Adolat SDP | Buxoro viloyati Kengashi Rasmiy kanali

Xalq deputatlari Vobkent tuman Kengashi deputati Dilorom Qodirovaning tashabbusi bilan "Choʻrikalon" OSHP hududida 40 tup mevali daraxt ekildi

Tabiatni asrash, yashil muhitni kengaytirish va ekotizimni mustahkamlash bugungi kunda har bir fuqaroning burchiga aylangan. Xususan, bu borada jamoatchilik vakillari, deputatlar va faollar o‘z hissalarini qo‘shishmoqda.

Xalq deputatlari Vobkent tuman Kengashi deputati Dilorom Qodirova ham tabiatni muhofaza qilish va yashillikni ko‘paytirish maqsadida o‘z tashabbusi bilan "Cho‘rikalon" ovul fuqarolar yig‘ini hududida 40 tup mevali daraxt ekilishiga bosh-qosh bo‘ldi. Ushbu ezgu ish natijasida bog‘ barpo etilib, kelajakda aholiga foyda keltiradigan hosil beruvchi mevali daraxtlar ekildi.

Mazkur tadbir nafaqat ekologik muhitni yaxshilashga, balki mahalliy aholining farovonligini oshirishga ham xizmat qiladi. Chunki ekilgan daraxtlar nafas olayotgan havoni tozalaydi, atrof-muhitga ijobiy ta’sir ko‘rsatadi va kelgusida hosil berib, fuqarolar uchun foyda manbaiga aylanadi.

Deputat Dilorom Qodirova bunday tashabbuslar doimiy davom etishini, yashil hududlarni ko‘paytirish bo‘yicha kelgusida ham faoliyat olib borishini ta’kidladi. Shu bilan birga, u barchani atrof-muhitni muhofaza qilishga, daraxt ekish va ularni asrab-avaylashga chaqirdi.

Aholi vakillari ham ushbu ezgu tashabbusni qo‘llab-quvvatlab, daraxt ekish jarayonida faol ishtirok etishdi. Kelajak avlodlar uchun toza havo va yashil muhit yaratish bugunning dolzarb vazifasi ekanligi yana bir bor o‘z isbotini topdi.

Ushbu tadbir yurtimizda olib borilayotgan "Yashil makon" umumxalq loyihasi doirasidagi ishlarga hamohang bo‘lib, deputatlar va faollar tashabbusi bilan yashillik maydonlarini kengaytirish bo‘yicha amaliy harakatlar davom etmoqda.

Kogon shahrida yoshlarning ta’lim olishi uchun amaliy yordam ko‘rsatildi

O‘zbekiston “Adolat” sotsial-demokratik partiyasi tashabbusi bilan yoshlarning ta’lim olishi yo‘lida tizimli ishlar amalga oshirilmoqda. Kogon shahar “M.Ulug‘bek” MFYda yashovchi Holiqova Ozoda farzandi Muhitdinova Madinabonuning Buxoro davlat texnika universitetiga to‘lov-kontrakt asosida o‘qishga qabul qilingani, ammo to‘lovni amalga oshirishda moliyaviy qiyinchiliklarga duch kelayotganini bildirgan holda murojaat qildi.

Mazkur masalani joyida o‘rganish maqsadida ishchi guruh tuzilib, Kogon shahar hokimi o‘rinbosari, shahar Yoshlar ishlari agentligi rahbari, mahalla hokim yordamchisi, yoshlar yetakchisi hamda fuqarolar ishtirokida muammo o‘rganildi. O‘rganish natijasida fuqaroga tegishli huquqiy maslahatlar berildi va masala hal etildi.

Ushbu tashabbus Xalq deputatlari Kogon shahar Kengashi deputati Shohijaxon Isamutdinov tomonidan ilgari surilib, aholiga amaliy yordam ko‘rsatildi. Mahalliy hokimiyat va tegishli tashkilotlarning hamkorlikda ishlashi natijasida yoshlarning ta’lim olishi yo‘lidagi to‘siqlar bartaraf etilib, ularning kelajagi uchun muhim qadam qo‘yildi.

