Husan Tangriyev I Rasmiy kanal

Давлат бошқаруви академиясида давлат органлари ва ташкилотлари Ахборот хизмати раҳбарлари учун малака ошириш курслари бошланди

Унда турли идоралардан 31 нафар матбуот котиблари ўз салоҳиятини ошириши кўзда тутилмоқда.

Курсларнинг очилиши тадбирида Академия ректори Адхам Бекмуродов томонидан, тобора шиддат билан ривожланиб бораётган ахборот асрида бугунги кун талабларидан келиб чиқиб ташкил этилган ўқувнинг аҳамияти хусусида тўхталиб, соҳа вакиллари учун Академия профессор-ўқитувчилари томонидан керакли билим ва тажрибалар берилиши, шу билан бирга ўзаро мулоқот, баҳс-мунозаралар ўтказилиши, мавзулар юзасидан қўшимча билимларни талаб қилиш, биргаликда бир жамоа бўлиб ривожланиш зарурияти мавжудлиги таъкидланди.

Шундан сўнг, Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлиги директори Асаджон Ходжаев халқ ва давлат идораларини ўзаро самарали муносабатини ташкил этадиган, олиб борилаётган ислоҳотларни кенг жамоатчиликка етказишда хизмат қилишда муҳим ўрин тутувчи, матбуот котибларининг билим ва малакасини замонавий ҳамда илғор тажрибалар асосида ошириш бугунги куннинг устувор вазифалардан эканлигини ўз чиқишида эътироф этди. Шундан келиб чиққан ҳолда матбуот котибларидан ўқувларда фаол қатнашиб, профессионал фаолиятларида қўл келадиган билимларни ўзлаштиришларига ишонч билдирди.

Малака ошириш курсида Божхона қўмитаси раисининг матбуот котиби – ахборот сиёсати масалалари бўйича маслаҳатчиси Ҳ.Тангриев иштирок этмоқда.

Малака ошириш курси 22 февралга қадар давом этади.

Сурхондарёда супургилар дастагига яширилган 612 кг. "гашиш" гиёҳвандлик воситасини олиб киришга уриниш фош қилинди!

Ўзбекистон Республикаси Божхона қўмитаси ҳамда Давлат хавфсизлик хизмати Чегара қўшинлари билан ҳамкорликда йирик миқдордаги гиёҳвандлик воситаларини республикамизга олиб киришга бўлган навбатдаги уриниш бартараф этилди.

2025 йил 9 февраль куни Сурхондарё вилояти божхона бошқармасининг “Айритом” чегара божхона пости орқали республикамиз ҳудудидан транзит тарзида ўтиш учун кириб келган юк автотранспорт воситасини белгиланган технологик схема асосида божхона ва чегара назоратидан ўтказиш жараёнида мазкур автотранспорт воситасига ортилган 13,5 тонна оғирликдаги супурги ходимларнинг диққатини тортди.

Шундан сўнг мазкур автотранспорт воситаси “Айритом” чегара божхона постига туташ ҳудуддаги “Термиз” ташқи иқтисодий фоалият божхона пости тасарруфидаги божхона омборига келтирилиб, ундаги товарлар тўлиқ божхона кўригидан ўтказилди.

Аниқланишича, юк автотранспорт воситасига 180 та қопда супурги жўхориси ўсимлигидан тайёрланган 22 минг 500 дона хўжалик супургилари ортилган.

Мазкур супургиларни синчиклаб кўздан кечириш давомида, 2986 дона супургиларнинг дастаклари орасига айнан супурги рангига мос равишда – сариқ рангдаги скотч билан ўралган ўртача 25 см узунликдаги полиэтилен ўрамлар моҳирлик билан яширилгани фош бўлди.

Ушбу ўрамлар белгиланган тартибда ва холислар иштирокида очиб кўрилганида, уларнинг ичига ўртача 200 гр. оғирликдаги, ўткир ҳидли, тўқ жигаррангли гиёҳвандлик воситаси эканлиги маълум бўлди.

Мазкур ҳолатда 2986 дона супурги дастакларидан ажратиб олинган ўрамлардаги модда дастлабки тезкор анализ натижаларига кўра “гашиш” гиёҳвандлик воситаси бўлиб, уларнинг умумий оғирлиги 612 кг.ни ташкил қилмоқда.

Дастлабки ҳисоб-китобларга кўра, мазкур гиёҳвандлик воситасининг қора бозорлардаги нархи тахминан 16,5 млн АҚШ долларидан ошади.

Ҳозирда ҳолат юзасидан терговга қадар текширув ҳаракатлари давом эттирилмоқда.

Кеча “Бож бадал” сериалининг якуний қисми эфирга узатилди!

Ўткир сюжет, детектив, мелодрама – сериал буларнинг ҳаммасини ўзида умумлаштира олди. 2 та фасл, 24 та қисмдан иборат телеасар бир қарашда қисқа туюлиши мумкин, аммо бугун бир неча юзлаб серияда олинаётган ва маиший қолиплардан чиқиб кета олмаётган сериаллардан кўра анча савияли ва юки бор, назаримда.

Йўқ, сериал ишида бошидан охирига қадар иштирок этган, кичик эпизодларда рол ўйнаган масъул ходим сифатида эмас, оддий томошабин сифатида ёзяпман буларни.

Сериал божхона иши билан томошабинни яқиндан таништиради, тизимнинг ичига олиб киради, рақамли технологиялар замонида божхонанинг тезкор тузилмалари иши янада мураккаблашуви намоён бўлади. Айниқса, сунъий интеллектнинг криминал тўдаларга қанчалик қўл келишини айнан шу сериал илк бор катта экранга олиб чиқди!

Сериалда “Генерал” образи анча-мунча ҳаётий қилиб очиб берилди. Реал ҳаётда томошабин уларга кўп ҳам йўлиқавермайди, ҳаттоки, офицерлар ҳам улар билан фақат иш юзасидан мулоқотга киришишади. Биз уларни иш ва ҳарбий рамкадан ташқарида кўравермаганимиз сабабли ичидан ўтаётган ўй-хаёллари, изтиробларини кўп ҳам ҳис қилавермаймиз. Аммо, уларда ҳам юрак бор, инсоний ички кечинмалар бор, уйида интиқлик билан кутаётган оиласи бор, қўл остидаги минглаб зобитлар учун каттадан-катта маъсулият ҳисси бор. Сериал айни шу ҳиссиётлар оламига томошабинни олиб кира олди.

Ҳа, сериал якунланди. Аммо, унинг томошабинга берган маънавий озуқаси ва завқи ҳали кўп давом этади.

Сериални томоша қила олмаганлар учун намойиш Youtube платформасида давом этади. Ҳозирга қадар сериал янги фаслининг 3 та қисми мазкур платформага жойлаштирилди.

Божхоначилар фаолиятига бағишлаб тасвирга олинган илк сериал - "Бож бадал"нинг 2-фасли якуний қисми бугун соат 18.50 да "Zo'r TV" телеканалида намойиш қилинади!

Воқеалар ривожи қандай якун топади?

Ўтказиб юборманг!