Surxondaryo viloyati hokimligi

Prezidentimiz tomonidan belgilangan yangi tizim doirasida aholining tomorqa va ijara yerlaridan samarali foydalanish orqali daromadlarini oshirishga qaratilgan chora-tadbirlar izchil amalga oshirilmoqda. Shu maqsadda tashkil etilgan Respublika seminari ayni paytda Surxondaryo viloyatida o‘tkazilmoqda.

Mazkur tadbirda Kambag‘allikni qisqartirish va bandlik vaziri Botir Zaxidov ham ishtirok etib, yurtimizning turli hududlaridan tashrif buyurgan mutasaddilar bilan birga Termiz tumani “Qahramon” mahallasida joylashgan Surxondaryo tomorqa maktabi, Angor tumani “Bahor” va “Ilg‘or” mahallalarida yetishtirilayotgan mahsulotlarning eksport jarayonlari, shuningdek, Qumqo‘rg‘on va Sariosiyo tumanlarida tomorqadan samarali foydalanish hamda ko‘chatchilik loyihalari bilan tanishdi.

Seminar doirasida mahallalarda tomorqa va ijara yerlaridan unumli foydalanish, xususan, “Bir mahalla – bir mahsulot” tamoyili asosida olib borilayotgan ishlarni yanada rivojlantirish, eksportga yo‘naltirilgan mahsulotlarni ko‘proq yetishtirish orqali aholi daromadlarini oshirish bo‘yicha muhim chora-tadbirlar belgilandi.

Shuningdek, seminar ishtirokchilariga Surxondaryo viloyatida yaratilgan ilg‘or tajriba taqdim etilib, ushbu modelni mamlakatimizning boshqa hududlarida ham keng joriy etish zarurligi qayd etildi.

Surxondaryo.uz | Telegram | Facebook | Instagram | YouTube | X

Yurtimizda tadbirkorlikni rivojlantirish, sanoat salohiyatini oshirish va mahalliy mahsulotlarni xalqaro bozorga chiqarishga qaratilgan chora-tadbirlar izchil davom etmoqda. Jumladan, mahsulotlar sifatini tekshirish, standartlash, sertifikatlash va xalqaro talablarga moslashtirish bo‘yicha maslahat xizmatlari ko‘rsatish hamda eksport jarayonlarini qo‘llab-quvvatlash ishlari tizimli tashkil etilmoqda.

Shu maqsadda, Surxondaryo viloyati hokimi Ulug‘bek Qosimov bugun O‘zbekiston Milliy metrologiya instituti DK, "O‘zTest" DUK va Texnik jihatdan tartibga solish sohasidagi davlat inspeksiyasining viloyat filiallari faoliyati bilan tanishdi. Mutasaddilar tomonidan korxonalarning o‘tgan yildagi faoliyati, ko‘rsatilayotgan xizmatlar va kelgusi rejalar haqida ma’lumot berildi. Shuningdek, korxonalar faoliyatini rivojlantirish, eksport jarayonlarini yengillashtirish, xizmat turlarini kengaytirish va ularning sifatini oshirish yuzasidan tegishli ko‘rsatmalar berildi.

Shundan so‘ng, Angor tumanidagi "Yangi turmush" mahallasda joylashgan kichik sanoat zonasida ishga tushirilayotgan loyihalar va Termiz shahridagi "Shimoliy darvoza" suv ishlab chiqarish inshooti hududida 3 MVt quvvatli quyosh fotoelektr stansiyasini barpo etish ishlari bilan tanishildi.

Surxondaryo.uz | Telegram | Facebook | Instagram | YouTube | X

Termiz shahriga 100 ta zamonaviy avtobus olib kelinadi

Transport vazirligi xabariga ko‘ra, Xitoyning “Zhongtong Bus Holdings Co., Ltd” kompaniyasi, CIB banki hamda “SINOSURE” sug‘urta tashkiloti vakillari bilan videokonferensaloqa shaklida muzokaralar o‘tkazildi.

Muzokaralar davomida Termiz, Olmaliq va Toshkent shaharlariga zamonaviy avtobuslarni xarid qilish loyihalarini moliyalashtirish masalalari muhokama qilindi. Xususan, Termiz shahrida jamoat transporti xizmatlari sifatini oshirish maqsadida “Termiztransportxizmat” MCHJ tomonidan 100 dona zamonaviy avtobus sotib olish rejalashtirilmoqda.

Ushbu loyiha shahar aholisi uchun qulay, xavfsiz va samarali transport xizmatlarini tashkil etishga xizmat qiladi.

Surxondaryo.uz | Telegram | Facebook | Instagram | YouTube | X

So‘nggi yillarda Prezidentimiz rahbarligida migratsiya masalalari davlat siyosati darajasida ustuvor yo‘nalish sifatida belgilanib, bu sohada tizimli islohotlar amalga oshirilmoqda. Xususan, 2019-yilda O‘zbekiston Migratsiya bo‘yicha xalqaro tashkilotning (IOM) to‘liq a’zosi sifatida ushbu tashkilot bilan hamkorlikni yo‘lga qo‘ydi. Shu davr mobaynida mehnat migratsiyasi jarayonlarini tartibga solish va zamonaviy mexanizmlarni joriy etish maqsadida 16 ta normativ-huquqiy hujjat qabul qilindi.

Bugun Surxondaryo viloyati hokimi Ulug‘bek Qosimov Migratsiya bo‘yicha xalqaro tashkilotning O‘zbekistondagi missiyasi rahbari Endryu Grey boshchiligidagi delegatsiyani qabul qildi. Uchrashuv davomida O‘zbekiston va IOM o‘rtasida samarali hamkorlik yo‘lga qo‘yilganligi ta’kidlanib, milliy hamkorlar, xususan, Surxondaryo viloyati hokimligi bilan muvofiqlashtirish mexanizmlarini mustahkamlash, manfaatdor tomonlar uchun biznesni rivojlantirishga qaratilgan loyihalarni takomillashtirish masalalari yuzasidan fikr almashildi.

Uchrashuv yakunida tomonlar hamkorlikni yanada kengaytirish va yangi loyiha hamda tashabbuslarni amalga oshirish bo‘yicha kelishuvga erishildi.

Xalqaro migratsiya tashkiloti delegatsiyasining Surxondaryo viloyatiga tashrifi doirasida "Barqaror hayot" nodavlat notijorat tashkiloti va Termiz kargo markazi vakillari bilan uchrashuvlar o‘tkazilishi rejalashtirilgan.

Surxondaryo.uz | Telegram | Facebook | Instagram | YouTube | X