Kogon shahar Kengashi yoshlarning ta’lim va rivojlanishiga ko‘maklashish, ularning ijtimoiy muammolarini hal etishda davom etadi.

O‘zbekiston “Adolat” SDP Vobkent tuman Kengashi: Aholi muammolarini hal etish yo‘lida izchil ishlar olib bormoqda

O‘zbekiston “Adolat” sotsial-demokratik partiyasi Vobkent tuman Kengashi raisi B. Shavkatilloev va partiya faollari tumandagi aholi muammolarini o‘rganish, ularni hal etishga ko‘maklashish maqsadida bir qator mahallalarda faoliyat olib bormoqda.

Joriy yilning 19-fevral kuni Vobkent tumanining "Anjirbog‘" va "Xalach" mahalla fuqarolar yig‘inlari (MFY)da yashovchi aholi bilan yakkama-yakka muloqot o‘rnatilib, 61 ta xonadon o‘rganildi. Shuningdek, 2 ta ijtimoiy tashkilot faoliyati tahlil qilindi. O‘rganishlar davomida fuqarolar tomonidan jami 11 ta murojaat kelib tushdi. Ulardan 1 tasi bo‘yicha deputatlik so‘rovi chiqarildi, 10 ta murojaat bo‘yicha esa tegishli tashkilot xodimlari yordamida huquqiy maslahat berildi.

Partiyaning “Muammo bilan yuzma-yuz” loyihasi doirasida tumandagi "Anjirbog‘" MFYda istiqomat qiluvchi fuqarolar bilan muloqot tashkil etildi. Muloqot davomida mahallaning Bozorjoy qishlog‘ida yashovchi fuqarolar xonadonlarda ichimlik suvi yetarli darajada kelmayotganini bildirishdi. Ushbu muammoni bartaraf etish maqsadida Vobkent tuman “Oqova suv” korxonasi xodimlari jalb qilinib, ish olib borildi. Suv ta’minoti tizimini yaxshilash uchun maxsus smeta asosida mablag‘ ajratish rejalashtirildi.

Bundan tashqari, xalq deputatlari Vobkent tuman Kengashi deputati D. Qodirova tomonidan mahallalarda aholi o‘rtasida ovqatdan zaharlanish, botulizm kasalliklari bo‘yicha tushuntirish ishlari olib borildi. Xususan, “Anjirbog‘” MFYda joylashgan 11-sonli maktabda maktab xodimlari uchun sanitariya qoidalariga rioya etish bo‘yicha targ‘ibot-tashviqot tadbirlari o‘tkazildi.

Ishchi guruh a’zolari kelgusi haftada Vobkent tumanining “Vobkent” va “Quruvchi” MFY hududida yashovchi fuqarolar bilan uchrashuvlar tashkil etishni rejalashtirmoqda. Ushbu uchrashuvlar doirasida mahalla aholisi bilan bevosita muloqot olib borilib, ularning muammolari o‘rganiladi hamda tegishli tashkilotlar bilan hamkorlikda amaliy yordam ko‘rsatiladi.

O‘zbekiston “Adolat” SDP Vobkent tuman Kengashi fuqarolar muammolarini tizimli ravishda hal etishga intilib, aholining ijtimoiy hayotini yaxshilash yo‘lida o‘z faoliyatini davom ettirmoqda.

Uch avlod uchrashuvi – ajdodlar an’analarining davomchilari

Jamiyat taraqqiyotining muhim omillaridan biri – yosh avlodning intellektual salohiyati, sog‘lom turmush tarzi hamda ma’naviy yetukligidir. Xalqimiz orasida kecha, bugun va kelajakni birlashtiruvchi uch avlod uchrashuvi kabi ma’naviy-ma’rifiy tadbirlar ezgu an’anaga aylangan. Ana shunday tadbirlardan biri Kogon shahar Xo‘jabargi mahallasida bo‘lib o‘tdi.

Mazkur tadbirda uch avlod vakillari – nafaqadagi ustoz-murabbiylar, hozirda faoliyat yuritayotgan pedagoglar hamda bilimga chanqoq yoshlar ishtirok etishdi. Bu uchrashuv faxriy ustozlar va tajribali pedagoglar uchun o‘z bilim va tajribalarini yoshlarga yetkazish imkoniyatini yaratdi. O‘z navbatida, o‘quvchilar ham ustozlarining ibratli hayot yo‘li va tajribalaridan saboq oldilar.

