Қиз фарзанд

Кўп койиманг, ёмон сўз айтманг,
Орзу чўғин ногоҳ кул ёпса.
Кўнгил совиб меҳрдан қайтманг,
Аёлингиз қиз фарзанд кўрса.

Неъматмасми, фазилатмасми,
Қалбингизга нур, зийнатмасми?
Юзга солиш дард, миннатмасми,
Аёлингиз қиз фарзанд кўрса.

О,қиз бола жаннатнинг гули,
Эзгу амалларга бой йўли.
Яратганнинг тақволи қули,
Аёлингиз қиз фарзанд кўрса.

Муслимаю,Солиҳа бўлар,
Уйингизга барака тўлар.
Қиз бор уйда гўзаллик кулар,
Аёлингиз қиз фарзанд кўрса.

Тирноқ бер деб ўтинган қанча,
Дард-у ҳасрат ютинган қанча.
Сиз шукр денг, қодир қилганча,
Аёлингиз қиз фарзанд кўрса.

Росул Акрам суйган фарзанд- қиз,
У дунёнгиз қилар жаннат-қиз.
Рози бўлиб, ҳамдлар айтинг  сиз,
Аёлингиз қиз фарзанд кўрса.

✍ Дилобар Ўрoлова