Urgut sadosi gazetasi

Ўзбекистон Республикаси Вазирлар Маҳкамасининг 2025 йил 19 апрелда қабул қилинган “Айрим турдаги товарларни божхона чегараси орқали олиб ўтиш тартибини такомиллаштириш чора-тадбирлари тўғрисида”ги қарорига мувофиқ, 2025 йил 1 майдан жисмоний шахслар томонидан шахсий эҳтиёж учун республикага товарларни божсиз олиб кириш нормалари белгиланди.

Ушбу нормаларни жамоатчиликка етказиш мақсадида божхона органлари ходимлари томонидан тарғибот ишлари олиб борилмоқда.

Жумладан, “Жартепа” чегара божхона пости ходимлари томонидан йўловчиларга жисмоний шахслар томонидан шахсий эҳтиёж учун товарларни божсиз олиб кириш ва олиб чиқиш миқдорий нормалари тўғрисида батафсил тушунтиришлар бериляпти.

Фуқаролар учун қулайлик яратиш мақсадида электрон ва босма маълумот варақалари, инфографик флаерлар тарқатилмоқда.

@urgutsadosigazetasi

УРГУТ МАҲАЛЛАЛАРИ ОБОД БЎЛМОҚДА

Ургут туманида жамоатчилик ва ҳомийлар кўмагида маҳаллаларда ободонлаштириш ишлари изчил давом этмоқда. Айниқса, йўлларни таъмирлаш ва аҳоли учун қулай шарт-шароит яратиш борасида бир қатор амалий ишлар олиб бориляпти.

Жумладан, Дўстлик маҳалласининг ички йўли ҳомий ташаббуси билан асфальтлаштирилмоқда. Терсак маҳалласининг ички йўллари ҳам ҳомийлар кўмагида тош ва шағал ётқизиш орқали таъмирланмоқда.

Шу билан бирга, маҳаллаларда ободонлаштириш ишлари ҳам қизғин паллага кирган. Дарахтлар оқланиб, янги кўчатлар экилаётгани, яшил ҳудудлар кенгаяётгани эътиборлидир.

Аҳамиятлиси, мазкур ишлар маҳаллий аҳоли иштирокида, ҳашар асосида амалга оширилмоқда.

@urgutsadosigazetasi

#Китобхонлик_ҳафталиги_2025

"Китобхонлик ҳафталиги" доирасида буюк саркарда ва давлат арбоби Амир Темурнинг бетакрор тарихий мероси — «Темур тузуклари» асарига бағишланган тарғибот тадбири бўлиб ўтди.

Тадбирда туман Ички ишлар бўлими ходимлари, “Жасорат қалқони” мактабининг фаол китобхон ўқувчилари ҳамда китобхонликни тарғиб қилувчи бошқа фаоллар иштирок этдилар.

Маънавий-маърифий руҳда ўтган мазкур тарғибот Туман марказий кутубхонаси абонемент ва фойдаланувчиларга хизмат кўрсатиш бўлими мутахассиси Моҳичеҳра Сафоева ташаббуси билан ташкил этилди.

Тадбирда сўзга чиққанлар "Темур тузуклари" асари орқали Амир Темурнинг давлат бошқаруви, ҳарбий стратегияси ва инсонпарварлик ғоялари ҳақида теран билимларга эга бўлиш мумкинлигини таъкидлаб ўтишди.

Улар китобнинг мазмун ва моҳияти, у орқали ёш авлодга етиб бораётган тарихий сабоқлар ҳақида фикр билдириб, уни ҳар бир ёш ўқиб чиқиши лозим бўлган асар сифатида эътироф этдилар.

@Urgutsadosigazetasi