Seni soʻradilar.

Seni soʻradilar nogoh mendan,
Oʻylanib qoldim jim osmonga boqib.
Yoshlarim yashirmoq istadim biroq,
Koʻzimdan tomchilar ketdiku, oqib.

Seni soʻradilar atay yo bexos,
Yerga bosh eggancha qoldim oʻylanib.
Ismingni eshitib ketdi halovat,
Uzoq xoʻrsingancha qoʻydim oʻrtanib.

Seni soʻradilar sogʻmi ? omonmi ?
Qanday yuribsizlar ? toʻy qachon ? deya.
Zabonsiz tilim lol ichimda olov,
Dedim: endi unga boshqasi ega.

Seni soʻradilar qayerda ? hozir,
Kim bilan ekaning bilolmay hayron.
Bilmasam degandek bosh chayqab qoʻydim,
Atrofga alanglab boqqancha giryon.

Seni soʻradilar boʻgʻzimda titroq,
Hislar ogʻushida sarmast uchardim.
Jonsiz tanam uzra hayajon ila,
Hayolan boʻlsada seni quchardim.

Seni soʻradilar kuldim, soʻng yigʻlab,
Ovutmoq istardim tuygʻularimni.
Imkonim boʻlsaydi, iloj topsaydim,
Yashardim takroran u kunlarimni.

Seni soʻradilar ne dey ularga...


Muallif: #Guli_Abdulhamidovna

Bizning manzil
👉 @dil_ijodkori 👈
Oʻzgacha hislar maskani 🤍✨https://t.me/dil_ijodkori