Bahor bilan ramazon

Bayram shukuhi yeldi,
Xushbaxt yangradi azon.
Bir kunda kirib keldi,
Bahor bilan ramazon.

Mening ikki dilbarim,
Sizsiz ko‘ngillar yarim,
Sevib, sog‘inganlarim,
Bahor bilan ramazon.

Biri rizq, biri taqvo,
Biri gul, biri halvo,
Odam va momo Havvo,
Bahor bilan ramazon.

Bir qo‘lida nisholda,
Sumalak bor bir qo‘lda.
Kirib keldi shu holda,
Bahor bilan ramazon.

Baxt, shodlikka boy bu oy,
Azozilga "voy" bu oy,
Qanday go‘zal oy bu oy?
Bahor bilan ramazon.

Jo‘shar imon xurligi,
Millatning masrurligi.
Din va o‘zlik birligi,
Bahor bilan ramazon!

Biri hayotim guli,
Biri jannatga yo‘lim,
Mening ikki sevgilim,
Bahor bilan ramazon.

Aytsam dardlarim chuqur...
Yetkizganiga shukur!
Biri malak, biri xur,
Bahor bilan ramazon!

Sog‘inganim bilibsiz,
Akbarni shod qilibsiz,
Xush ko‘rdim, xush kelibsiz,
Bahor bilan ramazon!

Akbar Ali. 01. 03. 2025