Бейишке карай жол

Мен сабыр кылам. Билемин, Аллах сабыр кылган пенделерине кандай иштеринде болсун, аягын ийгилик эшиктерин ачып берет. Аллах сабырдуулар менен бирге...
⠀
Мен жашоомо ыраазымын. Билемин, Аллах" Ар Роззааку - Өтө чоң ырыскы берүүчү" шүгүр кылган пенделеринин ырыскысын ар тараптан кенен кылып, жашоосун берекеге толтурат...
⠀
Мен дуба кылууну токтотпоймун. Билемин, Аллах дуба менен жашообузга келелек кырсык- балээ, оорулардын жолун тосуп, сактап, келген сыноолордон жеңил чыгып кетүүдө жардам берет. Анткени Анын убадасы " Силер дуба кылгыла, Мен силерге жооп берейин " деген.
⠀
Мен намазымды эч качан таштабай окуп жүрүүнү Алладан көп - көп сураймын.Ал мени таштап кетүүсүнөн коркомун. Билемин, Аллах алдында бир гана намазым менен жүзүм жарык жолугам. Анын, " Мен силерди Мага моюн сунуп, ибадат кылууңар үчүн жараттым, Мага кайтасыңар, сабырдуулук менен намазыңарды окуп, Өзүңөрдү тозоктун отуну болуп калуудан сактангыла " деген сөздөрү кулагыма жаңырып турат...
⠀
📖 "Эң сонун ысымдар Аллатыкы. Ага ошол сонун ысымдары менен дуба кылгыла.”
⠀
(Аьрааф сүрөсү, 180-аят)
⠀
" Ал Барру- Пенделерине жакшылыгын мол кылып берүүчү" Эгем менин! Жакшылыгыңдан үмүт, каарыңдан корккон, коркуу менен үмүттү жүрөгүмө толтургун Йа, Раббым! Ар бир күнүмдө билип - билбей кылган күнөөмдүн  эсебин эске салгын, берген нематтыңды сезип, шүгүр кылган денемди Өзүңө толук моюн сундургун. Өзүң кечирип, Өзүң ыраазы болуп күтүп алган кулуң мен болоюн!
⠀
🤲🏻Жума маарек болсун жакшылар!
⠀
🧕 Насиба Абдуллаева.

https://t.me/formulakg

🛐НАМАЗ ОКУП ЭМНЕ ТАПТЫҢ?!
⠀
Аллах Таала чоң атам менен чоң энемди  ырайымына алсын. Ошо кишилер басса - турса эскертип, кээде мактап, кээде урушуп, таң агаргандан баштап " тургула намаз окугула, кеч калды, болгула !" деп кайра - кайра айтып жатып намаз окуганды үйрөткөндөр эле... Атам кичүү баласы болгондуктан, мен чоң атам менен чоң энемдин колдорунда чоңойдум. Үйүбүз тоонун түбүндө күн кышында тийбейт, суугуна карабай, намаздын аба менен суудан да зарыл экенин кулагыма куюп, жети - сегиз жашымдан эле  чоң энем ээрчитип алып, даарат алса даарат алып, намаз окуса кошулуп окуп жүрүп,  жүрөгүмө орнотуп салыптыр жарыктык энем. Ушул күнгө чейин башыма келген оор сыноолордун курчоосунда калсам да, окуган намазымдын шарапаты менен жеңил өткөрүп, сынбадым. Азыр менде намаз калтыруу деген түшүнүк жок. Бир аз эле  ооруп калсам дароо " Оо, Раббым! Намазымдан ажыратпа, акыркы демиме чейин тилиме, денеме жеңил кыл, намазым менен Өзүңө жолугайын" деп дуба  кылам. Намаздын жашоом үчүн канчалык пайдасын ойлогон сайын, күн суукта эшик алдында чоң энемдин " Тургула намаз окугула !" деген чакырыгын эстеп ыраазы болуп, Алладан алардын билип - билбей кылган  күнөө - каталарын кечиришин тилеймин. ..
⠀
Намаз жашообузда эң маанилүү ибадат экенин Пайгамбарыбыз саллаллооху алейхи салам өлөөр алдыңда " Үммөтүм, үммөттүм, үммөттүм! Намазга бекем  болгула, намазыңарды өз убагында окугула, намазсыз бейишке кире албайсыңар, намазыңар жок Аллах алдында эч кимсиңер " деп эскертип кетти...
⠀
Намаз жөнүндө жаза берет, эскерте берет деп, намазга маани бербеген, кээде окуп, кээде таштап, анан баштаймын -  деп жүргөн туугандарым! Намаз окуп эмне таптың десеңиз:
⠀
Акылым менен Алланы таанып, жүрөгүм менен сезип, өзүмдүн ким экенимди билип,  жашоомдогу максатымды таптым. Дайыма кыжаалат болгон жүрөгүм тынчып, маанайым ачылып, башыма кандай сыноо келсе да стресс - депрессия дегенди жеңил чыккан жолду таптым. Жаман ойлор кетип, жашоого кызыгып,  караңгылап калган дүйнөмө жарык кирди, анткени Аллахты таптым. Сиз менен мен күтүп, чакырып, издеп жүргөн бакыттын сырын таптым. Мен бактылуумун.
"Ким Жаратканды тапса, ал бүт нерсени тапканы. Ким Аны жоготсо, ал бүт нерсени жоготкону."
⠀
Дегеним, жашоомдогу эң маанилүү, зарыл ишим деп намазды эсепте. Намазды өз убактысында берилүү, кунт коюу менен оку. Тамак ичүүнү унутуп калбаган сыяктуу намазды да унутпа. Намаз – сенин максатың,  үмүтүң,  жашооң,  өмүрүң болсун!
⠀
Эгер ушундай болсо, анда сүйүнө бер: сен Алланын  коргоодосуң, периштелер дубасындасың, дайыма ырыскың ашып- ташып турат, өмүрүң берекелүү болот.
⠀
“Аллахым мени да, менин урук-урпагымды да намаз окуучулардан кыл” (“Ибрахим” сүрөсү, 40-аят).
⠀
🧕Автор: Насиба Абдуллаева.
⠀
https://whatsapp.com/channel/0029VaQYm319MF8wbonIs907

