Ўлмасбек Самарқандий🇺🇿

#Iftor_yaqin

БАЛИҚҚА БОРМАЙМИЗМИ 🐠

Ифтор чоғи дўстларнинг,
Кўнглини олмаймизми?
Йиғилишиб бугун бир,
Балиққа бормаймизми? 🐟

Кун бўйи ишлаймиз-ку,
Меҳнатдан толмаймизми?
Ҳаммасин четга суриб,
Балиққа бормаймизми?

Балиқ тайёр бўлгунча,
Суҳбатлар қурмаймизми?
Ғаниматдир бу кунлар,
Балиққа бормаймизми?

Дардимиз айтиб бир-бир,
Кўнглимиз ёрмаймизми?
Дардимизни аритиб,
Балиққа бормаймизми?

Эҳ дўстим йўлимизни,
Дарёга бурмаймизми?
Умр ўтиб кетмоқда,
Балиққа бормаймизми?

Ўлмасбек Самарқандий.

@Samarqandiy77

Баҳор келса эркаклар,
Бироз чўчиб кетишар.
Шамол бўлиб, 7 чида,
Кўкка учиб кетишар.

Саккизинчи март куни,
Ерда қолган эркаклар.
Айтиб берар қизларга,
Қизиқ-қизиқ эртаклар.

Йигитларнинг йилда бир,
Кўзидан ёш оққайдир.
Байрам куни шу ёшлар,
Ёмғир бўлиб ёққайдир.

Қилманг ўша кун яна,
Жанжал ёки ғавғолар.
Ўн тўртинчи январда,
Берилмаган совғалар.

Бизнинг байрам байрамми,
Ҳеч кўнглимиз тўлмади.
Бир йил вирус, бир йили,
Аномал деб бўлмади.

Қаранг шамол увиллар,
Дарахтлар қилар оҳ вой.
Бизни кўкка учириб,
Кетмоқчи-ёв ҳойнаҳой.

Қўрқманг, хавотир олманг,
Биз яна кўришамиз.
Тўққизинчи март куни,
Ерга қайтиб тушамиз😄

Ўлмасбек Самарқандий.
@Samarqandiy77

​​​​М У А Л Л И М

Тингланг сизга сўйлайин, ровийлар ривоятин,
Фикр этиб сўнгра уни англарсиз кифоятин.
Бир муаллим яшабди, қай замондир номаълум,
Ҳасму-ҳоли не билмам, бир касбу-кори маълум.

Сабоқ берди дарс берди, донишманду, даҳога,
Умри битиб ниҳоят, кетди дорулбақога.
Тумонат халқ - шогирдлар, борар қабристон томон,
Сўнгги йўлга кузатди, муаллимни оломон.

Йўл юрди у хўб узоқ, кўринмасди зоҳири,
Сирот кўприги сари келди устоз охири.
Биларди у, шу ерда азму-ажр нақдлигин,
Гуноҳкорнинг кўприкдан йиқилмоғи нақдлигин.

Балки, домла фанода ғофилроқ банда бўлган,
Эҳтимол дарс чоғлари намози канда бўлган.
Орттириб беролмаган, закот, фидя муносиб,
Яшаб ўтди бир умр ҳаж-у, умра бенасиб.

Кимнидир койигандир, илму урфон бобида,
Қанча гуноҳ борлигин билмасди ҳисобида.
Қиёматда - сўроқда, билмам қандоқ сўз олар,
Мактаб илми деб баъзан, қазо бўлган рўзалар.

Оғир ўйга чўмди у, ботди ғамнинг рошига,
Наҳотки етолмаса қилкўприкнинг бошига?!
Олдинда эса ўша - икки дунё аро роҳ,
Қиличдан ҳам ўткирроқ, қилдан ҳам ингичкароқ.

Ваҳм соларди ғоят, тубсиз жарлик ҳайбати,
Етиб келди ниҳоят муаллимнинг навбати.
Кўзларин юмди устоз, фосиқ хаёл сурмай деб,
Қилкўприк остидаги жаҳаннамни кўрмай деб.

Тўзғиган хаёлларин йиғди бемажол, хаста,
Қўрқувдан чекиб озор, кўзларин очди аста.
Билмади, қанча вақтин, хаёлларга йўргабди,
Не кўз билан кўрсаки, сирот йўли тугабди!

Жаннатнинг остонаси, кўрингани ҳақиқат,
Қилкўприкда йўл юрди, роса қирқ беш дақиқа.
Наҳот етдим беҳиштга, тақдирим қутлуғ экан,
Демак фоний дунёда гуноҳларим йўқ экан.

Шу чоғ арши-аълодан, кимдир бир ваҳий деди,
- Эй муаллим, аслида, гуноҳларинг кўп эди!
Қилкўприкдан ўтмоққа, сенга толеъ ёр экан,
Таълимингни олган кўп шогирдларинг бор экан.

Сирот кўприги узра бирга ўтишди, улар,
Ҳар бир гуноҳинг учун елка тутишди, улар.
Ҳайратдан қотди устоз, толеъи кулганига,
Аллоҳга минг ҳамд айтди, муаллим бўлганига.

Қиссадан ҳисса шулки, Ҳақ карами кенг экан,
Муаллимнинг ҳар дарси, ибодатга тенг экан!

Ўлмасбек Самарқандий
@Samarqandiy77

#Iftor_yaqin

Кўнгилларни безанг энди,
Роббимга роз рафтор яқин.
Дастурхонни тузанг энди,
Ифтор яқин, ифтор яқин!

