Bolalar yozuvchisi

​​Koʻp oʻquvchilarim kitoblarimni qayta-qayta oʻqishi haqida yozishadi.
 
Aslida, 3-kitobni bir oydan keyin ham eʼlon qila olishim mumkin. Sababi asarning butun syujetini qurib boʻlganman. Muammo shundaki, undan koʻnglim toʻlmadi.
 
Shu holatda eʼlon qilsam ham Gollivudning bir marta koʻrishga arzirli filmlari kabi, bir marta oʻqishli kitob boʻlishiga ishonaman. Lekin menga oʻquvchimning asarimni qayta-qayta oʻqishi muhim. Aynan shu bilan yozganimga baho beraman.
 
Biror asarning qayta-qayta oʻqilishi u berayotgan hissiyotlarga bogʻliq. Yaʼni asarning syujetini yodlab olish mumkin, lekin hissiyotlarni yod olib boʻlmaydi. Bu hissiyotga faqat uni qayta oʻqib yetish mumkin. Oʻquvchi syujetni emas, hissiyotni sogʻinadi.
 
Oʻylashimcha, qimmatbaho turshak, xaritaning Ahmad barmogʻidan topilishi, Ahmadning aslida Meriyalik yigit boʻlib chiqishi, Hodisalar gorizonti va Annigilyatsiya hodisalari oʻquvchimga shu hislarni beradi.
 
3-kitobga kelsak, men ana shu hislarni bera oladigan, favqulodda gʻoya va hodisalarni yetarlicha topa olmadim.
Sizchi, agar “Galaktikada bir kun”ni qayta o‘qisangiz, bunga sizni nima undaydi?

Muvaffaqiyat nisbiy tushuncha. Shuning uchun muvaffaqiyatli boʻlishni juda oson ish deb bilaman. Hayotda yaxshi odam boʻlish va baxtli yashash qiyin! Shu sabab yil yakunida yutuqlarimni sarhisob qilishni xushlamayman.

Qilgan xayrli amallaringiz, ota-onangizga, yaqinlaringizga va boshqalarga qilgan yaxshiligingiz, ularga baxt-quvonch ulasha olganingiz, aslida, shular muhimroq, qiyinroq.

Oldimga biror bir maqsadni qoʻyarkanman, oʻylayman. Unga yetib olgunimcha men yaqinlarimni qiynab qoʻymaymanmi? Bir vaqtda ularni baxtli qila olamanmi? Odamlar uchun xayr bormi? Javobim “ha” boʻlsa, shu maqsadga intilaman, “yoʻq” boʻlsa undan oson voz kechaman. U qanchalik jozibali, ulugʻvor koʻrinmasin, men uchun muhim qadriyatlardan ustun tura olmaydi.

Agar bu hayotda qandaydir muvaffaqiyatga erishgan boʻlsam, men unga kurashib, ogʻir mehnat bilan yetib bormadim. Shunchaki, oʻsha muvaffaqiyatdan ustun narsalarni belgilashga intildim. Erishmoqchi boʻlgan narsalarim esa oʻz-oʻzdan kelaverdi…

Hayotda ota-ona va yaxshilarning duosi eng katta muvaffaqiyat ekanini anglab yetdim. Shu sababli yil yakunida qilgan yaxshi va yomon amallarimni sarhisob qilib, mulohaza qilishga odatlandim. Bu men uchun muvaffaqiyat qozonishning eng oddiy va sodda formulasiga aylandi.

Yosh doʻstlarim, siz ham oʻylab koʻring. Siz uchun hayotda nima muhim? Oʻzingiz uchun belgilab olishning vaqti kelmadimi?

@bolalar_yozuvchisi

She’r menga yoqdi, lekin muallifi sir ekan :)

“Galaktikada bir kun” asarimni yozayotganimda men shu saytdan foydalanganman.

Fizik olim Muzaffar Qosimov esa asarimni oʻqib, uning ilmiy taraflarini tahrirlab bergan.

Hayotimdagi jiddiy oʻzgarishlar taqdirning biror “hazili” bilan ro‘y berishiga oʻrganib qolganman. Ishimni necha marta oʻzgartirgan boʻlsam, doim shunday boʻlgan.

Respublika taʼlim markazidan boʻshaganimdan soʻng ilmiy ishimni yakunlab qoʻyish uchun 6 oy davomida uyda boʻldim. 2023-yilning dekabr oyiga kelib bir doʻstimning tavsiyasi bilan xususiy universitetda ishlamoqchi boʻldim. Universitet rektori bilan bogʻlanib, uchrashuv vaqtini belgiladik. Oʻsha kuni kostyum-shimlarni kiyib, qoʻlimga rezyumeni olib uydan chiqdim. Uchrashadigan vaqtimiz telegramdan rektor yozib qoldi, zarur ishi chiqib qolibdi.

Endi uyga qaytaman deb tursam Mehrinoz Abbosova qoʻngʻiroq qilib qoldi. Agentlikka taklif qilib, “Mutolaa” nomli loyiha ish boshlayotganini, loyiha rahbari men bilan maslahatlashmoqchi boʻlayotganini aytdi. Oʻsha holimda toʻgʻri Yoshlar ishlari agentligiga keldim. Agentlik rahbari Alisher Sadullaev, loyiha rahbari Sirojiddin Olimov, Mehrinoz va men biroz suhbatlashib masalani hal qilib qoʻya qoldik.

Mana oradan bir yil oʻtibdi. Oʻtgan vaqt mobaynida koʻp ishlar qildik. Masalan, 750 ta (400 dan ortigʻi roman va qissalar) kitobning audiolashtirilishiga bosh-qosh boʻldim. Umuman olganda hozir natijalar haqida yozmoqchi emasman. Oʻsha kungi taqdir “hazili”dan hamon minnatdor ekanimni yozgim keldi. Agar kelajakda biror jiddiy oʻzgarishni kutsam, taqdirning “hazili”ga albatta qarayman.

Bu oʻziga xos, gʻaroyib qonuniyat!