Vashington kundaligi

"Anthropic" kompaniyasining "Claude" botini ishlatadiganlar bormi? Ba'zan boshqacha va yaxshiroq javob olarman, deb "ChatGPT"dan so'ragan savollarimni unga ham tashlab ko'raman. Ko'pincha, "Claude"ning javoblari "ChatGPT"nikidan yaxshiroq chiqyapti.

"ChatGPT"ni yig'ishtirib, "Claude"ning pullik versiyasiga o'tib ketsammikan?

@bmamadiev

Rossiya sudi "Google" kompaniyasini jarimaga tortdi. Jarima miqdori qancha, deysizmi? 2 detsillion dollar. Bu raqamda 2,000,000,000,000,000,000,000,000,000,000,000 dollar bo'ladi.

Sud hukmiga ko'ra, "Google" kompaniyasi "YouTube" saytida Rossiya kanallarini bloklagani uchun hukumatga shuncha jarima to'lashi kerak.

Qiyos uchun: butun dunyo iqtisodiyotlarining umumiy hajmi 110 trillion dollar atrofida. Jarima miqdori bundan 18 kvintillion (18 000 000 000 000 000 000) marta ko'p.

Agar jarimani to'lasa, "Google' kompaniyasi Rossiya bozoriga qaytishi mumkin, deyiladi hukmda. Agar to'lamasa, jarima miqdori kundan kunga oshib boradi, deya ogohlantiradi Rossiya sudi.

@bmamadiev

AQShda prezidentlik sayloviga bir hafta qoldi. Kurash respublikachilar nomzodi Donald Tramp va demokrat Kamala Harris o'rtasida kechadi.

Ommaviy so'rovlarga qarasak, tomonlarning imkoniyati deyarli teng. Ba'zi muhim shtatlarda Harris hatto biroz oldinda ekani aytilyapti.

2016-yilgi so'rovlarda ham Hillari Klinton Trampdan biroz oldinda edi, lekin amalda Tramp yutib ketganini ko'rdik. Xullas, so'rovlardagi xatolik darajasi (margin of error), odatda, Tramp foydasiga ishlaydi.

Uzoq yillar o'zini siyosatdan nari tutgan dunyoning eng boy odami Ilon Mask bu safar hammaning diqqat markazida. U bor kuchi bilan, millionlab dollar mablag'i bilan Trampni saylashga urinmoqda. Tramp bilan birga saylov kampaniyalarida faol qatnashmoqda.

Mask har oy Tramp saylov kampaniyasi uchun 45 million dollar ajratishini ma'lum qilgan. Bundan tashqari, Pensilvaniya shtatida so'z erkinligi himoyasi uchun tashkil qilingan petitsiyaga imzo chekkanlar o'rtasida lotereya o'tkazib, har kuni bir kishiga bir million dollar pul beryapti. Maqsad - Tramp tarafdorlarini saylovga ko'proq jalb qilish.

Vaholanki, Ilon Mask ilgari Trampga qarshiligi bilan tanilgan tadbirkor edi. Endi esa nafaqat Trampning saylanishini, balki Oq uydan o'ziga lavozim ham umid qilyapti. Katta ehtimol bilan unga hukumat xarajatlarini qisqartirish bilan bog'liq vazifa beriladi. Agar Tramp yutsa.

Menimcha, Tramp yutadi.

@bmamadiev

🔊Ishga taklif qilamiz!!!

"MahallaUSA" O’zbek-Amerika jamiyati qoshidagi innovatsion “ZiyoArt” o’quv markazi ishga taklif qiladi!


"Tasviriy San'at-ART" to'garagi rahbari, O'zbekiston San'at arbobi Xurshid Nazirovga yordamchi o'qituvchi lavozimiga tanlov e'lon qilindi.

📎Tanlovning asosiy shartlari:

• O’z yo’nalishida professional bilim va tajriba;
• O’qitish metodikasi va pedagogik texnikasi haqida yetarlicha malaka;
• O’quvchilarni ilhomlantirish va rag’batlantirish qobiliyati;
• Nyu-York shahri yoki yaqinida yashash.


💵Munosib ish haqi to’lanadi.

📧Talabgorlardan rezyumelarini
ziyoartcenter@gmail.com
manziliga yuborishlarini so’raymiz.

