриб, ўзингиздан кечиб, соғлингизни йўқотиб, фақат ўзгалар учун парвона бўлиб яшаётганингизни ўйласам, юрагимнинг бир жойи ачишади. Бўғзим тўлади аламга. Онаманда, фарзандларим учун шундай қилишим керак дейсиз. Ҳа, биламан, лекин, она эканда деб қийналаётганингизни кўрган болангиз бундан бахтли бўлиб қолмайди.

Ая, мен бу беш кунлик дунёда ўзингизни қурбон қилиб эмас, балки чинакамига бахтни ҳис қилиб, ўзингиз учун ҳам яшашингизни истайман.

Мен ишонаман, фарзанднинг ота-онасига қиладиган энг катта яхшилиги - ўз ҳаётини қуриб, ўзини эплаб, бахтли бўлиб яшашида. Шунда ота-она хотиржам бўлади. Ахир, дунёда ҳар бир ота-она болам мендан тўкисроқ, мендан бахтлироқ ва фаровонроқ яшасин деб ҳаракат қилади.

Давоми👇