Бек АЛИ ижоди

​​БИЗНИ БУ КЎЧАДА ДУЧ ҚИЛГАН ХУДО,
Бизни бошлаб келган турли юмушлар.
Соғинган кўзларим – икки фуқаро,
Ичиккан кўзларинг – иккита музтар.

Толиққан асабим Паганинининг
Эговлаб қўйилган икки торидир.
Кўзларинг, айт, менга, қайси денгизнинг
Тунда товланувчи балиқларидир.

Гарчи у бардошдир, гарчи сўзи жўн,
Ва лекин бир уюм тош эмас эркак.
Ахир кўзларинг ҳам сен ёзган қонун-
қоидадан чиқиб йиғласа керак.

Бечора қўлларим, чўри қўлларим,
Сенга чўзилмоққа сиғмади ҳадди.
Бир жуфт кўзларингни меҳрибон Роббим,
Қийшиқ қовурғамдан қандай яратди...

Сен дуо қилардинг, кела қолса-чи,
Халоскор автобус – чиқсам – жўнасам.
Мен савол берардим, безабон савол,
Мени севасанми, наҳот ҳали ҳам...

Бизни бу бекатда дуч қилган Худо,
Ёмғирларни булут, булутни шамол
Пойтахт осмонига ҳайдайди мудом.
Ўша пайт кўчага чиқар бир аёл.

Ўша пайт шу йўлдан ўтар бир эркак,
Қарагин, барчасин сабабчиси сен.
Қунишиб борасан, бахтсизсан, демак,
Ўша бахтсизликнинг муаллифи мен.

Бизни бу кўчада дуч қилган Худо!

Бек АЛИ
2025 йил. Февраль.

Telegram | Facebook | Instagram| YouTube

​​ДАРД-ҲАСРАТ ЧЕКИШНИ НАЙДАН ЎРГАНДИМ,
Бедорлик сабоғин ойдан ўргандим.
Қаддимни кўтариб қўйганди осмон,
Қадримни тўкишни лойдан ўргандим.
Чақмоқлар қаҳрдан берганди улги,
Болалик шаҳридан келганди кулги.
Беуқув саналдим, ношуд саналдим
Ва шунда қувликдан дарс берди тулки.
Кўнглимга кенгликни бахш этган далам,
Хешу ақрабога кўрсатди карам.
Кимлардир лаб босиб тузатай деса,
Кимдир оёқ ювган булоқлар – ярам.
Қушлар ин солганди содда кўзимга,
Ёприлиб келганда, кузда, узумга.
Ёққан қорлар сабаб, келган қиш сабаб,
Ишкомдай чувалдим ёлғизлигимга.
Шоир бўлади деб, ким ҳам ўйлабди,
Худо шундай сийлаб, шундай қийнабди.
Қанча шеър пиширди, қанча куйдирди,
Тандирдан ранг олган юрагим тафти.
Дарёдай бир лаҳза тўхтамай оқди
Тумандай муаллақ кезган хаёллар.
Одамнинг ўғлиман, менга ҳам ёқди,
Гуноҳ мевасини еган аёллар.
Мен ҳасрат чекишни найдан ўргандим,
Бедорлик ҳузурин ойдан ўргандим.
Кўзи очилмаган вулқон эдим мен,
Ичдиму портлашни майдан ўргандим!
О, севгим, ғуссадан бергансан таълим,
Икки мусичадай бўзлар кўзларим.
Ёлғон гапиришни ўргандим, аммо
Оғир мусибатни сўзлар кўзларим.
Издиҳом ичида кулоҳ бостириб,
Бемақсад, бемаъно сузар кўзларим.
Кун бўйи ютоқиб таскин қидирар,
Тунларни сақичдай чўзар кўзларим.
Кўчани чангитиб юрган болалар,
Азон янграётган шомдай қуюлди.
Бир чимдим бахт туйдим, умрим шу сафар
Болам чайнаётган нондай туюлди.
Ўйинчоқ бешикни тебратган қизлар,
Бугун фариштадай маъсум онадир.
Қисматга кўнишни ўргандим, дўстлар,
Мен учун бу дунё расадхонадир!

Бек АЛИ
2025 йил. Февраль.

Telegram | Facebook | Instagram| YouTube

​​БАҲОРГА ЕТАМИЗМИ… БАҲОРГА?..
Савол берди бир кун эркак аёлга.
Ўттиз йил тиним йўқ – бир кундай ўтди,
Шу савол эркакка кун бермай ўтди.
Ўтди ғаму ситам, ўтди гиналар,
Мактабга ҳам чиқди гўдаккиналар.
Лекин биз келмадик битта қарорга,
Баҳорга етамизми… Баҳорга?..

Баҳорга етамизми… Баҳорга?..
Мунғайиб боқади эркак аёлга.
Тоғларга чиқардик, гуллар терардик,
Денгиз бўйларида… – дунё кўрардик.
Кўрардик китобда ўқиганим у –
Шоирлар кафтидан сув ичган оҳу.
Боғнинг этагида оққан анҳорга,
Баҳорга етамизми… Баҳорга?..

Баҳорга етамизми… Баҳорга?..
Гуноҳкор боқади эркак аёлга.
Жонгинам, бу оғир тунлар чўзилди,
Ишга кетар эдим, кўнглим бузилди –
Бу қаҳҳор тонгларда жунжикди этим,
«Бахтлиман» деб, сени алдаган эдим.
Ҳақиқий тонгларга, ростгўй наҳорга,
Баҳорга етамизми… Баҳорга?..

Баҳорга етамизми… Баҳорга?..
Синовчан тикилди эркак аёлга.
Негадир жавобдан туяди ҳадик,
Наҳот, наҳот уни бирга яшадик?
Баҳорнинг ёмғири, баҳор шамоли,
Ёғдими, эсдими… ҳайрат йўқолиб,
Буткул хароб бўлдик, биров сездими?
Бизни тутмайдими баҳор уволи?
Менинг юрагимни хаста қилди куз,
Қиш сенинг сочингни тўлдирди қорга.
Худо хоҳласа, юз ёшга етамиз,
Баҳорга етамизми… Баҳорга?..

Бек АЛИ
2025 йил. Январь.

Telegram | Facebook | Instagram| YouTube