🌧️Алгачкы кар менен кошо жааган үмүт..
⠀
Мына бүгүн алгачкы жааган  кардын биринчи күнү. Баткен жергесинде көп жылдан бери кар жаабай эле кыштан чыгып кетебиз. Быйыл эл катары эле кар тоңдурган суугу менен жаап кирип келди. Негизи көбүнчө тереземден сыртка, асманга, жаратылышка  карап, Жараткандан жараткан кооздуктарына тафакур кылып, ойго салганды жакшы көрөм. Айланага көз чаптырсам эмнегедир баары үнсүз, тынч. Куураган дарактар,  сумсайып, жалбырактары саргайып, түшүп куурашы, жашоонун кандайдыр бир бөлүгү аяктаганынан кабар бергендей. Ушул күнгө чейинки басып өткөргөн  жолумда эмнелерди кылдым, эмне менен алек болдум көз алдыма тартылып, шурудай тизмектелип элестелди. Бул жылы  менин көп жылдан бери күрөшүп келген жашоодогу сыноолорго  Жараткандын мага күтпөгөн унутулгус жакшылыгы, сыйы болду,  канча шүгүр айтсам да аздык кылат. Оо, Раббым! .. дедим, Сага чексиз шүгүрлөр болсун, менин жакшы деп билген пландарым, каалоомдон, Сенин планың, каалооң эң жакшы, алгачкы жааган  кар менен кошо жааган үмүтүмдүн келечегинин  жарыгын мындан да  жакшысын  бересиң деп ишенемин, үмүт кылам!
⠀
Кичинемде, кар жаап турган  асманды карасам үлбүрөгөн кар бүртүкчөлөрү биринин артынан бири жаап, жүзүмө түшкөндө, бала кыялга оролгон таза аруу тилектерим менен көөпкө карап, өйдөгө карап учаар элем. Бала кезимде кыялкеч кыштарда жашаган болсом,  а азыр үмүттүү кыштарды өткөрүүдөмүн. Жааган аппак  кар кулагыма үнсүз шыбыроосу менен ар бир  кыштын тоңдурган суугу болгон менен артынан жылуулугу менен үмүтсүз жандыктарга  жыңы жашоонун багытына жол көрсөткөн  жазы бар.  Ар бир караңгы түндүн эртеңки жакшылыкка үмүт берген  таңы бар.
⠀
فَإِنَّ مَعَ الْعُسْرِ يُسْرًا
⠀
"Акыйкатта, кыйынчылык артынан жеңилдик келет "
⠀
إِنَّ مَعَ الْعُسْرِ يُسْرًا
⠀
"Аныгында, кыйындыкты улай жеңилдик келет."  - деген  Курандагы: Шарх сүрөсүнүн: 5-6 аяттарын)  мага эскертип турганын айткансыды. Жашоонун жаңы барактарын ачып, үмүт берген бул кыштын эң биринчи кары эле. Апаппак кар өлкөбүздү, жан дүйнөбүздүн кара тактарын тазалап, жууп кетсин...
⠀
Бүгүн жааган алгачкы карда мен ушуну ниет кылып, дуба кылдым...
⠀
👤Автор: Насиба Абдуллаева.
⠀
https://whatsapp.com/channel/0029VaQYm319MF8wbonIs907