☎️Murojaat uchun telefon:
1 (929) 613-3934
1 (929) 551-5051

📍Manzil:
8778 Bay Parkway, Brooklyn, NY, 11214

@bmamadiev

Mish-mishlarga qaraganda, "Open AI" kompaniyasi dekabr oyida "ChatGPT-5" modelini taqdim qilishi kutilyapti va u "ChatGPT-4"ga qaraganda 100 barobargacha (!) qudratliroq bo'lishi mumkin.

Bu modeldan boshida faqat "Microsoft" kabi yirik kompaniyalar foydalanishi taxmin qilinyapti; oddiy foydalanuvchilarga to'g'ridan-to'g'ri ulanish imkoniyati berilmaydi.

@bmamadiev

Isroil Eronga qilingan hujum nihoyasiga yetganini ma'lum qildi.

@bmamadiev

Isroil Eronga hujum boshlanganini ma'lum qildi.

@bmamadiev

O'zbekistonda sun'iy intellekt asosida ishlaydigan "ChatGPT" botidan foydalanuvchilar ko'p. Ularning aksariyati xizmatdan, aynan, o'zbek tilida foydalanadi.

"ChatGPT" o'zbek tilida ham juda yaxshi ishlayotgani haqida avvalroq yozgan edim. Turli joylarda ko'zim tushgan misollardan bildimki, vatandoshlarimiz "ChatGPT" modeliga sen deb murojaat qilar ekan. 🙂 Uni qilib ber, buni yoz va hokazo.

Albatta, bu matoh odam bo'lmagandan keyin, sizlashga nima hojat, deb so'rashingiz tabiiy...

Yaqinda bir tadqiqot o'tkazilibdi. "ChatGPT"ga takalluf va iltimos bilan, uni maqtab va rahmat aytib murojaat qilinsa, oddiy so'rovlardan ko'ra javobi yaxshiroq chiqarkan.

Nima bo'lganda ham, bu model odamzot yaratgan matnlar asosida qurilgan va odamlarning muomalasini, muomalaga yarasha javob bo'lishini yaxshi biladi. Shundandir balki, javoblardagi farq.

Men ham ba'zan "ChatGPT"ni maqtab qo'yaman: sen zo'rsan, baraka top, deb (ingliz tilida). Shunda u xursandligidan iljayib turgan smaylik jo'natib qo'yadi. 😀

@bmamadiev

Bitta savol tug'ilib qoldi. Nega ingliz tilini o'rganayotgan hozirgi yoshlar faqat IELTS topshiryapti? Yaqin orada TOEFL topshirgan odam haqida biror marta eshitmadim.

Bizning davrimizda chet elda o'qishni xohlaganlar, odatda, TOEFL topshirar edi. O'zim ham TOEFL topshirganman.

TOEFL - AQShdagi nodavlat tashkilot tomonidan boshqariladigan ingliz tili sinovi.

IELTS - Britaniya kengashi va "Cambridge English" tomonidan boshqariladigan ingliz tili sinovi.

Hamma yoppasiga IELTSga o'tib ketganining biror sababi bormikin?

@bmamadiev

G'azodagi gumanitar vaziyatni yaxshilash bo'yicha AQSh Isroilga bir oy muhlat berdi. Agar vaziyat yaxshilanmasa, ya'ni G'azoga har kuni kamida 350 ta yuk mashinasida gumanitar yordam o'tishiga ruxsat berilmasa, Vashington harbiy yordamni qisqartirishi haqida ogohlantirdi.

Bundan tashqari, mish-mishlarga ko'ra, Isroilning Eronga hujumi AQShdagi saylovlardan oldin yuz berishi kutilyapti. AQShdagi prezidentlik saylovi 5-noyabrga belgilangan.

Isroil o'z hujumida Eronning yadro va neft inshootlarini nishonga olmaslik haqida Vashingtonga va'da bergan.

AQSh va Isroil bu so'zlarida qanchalik tura oladi, ko'ramiz.

@bmamadiev

“Tesla”ning kechagi taqdimoti investorlarni qoniqtirmadi. Bugun birja ochilishi bilan aksiyasi narxi to’qqiz foizga (!) tushib ketdi.

Asosiy sabab - Mask da’vo qilgan kelajak va rejalarning amalga oshishiga hali ancha qovun pishig’i bor, deb hisoblashmoqda.