Умрингизга аср берсин,
Кўшкингизга қаср берсин,
Сабрингизга ажр берсин!
Ифтор яқин, ифтор яқин!

Қалбда Ҳақдан ҳидоят бор,
Дилингизда ибодат бор,
Бир хурмолик қаноат бор,
Ифтор яқин, ифтор яқин!

Саодат бор садрингизга,
Қадр қўшсин қадрингизга,
Ажр берсин сабрингизга,
Ифтор яқин, ифтор яқин!

© Ўлмасбек Самарқандий.

@Samarqandiy77

​​МЕҲМОН

Эшик тақиллади... қара ким экан,
Кимдир тирқишидан ташлади қиё.
Тезроқ оч, сабримга ботмоқда тикан,
Қайғу келдимикан, шодликмикан ё?!

Эшик тақиллади... бор қулфини ол,
Кимдир секингина қўйди йўталиб.
Ҳижрон ҳолим сўраб келган эҳтимол,
Ёки Ишқ келдими, гуллар кўтариб.

Эшик тақиллади... қизиқ, аломат,
Ярим тун ҳол сўраб биров келибди.
Қўлида нимадир бўлса, у омад,
Қуруққўл кўринса, синов келибди.

Эшик тақиллади... шивирлар лабим:
«...Яхши одам келса, кошонам тўлар.
Маҳзун одам бўлса оч, у ҳабибим,
Жилмайиб тургани душманим бўлар.

Эшик тақиллади... Шеър ёзгим келар,
Бир туйғу қалбимни қаттиқ тилдими?
Қара, хаёлимда ҳисларим елар,
Шоирлигим билиб илҳом келдими!?

Эшик тақиллади... бор қулфини ол,
Муҳаммад, Исмоил, Исроил келди.
Умр тилаб гадо келган эҳтимол,
Ё жонимни сўраб Азроил келди.

Эшик тақиллади... қара ким экан!?

Ўлмасбек Самарқандий.

Каналимизга қўшилинг:
👇👇👇👇👇👇👇
t.me/Samarqandiy77

#Якшанба_ҳазили

Рўзадор бир аёлнинг,
Жағи ҳеч тинмас эди.
Нима ширк, нима макруҳ,
Фарқини билмас эди.

Саволга тутарди у,
Ҳар кун шўрлик эрини.
Эр толиқиб артарди,
Пешонасин терини.

Бир куни саволидан,
Қайнади эр зардаси.
- Нима есам очилмас,
Тутган рўзам, дадаси?

Жавоб берди эр дарров,
Ғазаби дилда ботин.
- Ҳар куни бир мушт есанг,
Рўзанг очилмас, хотин! 😄

Ўлмасбек Самарқандий.

@Samarqandiy77

​​#Vaqti_yaqin

- Чарчаб қолмадингми, рўзалар билан..?
Такрор айтилади ҳар кун шу савол.
Очиқ қолдирасиз ҳар гал сўроғин,
Айтинг, ким кўрибди иймондан завол?!

Ҳар кун берилса ҳам такрор ва такрор,
Савол бергувчига қилманг ҳеч қаҳр.
Жавоб муқаррардир - бўлинг сиз иқрор,
Роҳатдан ҳам чарчаб бўлурми ахир?!

©Ўлмасбек Самарқандий.

•┈┈┈┈•❈••✾••❈•┈┈┈┈•

@Samarqandiy77

САҲРОДАГИ ВОҚЕА

Икки насроний дўст – Дэвид ва Майкл.
Адашиб қолибди саҳрода бир кун.
Очлик, ташналикдан толиқди улар,
Кўтаролмай ҳатто жуссасин юкин.

Ногаҳон, олисда – кунчиқар томон,
Бир масжид кўринди саҳро юзида.
Икки дўст севиниб кетди шу замон,
Шодлик учқунлари порлаб кўзида.

Дэвид сўз бошлади: - Келгин ўзимиз,
Мусулмонга солиб борамиз бирров.
Сезиб қолмасидан ёлғон сўзимиз,
Қорнимиз тўйғазиб оламиз дарров.

Гапирсангчи дўстим, нимага жимсан,
Бир кеча масжидда топамиз паноҳ.
Мен Аҳмад бўламан, сен-чи сен кимсан?
- Мен Майкл бўламан, ёлғон - бу гуноҳ!

Макрга кўнмади Майкл барибир,
Шу зайл етдилар масжидга улар.
Имом қарши олди юзида сабр,
Кўзлари сокин ва хотиржам кулар.

- Хуш кўрдик, кимсизлар, келинглар иним,
Жимлик чўкди шу дам бир лаҳза, оний.
- Менинг исмим Аҳмад, мусулмон диним,
- Мен эса Майклман, диним насроний.

Имом имо қилди ёрдамчисига,
Майклга ҳозирланг дастурхон ёйиб.
Сўнг кулиб Дэвиднинг ҳорғин юзига,
Рамазон муборак, деди жилмайиб.

Ўлмасбек Самарқандий.
@Samarqandiy77

​​#tavallud
#Zulfiyaxonim
#Ozod_Sharofiddinov

​​Бугун катта байрам, сўз айтинг лобар,
Чалинг эй шуаро баландроқ созни.
Баҳорнинг ташрифи билан баробар,
Таваллуд айёми икки устозни!

Бири СЎЗ қудратин айлади матлаб,
Бири куйлаб ўтди жўшқин ҳаётни.
Бири шеъриятга баҳор етаклаб,
Бири яшнаттирди адабиётни!

© Ўлмасбек Самарқандий.

@Samarqandiy77