Siz tanlovga kim bilan qatnashyapsiz?

Alloh taologa hamdlar boʻlsin, «Arbaʼin Navaviyya» tanlovi boshlanganidan buyon insonni xursand qiladigan holatlar koʻp kuzatilmoqda. Tanlovga homiy boʻlayotganlar, sovgʻalarni 3 tadan 10 taga yetkazilishiga xayrixoh boʻlganlar, 6 oydan buyon har oydagi bosqich gʻolibiga «Tafsiri Hilol» toʻplamini hadya qilayotganlar, yoshi keksa boʻlsa ham tanlovda ishtirok etayotgan buvijonlar va hokazo.

Quyida yana shunday xursandchilik holatni sizlar bilan boʻlishamiz. Bugungi qahramonlarimiz farzandlar tarbiyasi, kundalik yumushlar, uy-roʻzgʻor, ishdan ortib, Hasanxon Yahyo Abdulmajid tomonidan sharh qilingan «Shamoilul-Muhammadiya» tanlovidan buyon qatnashib kelayotgan, tanlovga vaqt ajratayotgan, deyarli har bir bosqichda gʻoliblar qatorida boʻlayotgan er-xotinlardir.

Keling, ular haqida bizdan emas, oʻzlaridan eshitamiz.

«Assalomu alaykum. Eng avvalo tanlov tashkilotchilari – sizlardan va ustozlarimiz Hasanxon va Husaynxon qorilardan Alloh rozi boʻlsin. Ularning suhbatlarini tinglab, oʻzimiz uchun, ikki dunyoyimiz, va, oxiratimiz uchun koʻp maʼlumotlar olmoqdamiz. Shu maʼlumotlar asosida oʻzimiz va farzandlarimiz tarbiyasini isloh qilish harakatidamiz.

Biz tanlovga turmush oʻrtogʻim bilan birgalikda qatnashamiz. Tanlovlar tashkil qilinishidan avval turmush oʻrtogʻim ustozimiz Hasanxon qorining «Shamoilul-Muhammadiya» suhbatlarini tinglab yurardilar. Tanlov tashkil qilingach, menga ham tanlov oʻtkazilinayotganini, unda qatnashsak, sovrinlar boʻlishini aytdilar. Rosti, boshida sovrinlar uchun qatnashgandim.

Ilk tanlovda qatnashgan kunim, unga tayyorgarlik jarayonlari hali ham esimda. Suhbatlarni bir martadan eshitib, kerakli joylarini yozar edik. Tanlovning birinchi bosqichi boʻladigan kun keldi. Savollar biz uchun juda qiyindek tuyuldi. Vaqt shunaqa tez oʻtib kettiki, 4-5 ta savolning javobini yozishga ulgirmadik. Shunday boʻlsa ham bor javoblarni yubordik. Ammo natijalarni koʻrib, yanada yaxshiroq tayyorlanish kerakligini tushunib yetdik.

Shundan keyin bitta suhbatni 3-4 marotaba eshitadigan boʻldik. Har safar eshitganda yangi-yangi maʼlumotlar topardik va qayd qilib borardik. Bir-birimizga savollar berardik. Farzandlarimiz ham yonimizda suhbatlarni tinglashardi.

Keyingi tanlov kuni keldi, savollarga javob berdik va adminga yubordik. Soʻng turmush oʻrtogʻim bilan bir-birimizning javoblarimizni tekshirdik, solishtirdik.

Shunday qilib sekin-asta tanlov hayotimizning bir qismiga aylana boshladi. Safarda ham tanlovga qatnashishga harakat qilardik. Biz uchun endi sovrinlar, oʻrinlardan koʻra tanlovning asl mohiyati, toʻgʻri yashash, Rasulimiz sollallohu alayhi vasallamning axloqlari bilan axloqlanish, odamlar soʻzlaridan koʻra Alloh taoloning roziligiga intilish muhimroq boʻlib borardi. Bu uchun sizlarga alohida, cheksiz minnatdorchilik bildiramiz».

Ruxshona Umarova

Siz tanlovga kim bilan qatnashyapsiz? 😊

* Maʼlumot uchun, ushbu er va ayol 7-bosqichda 2 va 3-oʻrinni egallashdi

@hasanhusayn