Publisher.uz

​​#yangikitob

Bugun o'g'limga AsaxiyBooks'dan kitoblar sotib oldim. Ikkitasi "Dunyo daholari" turkumida nashr qilingan Muhammad Ali va Stiv Jobs haqidagi kitoblar. Rangli, rasmli, qog'ozi ham juda sifatli, muqovasi qattiq, xullas, yoshlarbop.

Muhammad Ali haqidagi kitobga ko'z yugurtirib chiqdim. Kitob qisqa-qisqa raund (bob)lardan iborat — har biri qahramon hayotining bir davrini yoki bir voqeani o'z ichiga oladi. Kitobda o'quvchini o'ylashga, o'zi uchun xulosa chiqarishga undovchi fikrlar va iqtiboslar talaygina. Xullasi kalom, menga yoqdi, o'g'limga ham yoqadi degan umiddaman.

Hozirgi gadjetlar zamonida bolalarga kitob o'qitish oson emas. O'g'limga turli kitoblar olib berib qiziqtirishga harakat qilganman. Shular orasidan "Britannika bolalar ensiklopediyasi" va Artur Konan Doylning Sherlok Xolms va uning do'sti doktor Vatson sarguzashtlari haqidagi hikoyalari unga juda yoqqan (ammo ko'pini inglizchada o'qigandi). Shuning uchun o'zimizning detektiv hikoyalarni ham o'qib ko'rsinchi degan ma'noda Omon Muxtorning "Sherlok Xolms Buxoroda yoxud sirli qo'lyozma tarixi" nomli detektiv hikoyalari to'plamini ham oldim. Ko'ramiz, ma'qul kelarmikan.

#yangikitob

Akademnashr'da o'zbekning olovqalb shoiri Najmiddin Ermatovning "Turon sog'inchi" nomli to'plami nashrdan chiqibdi.

Kitob Akademnashr xalqimizga taqdim qilayotgan "Izlam" ruknining 2-fasli doirasida nashr etilibdi.

Bugun ona tilimiz bayrami – o‘zbek tiliga davlat tili maqomi berilgan kun.
Til – millatimiz ruhi, millat sifatida mavjudligimiz ramzidir.
Ikki yil avval tilimiz va alifbomiz haqida fikrlarimni bildirgan edim. Kuzatsam, bugun ularning ba’zilari amalga oshirilibdi. O‘zbek tilida kitoblar nashr etish orqali tilimiz rivojiga hissa qo‘shayotganimdan faxrlanaman.

@Publisheruz

Oyina.uz Elbekning 1923-yil “Turkiston” gazetasining qator sonlarida e’lon qilingan lug‘atidan namunalar beribdi. Unda arab, fors va rus tillaridan o‘zlashgan so‘zlarning sof turkiycha shakllari keltirilgan.

Lug‘atda berilgan so‘zlarni o‘qib tilimizda ishlatiladigan so‘zlar qanchalik o‘zgarib ketganini ko‘rishingiz mumkin. E’tibor qilsangiz, lug‘atda keltirilgan so‘zlarning 50 foizi hozirgi kunda og‘zaki nutqda ishlatilmaydi, ba’zilari she’riyatda, nasriy asarlarda ishlatiladi xolos.

Tilga qiziquvchi har qanday inson uchun bu lug‘at qiziq bo‘lsa kerak. Tekshirib ko‘rin-chi, siz ulardan qanchasini bilar va so‘zlashuvda ishlatar ekansiz.

@Publisheruz

​​Tarix va bugun

Kecha nashriyotda bir xodimimizning qo‘lida rasmdagi ruscha-arabcha lug‘atni ko‘rib qoldim. Kasb kasalligi – darrov qiziqib nechanchi yilda nashr qilingani, muallifi va adadiga qaradim. Kitob 1968-yil Moskvada “Советская энциклопедия” nashriyiotida 30000 adadda chop qilingan ekan.

