📦 Arxivdan
"TILI ALLOHDADIR, QALBI ZULMATDA..."
Qalbing koinotdir, sen kichik zarra,
Muhtasham umrga bosilgan muhr.
Oxirat bir qadam atrofga qara.
Mo‘jiza bo‘lmaydi, kutmagil sehr.
Hayot ibtidodir, intihosi bor,
Loqal yaramading zikr etmoqqa?
Qarzing bor uzmasdan shaylanib olding,
Shoshib ketmoqdasan endi qayoqqa?
Marvarid donasin kichik bilma do‘st?
U qadr topadi sen topmagan chog‘...
Yaxshi bo‘l, ezgulik qo‘llaridan tut,
Mayli qasr qurma, yarat bitta bog‘...
Kuyinchak siymosin berib ayolga,
Kalxatlar quvlasa bilmagan ham sen.
Suyasan joningni qo‘yib garovga,
Ishon kalxat bo‘lib, suymagan ham sen.
Er yigit nomingga bitilajak bayt,
Ordan nomus yasab bording qayoqqa?
Ayol qadrin bilding, goh hazondan past,
Sening qadring qo‘ydi, qachon tuproqqa?
Iymon malol kelsa, kuldik vo ajab?!
Shaytondan qon olib yashajakmi u,
Bormi nafs o‘tiga ilohiy sabab?
Bundayin yashamoq kelajakmi bu?!
Qalbing koinotdir sen kichik zarra...
✍Maftuna Amirzoda
2020-yil
https://t.me/Maftuna_Amirzoda_ijodi