* * *
Ketishing bir qoʻrqinch,
Ham kelishing dard.
Ta’rifing – jonimga titroq, hayajon.
Bilmadim, sen bilan soʻzlashay desam –
Tanam shol, koʻzlarim, tilim chalajon.

Nedan yaralgansan?
Olovmi yo suv?..
Fikrating – ummoni Sulaymon uzra
yal-yal yonayotgan yulduzlardek lov.
Shishadan yaralgan borliqman senga
Yaqinlashay desam sensan chogʻ, olov.

Qiziy boshlayapman
Qaytish yoʻq, qaytish
(Ham senga aytish yoʻq)
Ham senga aytish.

Borligʻim erisin
Qalb otashingdan.
Odamlar ichida
Men – qanot, sen – qush.

Ayt, mensiz qandayin
ucha olasan?

© Gulnor

@Gulnor_Poeziyan