“Sheʼriyat”da sheʼr joʻshdi

    Mushoiramisan mushoira. Dillar adabiyotda gulladi. Nazm nasimlari yeldi. “Sheʼriyat” adabiy klubi tuygʻuyu hayajonlarda, sheʼru oltin fikrlarda toʻlqinlandi.

    Oʻzbekiston Yozuvchilar uyushmasi qoshidagi “Sheʼriyat” adabiy klubida avval, Zulfiyaxonim tavalludiga bagʻishlangan mushoira suhbatlari avjlandi. “Ona qalbi oyoqqa tursa, Oʻgʻlim sira boʻlmaydi urush” kabi Zulfiyaxonimning mangu uygʻoq sheʼrlari yurak-yurakdan oʻqildi. Zumrad Abrayevaning oʻqigan sheʼrlari qalblarga yetib bordi. Obod Jumayeva tuygʻularini misralarda ifodaladi. Halim Malik teran savollari bilan “Sheʼriyat”ning mohiyatini ziynatladi.

    Oʻzbekiston Yozuvchilar uyushmasi aʼzosi, shoir Mengnor Ollomurod Komil Xorazmiy haqida soʻzladi.

    “Sheʼriyat” adabiy klubida jajjilaru oʻquvchilar, isteʼdodlaru muxlislar faol qatnashdi. Hamma sheʼr aytdi. Bahor nafasi yoʻgʻrilgan misralar taraldi. Anjuman ayni mavj pallasida shoira Madinaning sheʼrlari, soʻzlari barchani maftun etdi. Tadbir qiziqarli va mazmunli oʻtdi.

Muzaffar Qurbonov
Oʻzbekiston Yozuvchilar uyushmasi
Surxondaryo viloyat boʻlimi adabiy xodimi
https://t.me/Sheriyatadabiyklubi/236?single