Barmoqlaringga mahtal
eshik mening yuragim...
M.Jumayev

* * *
Ko'zlarimga ko'zingni
belab qo'ysam, maylimi?
Yulduzlarni boshingdan
elab suysam, maylimi?
Tayinsizlikka yo‘yma
bir Majnunning maylini,
Kiprigim-la yurakday
qo‘ling kelar silagim,
Barmoqlaringga mahtal
anor mening yuragim.

Shaharlik daraxtlarga
she‘rlarimni o‘qidim,
Yomg‘irlarga pichirlab
sirlarimni o‘qidim,
Sen yerga tusharmisan,
Yer chiqmay o‘z o‘qidan?
Tashrifingga tashnalab
qonar mening yuragim:
barmoqlaringga mahtal
anor mening yuragim.

Tug‘ilmagan qizimday
erka ekan muhabbat,
Najot istagan boshga
yelka ekan muhabbat,
Faqat ertaklar aytdi
menga lekin muhabbat,
Quyosh bilan o‘chakish
yonar mening yuragim,
Barmoqlaringga mahtal
anor mening yuragim.

Jonimga hokimsan, men —
vujudimga Sulaymon.
O‘zimday o‘ksiz topmay
O‘z boshimni silayman.
Yusuf ko‘rgan tushnimas,
qul bo‘lishni so‘rayman.
Chimildiqqa kirganday
tulpor mening yuragim,
Barmoqlaringga mahtal
anor mening yuragim.

Anor — mening yuragim.

2021
✍🏻R.Xo‘jamov