Jizzakh Tourism official

Viloyat rahbari Ulugʻbek Mustafoyev mehmonlarni vohamizga  tashrif buyurganliklari uchun samimiy minnatdorchilik bildirib, ikki mamlakatlar oʻrtasidagi munosabatlarning ustuvor yoʻnalishlari, bu borada hududlararo hamkorlikni rivojlantirish, shu bilan birga  hali ikki tomonlama ishga solinmagan ulkan salohiyat borligini taʼkidlab oʻtdi.

Uchrashuvda elchi Beybut Atamqulov  qabul uchun viloyat rahbariga minnatdorchilik bildirib,  ikki davlat oʻrtasidagi oʻzaro aloqalarni, hamkorlikni yuqori baholadi.

Elchi janoblari tranzit yoʻl chorrahasida joylashgan Jizzax viloyatining salohiyati, soʻnggi yillarda vohada qoʻlga kiritilgan yutuqlarga yuqori baho berdi.

Muloqot davomida Samarqand shahrida joriy yilning oktyabr oyida oʻtkazilgan “Oʻzbekiston-Qozogʻiston IV Mintaqalararo forumi” doirasida erishilgan kelishuvlar natijasida ikki tomonlama savdo-iqtisodiy, investitsiyaviy va madaniy-gumanitar hamkorlikni yanada kengaytirish istiqbollari muhokama qilindi.

Qozogʻiston Respublikasining Turkiston viloyati hamda Jizzax viloyatlari oʻrtasida savdo va sanoat kooperatsiyasini rivojlantirish, transport-logistikasi, qishloq xoʻjaligi, turizm,  sanoat, tibbiyot, taʼlim, IT va madaniy yoʻnalishlarda hamkorlikni yangi qirralarini ishga solish boʻyicha oʻzaro taklif, fikr-mulohazalar oʻrtaga tashlanib, yangi loyihalarni amalga oshirish boʻyicha yoʻl haritasi ishlab chiqildi.

Jumladan, Turkiston-Jizzax-Zomin yoʻnalishi boʻyicha turistik marshrut xaritasini ishlab chiqish, Jizzaxdan ziyorat turizmi uchun Turkistonga sayyohlarni jalb etish, soliq, bojxona imtiyozlari, tadbirkorlar uchun preferensiyalar,  Turkiston viloyatining Jizzax viloyatiga chegaradosh boʻlgan Maxtaorol va Yettisoy tumanlari bilan  tovar ayirboshlash, savdo nuqtalari va bozorlar tashkil etish etish, qoʻshma korxonalar sonini koʻpaytirish masalalari  boʻyicha takliflar bildirildi.
 
Uchrashuvda Jizzax viloyati hamda Turkiston viloyatlari oʻrtasida savdo-iqtisodiy, turizm, qishloq xoʻjaligi, tibbiyot, taʼlim, madaniy-gumanitar sohalarda hamkorlik va aloqalarni oʻrnatish  boʻyicha memorandum imzolandi.

Shuningdek, Qozogʻistondan tashrif buyurgan mehmonlar Jizzax erkin iqtisodiy zonasidagi yirik ishlab chiqarish zavodlari “ADM Jizzakh”, “Iruskon”  qandolat fabrikasi, Sharof Rashidov tumanidagi   “BMB-NRC Agrologistics” Oʻzbekiston-Rossiya qoʻshma korxonasi faoliyati bilan tanishdilar.

Tashrif davomida mehmonlar Jizzax shahridagi “Xalqaro doʻstlik uyi”da qozoq diasporasi vakillari bilan uchrashdilar.

Qozogʻiston delegatsiyasi tashrif soʻnggida “Zomin” turistik-rekreatsion zonasi bilan tanishdilar.