FCMASHAL.UZ

Superliga va Proliga reglamenti”ning 11.7-bandi quyidagicha bayon qilingan:


Musobaqada ishtirok etish huquqini beruvchi litsenziya hujjatlari rasmiylashtirilganidan so‘ng litsenziyalar klubning vakolatli vakiliga uning imzosi bilan tasdiqlangan shaxsiy mas’uliyati ostida quyidagi shartlarda taqdim etiladi:

• reglamentning 10.18-bandida qayd etilgan texnologiya bilan ishlash huquqini beruvchi litsenziya mavsum yakuniga qadar sotib olinganligini isbotlovchi hujjat Ligaga topshirilganda;

• videotahlillar asosida futbolchining rasmiy uchrashuvlardagi statistik ko‘rsatkichlari haqida ma’lumot beruvchi markazlashtirilgan kompaniya bilan tuzilgan shartnoma Ligaga topshirilganda. Mazkur hujjatlarsiz klub 2002-yil va undan katta yoshdagi futbolchi litsenziyasiga ega chiqa olmaydi.


Liga mazkur bandni O‘zbekiston Respublikasi Prezidentining 2019-yil 4-dekabrdagi “O‘zbekistonda futbolni rivojlantirishni mutlaqo yangi bosqichga olib chiqish chora-tadbirlari to‘g‘risida”gi 5887-sonli Farmonida belgilangan vazifalar ijrosini amalga oshirish maqsadida reglamentga kiritgan bo‘lib, u bosqichma-bosqich qat’iylashtirib kelindi. Xususan, o‘tgan mavsum mazkur band ijrosini amalga oshirishda qator klublar Ligaga yolg‘on ma’lumot taqdim etgani ma’lum bo‘ldi va ularga nisbatan jarima intizom chorasi qo‘llanildi.


Joriy mavsumda ham shunday holat kuzatilmasligi uchun reglamentga yuqoridagi ko‘rinishda o‘zgartirish kiritilayotgani o‘tgan yilning dekabr oyidayoq Superliga klublariga ma’lum qilindi. Liga mutaxassislari o‘tgan uch oy davomida mazkur masala va muzokaralarda klublarga amaliy yordam ko‘rsatdi. Shunga qaramay, ayrim klublar hozirga qadar tegishli litsenziyalarni Liga ro‘yxatidan o‘tkazgani yo‘q.


Shundan kelib chiqib, Superliga ilk turida biror klub maydonga faqatgina 2003-yil va undan keyin tug‘ilgan futbolchilar bilan chiqib kelsa, Liga mazkur jamoaga katta yoshli futbolchilar litsenziyasini taqdim etmagan bo‘ladi. Umid qilamizki, futbol muxlislari bu kabi holatlarni to‘g‘ri qabul qiladi va o‘z jamoasi rahbariyatidan professionallikni talab qiladi.

Liga yangi mavsum oldidan Superliga hamda Proliga klublari matbuot xizmati vakillari uchun seminar tashkil etdi. Unda futbol klublarining ommaviy axborot vositalari, ijtimoiy tarmoqlar va jamoatchilik bilan aloqalarini samarali boshqarish bo‘yicha mashg‘ulotlar va tajriba almashish imkoniyati yaratildi.


Seminar davomida qatnashchilarga Reglament hamda Media yo‘riqnomadagi o‘zgarishlar haqida ma'lumot berildi. Shuningdek, o‘tgan mavsum davomidagi yutuq va kamchiliklar, bu borada yuzaga kelgan masalalar, ularning yechimi, klublar rasmiy saytlarining uzluksiz ishlashini ta’minlash hamda yangi mavsumdagi rejalar kelishib olindi.