Адлия вазирлиги ҳомийлик ва хайрия жараёнини такомиллаштиришга оид қонун лойиҳасини парламентга киритибди.

Жисмоний шахслар хайрия йиға олмайдими? Ундай эмас, йиға олади, деб ёзади Адлия вазирлиги вакили Шаҳноза Соатова [матн тўлиқ уники]. Фақат ўзи ёки яқин қариндоши учун. Яқин қариндошлар – қонунчилик асосида, ўзаро қариндош бўлган шахслар, яъни ота-оналар, туғишган ёки тутинган ака-ука ва опа-сингиллар, эр-хотинлар, фарзандлар (шу жумладан асраб олинганлар), бува ва бувилар, набиралар, шунингдек эр-хотиннинг ота-оналари, туғишган ёки тутинган ака-ука ва опа-сингиллар бўлиши мумкин.

Кўнгиллилар-чи? Хайрия фаолиятига кўнгилли бўлиб қўшилиш ва кўмаклашиш мумкин эмасми? Албатта, мумкин. Кўнгиллилар бегона шахслар учун хайрия йиғишда иштирок этиши мумкин, фақат эълон бериш орқали! Эълонларда хайрия ким учун йиғилаётган бўлса, ўша одамнинг пластик картаси ва/ёки банк ҳисобрақамини кўрсатишлари керак. Яъни ўзининг ё хайрия субъектидан бошқа бировнинг картасини қўйиши мумкин эмас.

Хайрия қутилари қандай қўйилади? Хайрия қутилари фақат ННТ ёки юридик шахслар томонидан белгиланган тартибда қўйилиши мумкин. Бунда хайрия қутиси шаффоф идиш бўлади, жойлаштириладиган манзил олдиндан эълон қилинади, уни очишда гувоҳлар қатнашади ва бу жараён видеотасвирга олиниб, жамоатчиликка эълон қилинади. Яъни хайрия маблағи хайрия қилувчидан хайрия олувчигача бекаму кўст етиб бориши жамоатчилик назорати остида, шаффоф бўлиши керак.

ННТлар нақд пул шаклида хайрия йиға оладими? Албатта, йиға олади. Фақат хайрия қутилари орқали. Яъни ҳар бир купюра ёки танга албатта белгиланган тартибда ўрнатилган шаффоф хайрия қутисига тушиб, кўпчилик иштирокида ҳисобланиб, ҳужжатлари қилиниб, ҳисоботи бериладиган бўлиши керак.

P.S.: қонун лойиҳаси жамият ҳаёти учун муҳим аҳамиятга эга. Шу сабабли лойиҳа эълон қилиниб, жамоатчилик муҳокамаси ўтказилиши лозим. Бургага жаҳл қилиб, кўрпани ёқиш керак эмас.