@bmamadiev

Kamida ikkita fan bo'yicha Nobel mukofoti bu yil sun'iy intellekt sohasida ishlaydigan olimlarga nasib qildi. Yutuq olganlarning uch nafari "Google" kompaniyasida ishlaydi yoki ishlagan.

Fizika bo'yicha Nobel mukofoti sun'iy intellekt inqilobiga turtki bergan fundamental kashfiyotlari uchun professorlar Jef Hinton va Jon Hopfildga berildi. Ular "sun'iy neyron tarmoqlari yordamida mashinalarga o'rganish imkoniyatini beruvchi asosiy kashfiyotlari va ixtirolari" uchun taqdirlandi. Jef Hinton yaqingacha "Google" kompaniyasida ishlagan.

"Google"ning yana ikki xodimi Demis Hasabis va Jon Jamper ham Kimyo bo'yicha Nobel mukofotiga sazovor deb topildi. Ular sun'iy intellekt yordamida protein strukturasini aniqlashda erishgan yutuqlari uchun mukofotlandi.

@bmamadiev

"Milton" to'foni munosabati bilan O‘zbekistonning AQShdagi elchixonasi Florida shtatidagi o‘zbekistonliklardan ehtiyot choralarini ko‘rishni so‘radi.

Ofat yuz bergan hududlarda yashayotgan bo'lsangiz va sizga shoshilinch yordam kerak bo‘lsa, O‘zbekistonning AQShdagi elchixonasiga quyidagi telefon raqamlari orqali murojaat qilishingiz mumkin:

+1-202-251-8298
+1-202-300-9526

To‘fon natijasida jabrlanganlar AQShning Favqulodda vaziyatlarni boshqarish Federal agentligining quyidagi ishonch raqamlariga ham murojaat qilishlari so‘raladi:

- Shoshilinch tibbiy yordam: 911

- Favqulodda vaziyatlarni boshqarish Federal agentligi raqamlari:
(800) 621-3362
(800) 462-7585
(800) 985-5990
umumiy masalalar bo‘yicha: +1-202-646-2500

- Florida shtati ko‘mak liniyasi: +1-800-342-3557

- Florida shtati Evakuatsiya qilishga ko‘maklashish xizmati: +1-800-729-3413

@bmamadiev

Nyu-York shahar meri Erik Adamsga qarshi korrupsiya bilan aloqador bir nechta federal jinoyat ishi bo'yicha tergov olib borilmoqda.

Adams Nyu-Yorkdagi o'zbeklar jamiyati bilan yaqin va jamiyatning deyarli barcha yirik tadbirlarida faol qatnashib kelgan. Qizig'i - shahar meriga qo'yilgan ayblovlardan biri o'zbeklar bilan bilan bog'liq.

"Nyu-York Tayms" nashrining yozishicha, Nyu-Yorkdagi qurilish kompaniyasi rahbari, asli o'zbekistonlik Tolib Mansurov Adamsning saylov kampaniyasiga noqonuniy yo'l bilan pul o'tkazgan va evaziga undan biznesini yuritishda yordam so'ragan. Adams Mansurovning Bruklinda qurilishi to'xtab turgan binosiga hokimiyatdan tegishli ruxsatni olishda yordam bergani da'vo qilinmoqda.

Adamsga qo'yilgan boshqa ayblovlar ham Nyu-Yorkda yashovchi turkiy jamoalar vakillari bilan bo'lgan noqonuniy oldi-berdilar haqida.

Bu mashmashalar ortidan Adamsning bir qator yordamchilari o'z ixtiyori bilan ishdan bo'shagan; ayrimlari jinoyatga sherik sifatida tergovga tortilgan.

Erik Adams ayblovlarni rad etmoqda.

@bmamadiev

Kecha “Men, robot” (I, Robot) filmini qaytadan tomosha qildim. Kinoda sun’iy intellekt inson nazoratidan chiqib ketishi hamda robot va insonlar o’rtasidagi kurash aks etgan.

Film boshida shunday bir epizod bor. Robotlarni o’lguday yomon ko’radigan detektiv Del Spuner texnika hech qachon odam bilan tenglasha olmasligini Sanni ismli robotga (bosh qahramonlardan biri) shunday tushuntiradi: sen hech qachon simfoniya (murakkab musiqiy asar) bastalay olmaysan; go’zal tasviriy san’at asarlarini yaratish qo’lingdan kelmaydi.

