Yod et,
borlig‘imni olib ketgan kuz
tunda hilol bo‘lib qaytganda unsiz.
Sen bu xazonlardan burib ketma yuz,
ular yulduz bo‘lib yongaylar, yulduz!.

Olis-olis ketgan pinhon so‘qmoqlar
bir kun yetgay axir dalli daryoga.
o‘sha so‘qmoqlarda jim yo‘qolganlar
daryo bo‘lib qaytar yorug‘ dunyoga...

Bunda yulduzlarga ko‘chgan xazonlar-
fazolarda yongan mening bir jonim.
Boshingga yulduzlar to‘kilgan onlar
meni yod et pinhon,
meni yod et jim...