“Markaziy Osiyo universitetlari forumi” doirasida fransiyalik iqtisodchi, Nobel mukofoti sovrindori Jan Tirol Toshkentga tashrif buyurdi.

Jan Tirol 2014-yilda Iqtisodiyot yoʻnalishi boʻyicha “Monopoliyalarni boshqarish va bozorni tartibga solish tahlili uchun“ mazkur mukofot bilan taqdirlangan.

Forumning birinchi bosqichi “Markaziy Osiyoning maʼnaviy va intellektual uygʻonishi” deb nomlanib, unda jahon ilm-fan va taʼlimidagi nufuzli olimlar maʼruzasi tashkillashtirilgan edı.

Forumning navbatdagi kunida talabalar uchun maʼruza hamda ochiq muloqot sessiyalari boʻlib oʻtdi. Ikki sessiya orasida fransiyalik iqtısodchi olim Jan Tirol bılan muzokaralar olib bordik.

Ochiq muloqot sessiyasida Jan Tirol “Xalq farovonligiga erishish“ mavzusidagi izlanishlari bilan boʻlishdi.

Taʼlim tizimiga dunyo tajribasini olib kirish hamda zamonaviy islohotlar haqida muhokamalar olib borish maqsadida tashkillashtirilgan ochiq muloqotda AQSH, Xitoy, Germaniya, Janubiy Koreya, Buyuk Britaniya, Kanada, Hindiston kabi 20 ta davlatdan 160 dan ziyod ishtirokchi qatnashish taklifini bildirgan. Mamlakatimizdan esa qariyb 60 ta taʼlim sohasidagi xalqaro tashkilot rahbarlari hamda 97 ta xorijiy oliygoh vakillari ishtirok etdi.

Muloqot yakunida ishtirokchilar oʻzlarini qiziqtirgan savollarga javob olib, maxsus sovgʻalar bilan taqdirlandi.

Maʼlumot uchun, xalqaro forum mintaqada ilk bor Prezident tashabbusi bilan tashkillashtirilgan boʻlib, Oʻzbekiston Respublikasi Maktabgacha va maktab taʼlimi vazirligi, Yangi Oʻzbekiston universiteti va boshqa hamkorlar bilan birgalikda oʻtkazilmoqda.

@hilola_umarova