Kinodan bugungi kunga qaytamiz. Bizda hali bu kinodagidek robotlar yo’q, lekin sun’iy intellekt allaqachon Betxoven darajasida simfoniya bastalayapti; u yaratgan tasviriy san’at asarlarini esa professional rassomnikidan farqlash qiyin.

Men 10 yil ichida kinodagidek harakatlana oladigan (jangari tryuklardan tashqari) va muloqot qiladigan robotlar yaratilishiga va xonadonlarga kirib borishiga ishonaman. Birgina, “Figure” kompaniyasi taqdim etgan prototipga qarang. Va bundan buyog’iga o’zgarishlar juda tez sodir bo’ladi…

Mutaxassislarning aytishicha, insoniyat hozir 5-sanoat inqilobiga qadam qo’ymoqda. Ayrimlarga ko’ra, bu insoniyat tarixidagi oxirgi sanoat inqilobi bo’lishi mumkin.

Bugun odamlar ishlatadigan texnologiyalarning 99,9 foizi oxirgi 250 yil ichida yaratilgan. To’rtta sanoat inqilobi ham shu davr ichida ro’y bergan va bu muddat jami insoniyat tarixining bor-yo’g’i 0,1 foizini tashkil etadi.

Vaholanki, bugungi odam zoti kamida 200 ming yoshda ekani taxmin qilinadi. Insoniyat tamaddunining tamal toshi hisoblanadigan dehqonchilik kashf qilinishi uchun qariyb shuncha vaqt sarflangan; ya’ni ilk agrar tizim bundan 12 ming yil oldin paydo bo’lgan. Buyuk kashfiyotlardan yana biri – g’ildirak ixtiro qilinishi uchun yana, taxminan, 8-9 ming yil ketgan (er. av. 3500-yil). Oradan yana ikki ming yilcha o’tib, temir kashf qilindi. Milodiy era boshlanishi bilan kashfiyotlar sur’ati ancha tezlashdi. Oxirgi 250 yil ichida esa favqulodda darajada…

Matematikada ekponensial o’sish degan tushuncha bor. Ya’ni, boshida o’sish sekin boshlanadi va vaqt o’tib, karrasiga oshib boradi. Tabiatda bunga misollar ko’p: o’simliklar, bakteriyalar va aholining o’sishi; yadroviy zanjirli reaksiya oqibatida atomlarning bo’linishi va hokazo.

Futurolog Rey Kurzveylga ko’ra, texnologiyadagi o’sish ham xuddi tabiatdagi jarayonlar kabi eksponensial o’sishni boshdan kechiradi va yaqin kelajakda chiplar bugungi chiplardan millionlab marta kuchli bo’ladi.

Har ikki yilda chipdagi tranzistorlar soni ikki baravarga oshib borishi haqidagi Mur qonuni bunga bir dalil. O’tgan asrning 60-yillaridan beri bu qonun (bashorat) buzilmasdan, amalda o’z isbotini topib kelmoqda; ya’ni har ikki yilda chiplarning hisob-kitoblarni amalga oshirish quvvati kamida ikki barobarga o’syapti.

Shunga asoslanib ba’zi ekspertlarning taxmin qilishicha, keyingi 4-5 yil ichida miqyosi oxirgi yuz yilda sodir bo’lgan o’zgarishlar bilan teng texnologik o’sish yuz beradi.

Kinoga qaytamiz. “Men, robot” filmi 2035-yil haqida; kinoning o’zi 2004-yilda suratga olingan. Ijodkorlar eksponensial o’sish bo’yicha ancha optimist bo’lgani ko’rinib turibdi: 2035-yilgi Chikago manzarasi, ayniqsa, transport infratuzilmasi bugungi kundan ancha ilg’or.

Keyingi 10 yil ichida AQShda bunday infratuzilma bo’lishiga men ishonmayman. Demak, ba’zi yo’nalishlarda, masalan, ijrosi hukumatning keng ishtiroki va nazoratini talab qiladigan sohalarda tez o’sishni kutmagan ma’qul.

Ammo robotlar va sun’iy inellekt haqidagi tasavvurlar, menimcha, real kutilmalarga yaqin.

@bmamadiev