Men bunga oʻzimni koʻrishga keldim,
Ammo men yoʻq edim jiyda tagida.
U payt ertaklarga ishonar edim,
Uchib ketdimmikin ertakdagiday?

Balki men hali ham oʻsha bahorda
Yuribman qushlarga yegulik tashib.
Balki “halok” boʻldim qorongʻi gʻorda
Oʻn boshli ajdaho bilan olishib?...

Oh, uchgim keladi
Bolalik tomon,
Lekin na koʻroldim, na unga toʻydim.
Uchmoqqa qanot ham yoʻqdir bu zamon,
Chunki men ertakka ishonmay qoʻydim

Muhammad Solih