Tadbir davomida jajji o‘g‘il-qizlar she’rlar o‘qib, qo‘shiqlar kuylab nuroniy otaxon va onaxonlarga quvonch ulashdilar. Bu esa avlodlar o‘rtasidagi mehr-oqibat rishtalarini mustahkamlashga xizmat qildi.

Shuningdek, tadbir doirasida “Yashil makon” umummilliy loyihasi asosida uch avlod vakillari birgalikda nihol ekib, tabiatga mehr-muhabbat namunasini ko‘rsatishdi. Ushbu ezgu ish yurtimizda ekologik muhitni yaxshilashga, yoshlarni tabiatni asrab-avaylash ruhida tarbiyalashga qaratilgan yuksak qadriyat ekanini yana bir bor namoyon etdi.

– Yoshlarimizning ulug‘ ajdodlarga munosib avlod bo‘lib voyaga yetishi, yurtimiz taraqqiyotiga daxldor bo‘lib yashashi har birimiz, ayniqsa, yoshlarga tarbiya berayotgan insonlarning burchidir, – deydi Xo‘jabargi mahallasi raisi, xalq deputatlari Kogon shahar Kengashi deputati Kimyo Yodgorova.

Ushbu uchrashuv avlodlar o‘rtasidagi uzviy bog‘liqlikni mustahkamlash, yoshlarni ajdodlar yo‘lidan borishga undash va ularning ma’naviy kamolotiga hissa qo‘shish yo‘lida muhim ahamiyat kasb etdi. Ma’naviy-ma’rifiy qadriyatlarimizni asrab-avaylash va yosh avlodga yetkazish barchamizning sharafli burchimizdir.

Kogon shahrida “Ma’naviy ko‘makchi”lar uchun viloyat seminar-treningi o‘tkazildi

Bugun Buxoro viloyati mahallalarida faoliyat olib borayotgan “Ma’naviy ko‘makchi”lar uchun Kogon shahar hokimligida viloyat seminar-treningi bo‘lib o‘tdi. Ushbu tadbir “Ma’naviy ko‘makchi”larning bilim va tajribalarini oshirish, ularning faoliyatini yanada samarali tashkil etish hamda mahallalarda ma’naviy-ma’rifiy ishlarni rivojlantirish maqsadida tashkil etildi.

Seminar-trening davomida ishtirokchilarga og‘ir toifadagi 55 ta mahalladagi aholini kambag‘allik ruhiyatidan chiqarish, ularda sog‘lom dunyoqarashni shakllantirish va kambag‘al oilalarning ijtimoiy faolligini oshirish bo‘yicha amaliy tavsiyalar berildi.

Tadbirda viloyat Kengashi deputati Marhabo Pardayeva ham ishtirok etib, “Ma’naviy ko‘makchi”larning jamiyatdagi o‘rni, ularning aholiga ko‘rsatayotgan ma’naviy va psixologik yordami muhimligini ta’kidladi. Shuningdek, u kambag‘allikni kamaytirish, aholining farovonligini oshirish va mahallalarda ijtimoiy muhitni yaxshilash borasida o‘z fikr-mulohazalarini bildirdi.

Seminar-trening ishtirokchilari o‘zlarini qiziqtirgan savollarga javob olish barobarida, tajribali mutaxassislar tomonidan berilgan amaliy tavsiyalarni o‘z faoliyatlarida qo‘llash imkoniyatiga ega bo‘ldilar. Tadbir yakunida “Ma’naviy ko‘makchi”larga kelgusida amalga oshirilishi lozim bo‘lgan vazifalar yuzasidan yo‘riqnomalar berildi.

Mazkur seminar-trening viloyat mahallalarida ijtimoiy faollikni oshirish, aholining hayotga bo‘lgan munosabatini o‘zgartirish va ularni ma’naviy qo‘llab-quvvatlash yo‘lidagi muhim qadamlardan biri bo‘ldi.