Сизнинг Фотимангиз бўлгим келяпти!

Гўзал юзингизнинг нурига тўйиб,
Худди саҳобалар суйгандек суйиб,
Улуғвор меҳрингиз қалбим-ла туйиб,
Сизнинг Фотимангиз бўлгим келяпти!

Бу кун гуноҳларга ботганман бирам,
Умидим улардан покласин Эгам,
Агарчи муносиб бўлолмасам ҳам,
Сизнинг Фотимангиз бўлгим келяпти!

Расулим, бу юрак сизни соғинган,
Аммо гуноҳлардан қаттиқ оғринган.
Ғафлат ғуборлаган шу қалбим билан
Сизнинг Фотимангиз бўлгим келяпти!

Сизни севолмаган юрак юракмас,
Бу қалбнинг амридир, асло даракмас.
Севгингиз дилимда туйиб ҳар нафас,
Сизнинг Фотимангиз бўлгим келяпти!

Биламан,бу умид осмонча олис,
Аммо муштипарнинг истаги холис.
Қалбимни ҳар замон ўртайди шу ҳис,
Сизнинг Фотимангиз бўлгим келяпти!