​​Kuzni yashamadik sen bilan
Yaproqlar sochmadik boshimiz uzra
Kuzak yomg‘iriga qo‘shiq aytmadik.
Yolg‘izim.

Sayr qilolmadik biror marta ham
Bahorrang, osmonrang mashinamizda
Men sochlarim yoyib,
Sen hirgoyi qilib.

Va kirib kelmadik yelim haltada,
Go‘sht,  sabzi,  yong‘oqlar ko‘tarib,
Shiftiga yulduzlar qo‘ndirib,
Devorga baxt rangi chizilgan
Kitobli,  qo‘shiqli uyimiz
qulfini ochgancha
tabassum bilan.

Xiyobon kezmadik biror marta ham,
Kuzgi quyoshning foydasi bor deb,
Ko‘zlari, sochlari seniki kabi
Bolakay bilan...

Va men arazlab,
qamalib olmadim kutubxonaga
Topgin deb atay.

Biz kuzni bilmadik, azizim,
Biz kuzni kutmadik, azizim.
Balki biroz go‘zal bo‘lardi
Yomg‘irlar ichida ketmoqlik.
Telefon ekraniga tomib
Surating kuydirsa tomchilar
Go‘zalroq bo‘lardi azizim,
Kuzga aylanganim qaytadan.
Sendan ayrilganim chindan ham...

t.me/beIlezzaa