Furqon kitoblar do‘koni

#Рамазон, 11-кун

Иймон ва савоб умидида таровиҳ намозини ўқиш

عَنْ أَبِي هُرَيْرَةَ رَضِيَ اللهُ عَنْهُ، أَنَّ رَسُولَ اللهِ صَلَّى اللهُ عَلَيْهِ وَسَلَّمَ قَالَ: مَنْ قَامَ رَمَضَانَ إِيمَانًا وَاحْتِسَابًا غُفِرَ لَهُ مَا تَقَدَّمَ مِنْ ذَنْبِهِ

Абу Ҳурайра розияллоҳу анҳунинг ҳадиси: “Росулуллоҳ соллаллоҳу алайҳи ва саллам: “Ким Рамазонда (суннатлигига) иймон келтириб ва савоб умидида (таровиҳ ва таҳажжуд намозларини ўқиб) қиёмда турса, унинг ўтган гуноҳлари кечирилади”, дедилар”. Бухорий (37), Муслим (759/1663).

Ушбу ҳадис Рамазон кечаларида ўқиладиган таровиҳ ва таҳажжуднинг фазилати улуғлиги, бу икки намоз гуноҳларнинг мағфиратига сабаб бўлишига далил: ким суннатга риоя этган ҳолда таровиҳ намозини ўқиса, Рамазонда тўлиқ намозда тургандек бўлибди.

Росулуллоҳ соллаллоҳу алайҳи ва саллам бу ерда мағфиратга эришиш учун “иймон келтириш” ва “савоб умид қилиш” кераклигини айтдилар.

“Иймон келтириш” – таровиҳда Аллоҳ Таъолога иймон келтириб, унинг Рамазонга боғлиқ ваъдасига (беҳисоб ажр беришига) ва ушбу намознинг фазилатига ишониб туриш.

“Савоб умидида” – фақат Аллоҳдан савоб умид қилиб, риё ва бошқа нарсалардан холи равишда намоз ўқиш.

عَنْ أَبِي هُرَيْرَةَ رَضِيَ اللهُ عَنْهُ، قَالَ: كَانَ رَسُولُ اللهِ صَلَّى اللهُ عَلَيْهِ وَسَلَّمَ يُرَغِّبُ فِي قِيَامِ رَمَضَانَ مِنْ غَيْرِ أَنْ يَأْمُرَهُمْ بِعَزِيمَةٍ، ثُمَّ يَقُولُ: مَنْ قَامَ رَمَضَانَ إِيمَاناً وَاحْتِسَاباً غُفِرَ لَهُ مَا تَقَدَّمَ مِنْ ذَنْبِهِ .

Абу Ҳурайра розияллоҳу анҳудан ривоят қилинади: “Росулуллоҳ соллаллоҳу алайҳи ва саллам Рамазонда қиёмда туришга (тунги намозларни ўқишга) тарғиб қилар, аммо (тунги намоз фарз эмас, нафл бўлгани учун) ҳеч кимга буни қатъий буюрмас ва “Ким Рамазонда (суннатлигига) иймон келтириб ва савоб умидида қиёмда (таровиҳ ва таҳажжудда) турса, унинг ўтган гуноҳлари кечирилади”, дер эдилар”. Муслим (759/1664), Абу Довуд (1371), Термизий (808).

Мусулмон киши Рамазонда таровиҳ намозини доимо қолдирмай ўқишга, намозда имом билан охиригача туришга ҳаракат қилиши, бунда нуқсонга йўл қўймаслиги, ҳатто (таровиҳ саккиз ракъат ўқиладиган юртларда) имом витр билан бирга ўн бир, ёки ўн уч ракъат ўқиган тақдирда ҳам имомдан олдин намоз ўқишни тўхтатмаслиги лозим. Зеро, Росулуллоҳ соллаллоҳу алайҳи ва саллам бу ҳақда шундай деганлар:

عَنْ أَبِي ذَرٍّ رَضِيَ اللهُ عَنْهُ، قَالَ: قَالَ رَسُولُ اللهِ صَلَّى اللهُ عَلَيْهِ وَسَلَّمَ: مَنْ قَامَ مَعَ الإِمَامِ حَتَّى يَنْصَرِفَ كُتِبَ لَهُ قِيَامُ لَيْلَةٍ

Абу Зарр розияллоҳу анҳу айтади: “Росулуллоҳ соллаллоҳу алайҳи ва саллам: “Ким имом билан (таровиҳ) намоз(и)нинг охиригача турса, унга тун бўйи намозда турганлик савоби ёзилади”, дедилар”. Термизий (806), Абу Довуд (1375), Насоий (1605), Ибн Можа (1327).

Рамазон саноқли тунлардан иборат бўлиб, оқил киши уни ғанимат билади, уйқу ава беҳуда ишлардан таровиҳ ва таҳажжуд намозларини афзал кўради. Таровиҳ намозини масжидда ҳам, уйда оила аъзолари билан жамоат бўлиб ҳам ўқиш мумкин.

Tushingizda Rasululloh sollallohu alayhi vassallamni ko‘ring!