Azizbek Xasanov matematika kanali

O‘quvchilarning STEM fanlariga qiziqishini oshirish masalalari muhokama qilindi
February 07, 2025

Joriy yilning 7-fevral kuni Ta’limni rivojlantirish respublika ilmiy-metodik markazida Taʼlimni rivojlantirish markazi, Toshkent shahridagi Turin politexnika universiteti va Ixtisoslashtirilgan taʼlim muassasalari agentligi huzuridagi Fan olimpiadalari markazi vakillari o‘rtasida uchrashuv bo‘lib o‘tdi.
Unda Umumiy oʻrta, oʻrta maxsus, boshlangʻich professional taʼlim tashkilotlari oʻquvchilarning STEM fanlariga boʻlgan qiziqishlarini oshirish, iqtidorli oʻquvchilarni aniqlash va ragʻbatlantirish uchun fan olimpiadasini tashkil qilish, shuningdek taʼlimni rivojlantirishda turli yoʻnalishlarda hamkorlik qilish masalalari muhokama qilindi.

Shuningdek, uchrashuv davomida Taʼlimni rivojlantirish respublika ilmiy-metodik markazi, Toshkent shahridagi Turin politexnika universiteti va Fan olimpiadalari markazi oʻrtasida qoʻshma qaror imzolandi hamda 2025-yil aprel-iyun oylarida matematika, fizika, informatika va axborot texnologiyalari fanlari bo‘yicha respublika miqyosida Iqtidorli Bolalar Respublika Olimpiadasini (IBRO-2025) tashkil etishga kelishib olindi.
Olimpiadani oʻtkazishdan maqsad yurtimizda muhandislik sohasida faoliyat olib borishni xohlovchi yoshlarni tarbiyalash va iqtidorli, qobiliyatli va isteʼdodli yoshlarni aniqlash, ulardagi ijodiy qobiliyatlarning roʻyobga chiqishiga koʻmaklashish va qoʻllab-quvvatlashdan iborat.

Olimpiada uch bosqichda (tuman, viloyat va respublika kesimida) oʻtkaziladi. Birinchi bosqich (tuman) — onlayn tarzda 1–7-aprel kunlari tashkil etiladi. Birinchi bosqichda ishtirok etish uchun roʻyxatdan oʻtish, qatnashish va natijalarni aniqlash https://testbor.uz/ taʼlim platformasi orqali amalga oshiriladi.
Har bir fan kesimida ishtirokchilar orasidan ballar ketma-ketligida
5 nafargacha gʻolib aniqlanadi. 1–5-oʻrinlarni egallagan ishtirokchilar tashkiliy qoʻmitaning qarori bilan ikkinchi bosqichda ishtirok etish uchun tavsiya etiladi.
Ikkinchi bosqich – Qoraqalpogʻiston Respublikasi, viloyatlar va Toshkent shahri miqyosida 13–20-may kunlarida onlayn tarzda oʻtkaziladi. Yakuniy tanlovda ishtirok etish uchun ikkinchi bosqichda har bir hudud kesimida 1–5-oʻrinlarni egallagan oʻquvchilar saralab olinadi.
Uchinchi bosqich – Final bosqichi – 2–8-sinf oʻquvchilari uchun onlayn shaklda oʻtkaziladi. 10-11-sinf oʻquvchilari uchun Toshkent shahridagi Turin politexnika universiteti binosida oʻtkaziladi.

2–9-sinf oʻquvchilari orasidan TOP–100 talikka kirgan oʻquvchilarga 6 ta kategoriya boʻyicha turli miqdorda pul mukofotlari beriladi.
10-11-sinf oʻquvchilari orasidan matematika, fizika va informatika fanlari boʻyicha TOP–10 talikka kirgan oʻquvchilarga 5 ta kategoriya boʻyicha turli xil texnika vositalari bilan taqdirlanadi. Shuningdek, eng koʻp va eng tezkor toʻgʻri yechim topgan oʻquvchilarga –iPhone 16 telefoni taqdim etiladi.
Matematika, fizika va informatika fanlarida birinchi, ikkinchi va uchinchi oʻrinlarni egallagan (jami 18 nafar) oʻquvchilar Astrum Korea IT Akademiyasi (AKITA) va Toshkent shahridagi Turin politexnika universitetlariga 100 foiz grant asosida imtihonsiz qabul qilinadi.
Olimpiada gʻoliblarini mukofot jamgʻarmasi 1 milliard soʻmni tashkil etadi. Olimpiada yakunida eng faol ishtirok etib yuqori oʻrinlarni qoʻlga kiritgan maktab jamoasi aniqlanib bosh sovrin — BYD Chazor avtomobili sovgʻa qilinadi.

@Xasanovmatematikakanali