Lug‘at mashhur filolog-arabshunos, professor G.Sh. Sharbatov tahririda nashrdan chiqqan bo‘lib, tuzuvchilar V.N. Krasnovskiy va T.A. Faxrilar. U paytda hamma kitoblarda muqovaning orqa tarafiga kitob narxi yozilgan, qarasam «59 коп.» deb yozilgan ekan. Google domlaning aytishicha, o‘sha paytda bir oylik o‘rtacha ish haqi 112 rubl bo‘lgan ekan.

Talabalik paytimizda Xalidovning arab tili darsligi juda mashhur bo‘lardi, arab tili bo‘yicha qo‘llanma va lug‘atlar barmoq bilan sanarli edi. Hozirgi kunga kelib arab tili bo‘yicha darslik va qo‘llanmalar ancha ko‘paydi, «An-Na’ym ul-Kabir», «Al-Qomus» kabi katta lug‘atlar nashr qilindi. Birgina kitoblardunyosi.uz saytining o‘zidan turli qo‘llanma va lug‘atlarni topishingiz mumkin. Masalan, arab tili o‘rganuchilar uchun ko‘p yillik tajribaga ega ustoz Abdulqayum Hikmatov nashrga tayyorlagan «Ад-дурусун наҳвия», Grand ta’lim o‘quv markazi arab tili ustozlari tomonidan nashrga tayyorlangan «Arab adabiy tili: qoida va mashqlar» turkum qo‘llanmalarni tavsiya qilgan bo‘lardim. Elektron lug‘atlar va Youtube’dagi videodarslar esa alohida mavzu.

@Publisheruz

AQShlik tarjimon bilan suhbatdan parcha
#iqtibos

Oyina.uz'da AQShlik tarjimon bilan suhbat e'lon qilinibdi. Tarjimon Shelli Feyrvezer-Vega rus va oʻzbek tillaridan ingliz tiliga badiiy asarlarni tarjima qilar ekan. Hozirga qadar u Hamid Ismoılovning ikkita romanini hamda qozoq mualliflarining bir nechta asarlarini, shuningdek, oʻzbek, qozoq, rus tillaridan qator hikoyalarini ham inglizchaga tarjima qilgan ekan.

"...Asarlarni shunchaki Oʻzbekistonniki boʻlgani uchungina qiziqarli asar, deb eʼlon qilish bilan ish bitmaydi. Oʻzbekiston sehrli bir diyor, oʻzgacha maftunkor boʻlgani uchungina o‘zbekcha asarni qiziq deya olmaymiz, chunki bu taʼrifga har bir oʻlka mos keladi, shunday emasmi? Shuningdek, asarni oʻzbek adabiy tarixida muhim rol oʻynashiga tayanibgina targʻib qila olmaymiz. Chunki Oʻzbekiston hududidan tashqarida hech kim bu tarix haqida hech narsa bilmaydi. Oʻzbek asarlarini istalgan boshqa xalq adabiyotinikidek targʻib qilaverish kerak. Masalan, maroqli syujet, ajoyib yozuv uslubi, esda qolarli qahramonlar, oʻziga xos dunyoqarashga ega muallif – mana nimalarni tanishtirish kerak birinchi?! Ana shundagina o‘quvchiga sotib olishni, oʻqishni istagan kitobini topib bergan boʻlasiz."

@Publisheruz

​​🔈 «Kitobxonlik haftaligi»ga marhamat!

📚 22—26-aprel kunlari Axborot va ommaviy kommunikatsiyalari agentligi tashabbusi bilan butun mamlakatimiz bo'ylab an’anaviy IV  Respublika «Kitobxonlik haftaligi» o‘tkaziladi.

✔️ Haftalik doirasida nashriyotlar tomonidan chop etilgan yangi mahalliy va xorijiy kitoblar taqdimoti, kitobsevarlar uchun turli mahorat darslari, mutolaa tadbirlari, yozuvchi va adiblar bilan uchrashuvlar, davra suhbatlari va boshqa qator ma’naviy-ma’rifiy, madaniy dasturlar o‘tkaziladi.

@Publisheruz